Hebrewnee 12 - Yn Conaant Noa 1810

CAB. XII

¹ Shen‐y‐fa fakin dy vel shinyn myrgeddin combaasit mygeayrt lesh lheid yn earroo [ooasle] dy eanishyn, lhig dooin cur voïn dy chooilley hrimmid, as y peccah shen ta cha aarloo dy nyn lhiettal, as lhig dooin dy jeean roie yn race ta soit kiongoyrt rooin,

² Jeeaghyn gys Yeesey toshiaght as bun nyn gredjue; ren, son yn eunys va soit kiongoyrt rish, surranse y chrosh, soiaghey beg jeh’n nearey, as t’eh er hoie sheese er laue yesh stoyl‐reeoil Yee.

³ Son smooinee‐jee ersyn ren gymmyrkey lheid ny oltooanyn veih peccee n’oï hene, er aggle dy jean shiu lhaggaghey er y raad, as coayl nyn gree.

⁴ Cha vel shiu er chummal rish gys deayrtey foalley, gleck noi peccah.

⁵ As ta shiu er yarrood yn raaue ta loayrt riu myr rish cloan, My vac, ny soie uss beg jeh smaght y Chiarn, chamoo lhig dty chree voïd tra t’eh coyrt seaghyn dty raad.

⁶ Son ta’n Chiarn smaghtaghey eshyn shynney lesh, as kerraghey dy chooilley vac t’eh goaill‐rish.

⁷ My ta shiu gymmyrkey fo smaght dy meen, ta Jee dellal riu myr rish mec: son quoi’n mac shen nagh vel e ayr dy smaghtaghey?

⁸ Agh my ta shiu fegooish smaght, jeh ta ooilley goaill ayrn, eisht ta shiu nyn gloan oainjyragh, as cha nee mec.

⁹ Ny‐sodjey, ta er ve ain ayraghyn dooghyssagh, dreill shin fo smaght, as hug shin arrym daue: nagh der mayd eisht foddey sleaïe biallys da Ayr ny spyrrydyn, as ve bio?

¹⁰ Son ren adsyn dy feer son earish ghiare shin y smaghtaghey, myr honnick ad eh ymmyrchagh; agh eshyn son foays dooin, dy voddagh shin ve goaill ayrn jeh’n chasherickys echey.

¹¹ Nish cha vel shin jeeaghyn er smaght erbee, choud as ta shin fo, dy ve gerjoilagh, agh piandagh: agh ec y jerrey te gymmyrkey yn mess sheeoil dy chairys, dauesyn ta er ve er nyn gerraghey liorish.

¹² Shen‐y‐fa trog‐jee seose ny laueyn gyn bree, as ny glioonyn annoon.

¹³ As jean‐jee raaidyn rea son nyn gassyn, er‐aggle dy bee yn baccagh chyndaït jeh’n raad, agh dy vod eh dy jarroo ve er ny niartaghey.

¹⁴ Eiyr‐jee da shee rish dy chooilley ghooinney, as da craueeaght, n’egooish cha vod dooinney erbee yn Chiarn y akin.

¹⁵ Jeeaghyn dy imneagh, nagh duitt dooinney erbee giare jeh grayse Yee; er‐aggle dy jean fraue erbee dy herriuid gaase seose, shiu y voirrey, as ymmodee liorish shen er nyn byshooney:

¹⁶ Er‐aggle dy bee maarderagh erbee, ny persoon erbee mee‐chrauee, myr Esau, ren son un longey dy vee e eiraght y chreck.

¹⁷ Son ta fys eu kys ny lurg shen tra v’eh aggindagh dy gheddyn yn eiraght marish y bannaght, v’eh er ny yiooldey: son cha row saase son caghlaa‐aigney ’sy chooish, ga dy ren eh aghin dy jeean lesh jeir.

¹⁸ Son cha vel shiuish er jeet gys y chronk oddagh ve er ny ventyn rish, as ren lossey lesh aile, ny gys dooïd, as dorraghys, as dorrin,

¹⁹ As feiyr y chayrn, as coraa ny goan, yn coraa cheddin ren adsyn cheayll eh geearree nagh beagh yn goo er ny loayrt roo er yn aght shen reesht:

²⁰ (Son cha row ad abyl dy ymmyrkey shen ny va er ny harey, As my harragh agh baagh er gerrey da’n slieau, dy row eh dy ve er ny chlaghey, ny er ny roie trooid lesh shleïy.

²¹ As cha atchimagh shen va’n shilley, dy dooyrt Moses, Ta mee dy mooar er‐creau as agglit)

²² Agh ta shiuish er jeet gys cronk Sion, as gys ard‐valley yn Jee bio, yn Jerusalem flaunyssagh, as gys sheshaght erskyn earroo dy ainleyn,

²³ Gys y slane chaglym‐cooidjagh as agglish ny chied nooghyn, ta recortyssit ayns niau, as gys Jee yn briw harrish ooilley, as gys spyrrydyn deiney mie ayns flaunys,

²⁴ As gys Yeesey ta eddyr Jee as dooinney fo’n chonaant noa, as gys yn uill v’er ny gheayrtey, ta loayrt reddyn share na fuill Abel.

²⁵ Jeeagh‐jee nagh der shiu cooyl rishyn ta loayrt: son mannagh ren adsyn scapail hug cooyl rishyn ren loayrt er y thalloo, foddey smoo cha jig eh lhienyn my hyndaa‐ys mayd ersooyl voishyn ta loayrt veih niau:

²⁶ E choraa ren ec y traa shen yn thalloo y chraa: agh nish t’eh er ghialdyn, gra, Foast keayrt elley nee’m craa cha nee ynrycan y thalloo, agh niau myrgeddin.

²⁷ As ta’n raa shoh, Foast keayrt elley, cowraghey scughey ny reddyn shen ta er ny chraa, myr reddyn ta jeant [son earish], dy vod ny reddyn shen nagh vod v’er ny chraa tannaghtyn.

²⁸ Shen‐y‐fa fakin dy vel shinyn er gheddyn reeriaght nagh vod v’er ny scughey, lhig da grayse ve ain, liorish oddys mayd Jee y hirveish dy booisal, lesh arrym as aggle crauee.

²⁹ Son ta’n Jee ainyn myr aile ta coyrt mow.