Galatianee 5 - Yn Conaant Noa 1810

CAB. V

¹ Shass‐jee shickyr er‐y‐fa shen ’sy reamys ta Creest er chosney dooin, as ny bee‐jee kianlt reesht fo’n whing dy vondiaght.

² Cur‐jee my‐ner, ta mish Paul dy ghra riu, my vees shiu er nyn ghiarey chymmylt, cha bee vondeish erbee eu liorish Creest.

³ Son ta mee gymmyrkey feanish reesht noi dy chooilley ghooinney ta er ny ghiarey chymmylt, dy vel eh kianlt dy chooilleeney yn slane leigh.

⁴ Cha vel Creest jeh veg y foays diu, quoi‐erbee eu ta jerkal dy v’er ny heyrey liorish y leigh; ta shiu er duittym veih grayse.

⁵ Son ta shinyn trooid y Spyrryd farkiaght son y treishteil dy chairys liorish credjue.

⁶ Son ayns Yeesey Creest, cha vel giarey‐chymmylt jeh veg y vondeish, ny an‐ghiarey‐chymmylt, agh credjue ta gobbraghey liorish graih.

⁷ Hie shiu er nyn doshiaght dy mie, quoi ren shiu y lhiettal veih biallys ’choyrt da’n irriney?

⁸ Cha vel y choyrle shoh voishyn ta er nyn eam.

⁹ Ta red fardalagh dy hoorid goll trooid y slane theayst.

¹⁰ Ta my varrant erriu ayns y Chiarn, nagh bee shiu jeh aigney erbee elley: agh nee eshyn ta dy voirey shiu, e cherraghey y ymmyrkey, quoi‐erbee eh.

¹¹ As my ta mish, vraaraghyn, preacheil giarey‐chymmylt, cre’n‐fa ta mee foast surranse tranlaase? eisht ta scammylt ny croshey ec kione.

¹² Baill‐ym dy beagh ad eer giarit magh ta dy voirey shiu.

¹³ Son ta shiuish, vraaraghyn, er ve er nyn eam gys reamys [Creestee]; agh ny jean‐jee yn reamys shoh leshtal son yn eill, agh ayns graih shirveish‐jee yn derrey yeh yn jeh elley.

¹⁴ Son ta’n slane leigh cooilleenit ’syn un raa shoh, ta shen, Ver oo graih da dty naboo myr dhyt hene.

¹⁵ Agh my ta shiu lhottey as coyrt mow y cheilley, cur‐jee twoaie nagh stroie‐jee yn derrey yeh yn jeh elley.

¹⁶ Shoh ta mee gra eisht, Ymmyrk‐jee shiu hene lurg y Spyrryd, as cha jean shiu cooilleeney sayntyn ny foalley.

¹⁷ Son ta’n eill geearree noi’n Spyrryd, as yn Spyrryd noi’n eill: as t’ad shoh soit yn derrey yeh noi’n jeh elley: myr shen nagh vel shiu jannoo myr bailliu.

¹⁸ Agh my ta shiu er nyn leeideil liorish y Spyrryd, cha vel shiu fo’n leigh.

¹⁹ Nish ta obbraghyn yn eill cronnal, as shoh ad, Brishey‐poosey, maarderys, neu‐ghlennid, rouanys,

²⁰ Ammys da jallooyn, obbeeys, dwoaie, anvea, goanlys, jymmoose, streeu, irree‐magh, shaghrynys veih’n chredjue,

²¹ Troo, dunverys, meshtyrys, glutteraght, as y lheid: my‐nyn‐gione ta mee ginsh diu ro‐laue, myr ta mee myrgeddin er n’insh diu ayns y traa t’er n’gholl shaghey, nagh vow adsyn ta cur rish lheid ny reddyn, reeriaght Yee ayns eiraght.

²² Agh ta mess y Spyrryd, graih, boggey, shee, surranse‐foddey, ymmyrkey meigh, mieys, firrinys,

²³ Meenid, sheeltys: noi nyn lheid cha vel leigh erbee.

²⁴ As adsyn ta lesh Creest, ta’d er chrossey yn eill, marish ny yeearreeyn as ny sayntyn.

²⁵ My ta shin beaghey ayns y Spyrryd, lhig dooin myrgeddin gimmeeaght ayns y Spyrryd.

²⁶ Ny lhig dooin geearree gloyr fardalagh, brasnaghey yn derrey yeh yn jeh elley, troo yn derrey yeh mysh y jeh elley.