Hebrewnee 5 - Yn Conaant Noa 1810

CAB. V

¹ Son ta dy chooilley ard‐saggyrt reiht veih mastey deiney, er ny oardaghey son [vondeish] deiney ayns reddyn bentyn rish Jee, dy vod eh chammah giootyn as ourallyn y hebbal son peccaghyn:

² Oddys chymmey y hoilshaghey er ny mee‐hushtee, as orroosyn t’er n’gholl er‐shaghryn; son dy vel eh hene injillit gys annooinid:

³ As er yn oyr shoh lhisagh eh myr son y pobble, myrgeddin er e hon hene, oural y hebbal son peccaghyn.

⁴ As cha vel dooinney erbee goaill yn ooashley shoh er hene, agh eshyn ta er ny eam liorish Jee, myr va Aaron:

⁵ Myr shen, cha ghow Creest yn ooashley shoh er hene, dy ve jeant ny ard‐saggyrt; agh eshyn dooyrt rish, Uss my Vac, jiu ta mee er dty gheddyn.

⁶ Myr t’eh gra myrgeddin ayns boayl elley, T’ou uss saggyrt son dy bragh myr va Melchisedec.

⁷ Ayns laghyn e ghooghys‐foalley, tra v’eh er hebbal padjeryn as aghinyn, lesh eam jeean as jeir, huggeysyn va pooaral dy hauail eh veih baase, as v’eh er ny livrey veih shen ny ghow eh aggle [crauee] roish;

⁸ Ga dy nee Mac v’eh ny‐yeih dynsee eh biallys, liorish ny reddyn duillee eh.

⁹ As myr shoh er ny chasherickey, haink eh dy ve bun y taualtys dy bragh farraghtyn dauesyn ooilley ta coyrt biallys da;

¹⁰ Er ny ockley magh liorish Jee ny ard‐saggyrt, myr va Melchisedec.

¹¹ My‐e‐chione ta ymmodee reddyn ain dy ghra, as doillee dy choyrt bun orroo; fakin dy vel shiu moal ayns clashtyn.

¹² Fakin son y traa lhisagh shiu ve fir‐ynsee, ta shin hene feme fer dy ynsaghey diu reesht cre ta ny chied banglaneyn jeh leigh Yee; as ta shiu lheid as ta feme bainney, as cha nee bee lajer.

¹³ Son ta dagh unnane ta cliaghtey er bainney, neu‐ynsit ayns y ghoo dy ynrickys: son oikan eh.

¹⁴ Agh ta bee lajer cooie dauesyn t’ec slane eash, dy jarroo dauesyn ta liorish cliaghtey er gheddyn keeal as tushtey dy vriwnys eddyr mie as sie.