Hebrewnee 2 - Yn Conaant Noa 1810

CAB. II

¹ Shen‐y‐fa lhisagh shin tastey s’geyrey ’choyrt da ny reddyn ta shin er chlashtyn, er‐aggle ec traa erbee dy jinnagh shin ad y yarrood.

² Son my va’n goo loayrit liorish ainleyn jeant shickyr, as my hooar dy chooilley pheccah as mee‐viallys yn leagh cooie dy cherraghey;

³ Kys oddys shinyn scapail, my nee mayd mee‐rioose er saualtys cha gloyroil, va hoshiaght focklit magh liorish y Chiarn, as v’er ny hickyraghey dooinyn lioroosyn cheayll eh;

⁴ Jee myrgeddin gymmyrkey feanish lhieu, chammah liorish cowraghyn as yindyssyn, as lesh ymmodee mirrillyn, as giootyn y Spyrryd Noo, cordail rish e aigney hene?

⁵ Son cha vel eh er choyrt fo reill ainleyn yn seihll ta ry heet, my‐e‐chione ta shin loayrt.

⁶ Agh ta fer ayns raad ennagh [jeh’n scriptyr] gymmyrkey feanish, gra, Cre ta dooinney, dy vel oo aggindagh er? ny mac y dooinney, dy vel oo jeeaghyn er?

⁷ Ren oo eh red beg s’inshley na ny ainleyn; t’ou er choamrey eh lesh gloyr as ooashley, as hug oo reill da harrish obbraghyn dty laueyn:

⁸ T’ou er injillaghey dy chooilley nhee fo e chassyn. Son liorish dy vel eh er choyrt dy chooilley nhee fo e viallys, cha daag eh monney nagh vel eh er ny choyrt fo. Agh cha vel shin foast fakin dy vel dy chooilley nhee er ny choyrt fo.

⁹ Agh ta shin fakin Yeesey, va jeant son tammylt ny s’inshley na ny ainleyn, liorish surranse baase, coamrit lesh gloyr as ooashley; dy voddagh eh liorish grayse Yee blashtyn er y baase son dy chooilley ghooinney.

¹⁰ Son ve cooie dasyn, er e hon ta dy chooilley nhee, as liorish ta dy chooilley nhee, ayns cur lesh ymmodee mec gys gloyr, dy chasherickey captan nyn saualtys trooid surranse.

¹¹ Son ta chammah eshyn ta casherickey, as adsyn ta er nyn gasherickey, ooilley jeh’n un chynney: shen‐y‐fa cha gow eh nearey dy ghoaill roo son braaraghyn.

¹² Gra, Neem’s dty ennym y hoilshaghey da my vraaraghyn, ayns mean ny hagglish nee’m uss y voylley.

¹³ As reesht, Huggey ver‐ym my varrant. As reesht, Cur‐my‐ner, Mish, as y chloan ta Jee er choyrt dou.

¹⁴ Son wheesh eisht dy vel y chloan goaill ayrn jeh feill as fuill, ghow eshyn eh‐hene myrgeddin ayrn jeh lheid cheddin: dy voddagh eh liorish baase eshyn y stroie va pooar y vaaish echey, ta shen, yn jouyl;

¹⁵ As livrey adsyn va trooid aggle y vaaish ooilley laghyn nyn mea fo geuley bondiaght.

¹⁶ Son dy firrinagh cha ghow eh er dooghys ainleyn; agh ghow eh er dooghys Abraham.

¹⁷ Shen‐y‐fa ve cooie da er dy chooilley aght dy ve jeant casley rish e vraaraghyn; dy voddagh eh ve ny ard‐saggyrt myghinagh as firrinagh, ayns reddyn bentyn rish Jee, dy yannoo lhiassaghey son peccaghyn yn phobble:

¹⁸ Son myr v’eh hene er ny phrowal liorish surranse, t’eh pooaral dy niartaghey lhieusyn t’er nyn browal [lesh seaghyn.]