Galatianee 4 - Yn Conaant Noa 1810

CAB. IV

¹ Nish ta mee gra, nagh vel yn eirey, choud as t’eh ny lhiannoo, agh myr sharvaant, ga dy vel eh hene ny hiarn er ooilley;

² Agh t’eh fo oaseiryn as reiltee, derrey’n traa er ny phointeil liorish yn ayr.

³ Er yn aght cheddin, tra va shin nyn gloan, va shin ayns bondiaght fo oardaghyn y theihll:

⁴ Agh tra va’n traa cooie er jeet mygeayrt, ren Jee e Vac y choyrt, ruggit jeh ben, jeant fo’n leigh,

⁵ Dy eaysley adsyn va fo’n leigh, dy voddagh shin doltanys mec y gheddyn.

⁶ As er‐y‐fa dy nee mec shiu, ta Jee er choyrt Spyrryd e Vac ayns ny creeaghyn eu, geamagh, Abba, Ayr.

⁷ Shen‐y‐fa cha vel oo nish ny sodjey dty harvaant, agh mac; as my she mac oo, eisht t’ou eirey dy Yee trooid Creest.

⁸ Agh ny yeih, tra nagh row enney eu er Jee, va shiu ayns bondiaght dauesyn nagh nee jeeghyn ad liorish dooghys.

⁹ Agh nish erreish da enney ve eu er Jee, er‐nonney lurg da enney ve ec Jee erriuish, kys te dy vel shiu chyndaa gys ny cliaghtaghyn faase as fardalagh, foue shen ta shiu geearee dy ve reesht ayns bondiaght?

¹⁰ Ta shiu freayll laghyn, as meeghyn, as traaghyn, as bleeantyn.

¹¹ Ta mee goaill aggle j’iu, dy vel mee er vaarail erriu obbyr ayns fardail.

¹² Vraaraghyn, ta mee guee erriu, bee‐jee myr ta mish: son va mee myr ta shiuish: cha vel shiu er n’yannoo dooys veg yn aggair.

¹³ Ta fys eu kys trooid annooinid y challin, ren mee yn sushtal y preacheil hiuish ec y toshiaght.

¹⁴ As y trial va mee fo ayns my chorp, cha ren shiu soiaghey beg jeh, ny cur cooyl rhym er y hon; agh ren shiu goaill rhym myr chaghter veih Jee, dy jarroo myr Creest Yeesey.

¹⁵ Cre va eisht yn vaynrys loayr shiu jeh? son ta mee gymmyrkey feanish diu, my oddagh eh ve, dy beagh shiu er phluckey magh nyn sooillyn hene, dy chur dooys ad.

¹⁶ Vel mee er‐y‐fa shen er jeet dy ve nyn noid, er‐yn‐oyr dy vel mee ginsh diu yn irriney?

¹⁷ T’ad goaill orroo dy vel kenjallys jeean oc diu, agh cha nee ass aigney‐mie; dy jarroo, baillhieu shinyn y yeigh magh, dy gheddyn shiu daue hene.

¹⁸ Agh te mie dy ve dy kinjagh jeean aignagh ayns cooish vie, as cha nee ny lomarcan tra ta mish kionfenish mêriu.

¹⁹ My chloan veggey, j’iuish ta mee reesht myr ayns pianyn troailt, derrey vees Creest er ny chummey ayndiu.

²⁰ Agh ve m’aigney dy ve nish kionfenish mêriu, as dy chaghlaa my ghlare, son ta mee ayns imnea er nyn son.

²¹ Insh‐jee dou, shiuish ta aggindagh dy ve fo’n leigh, nagh vel shiu clashtyn y leigh?

²² Son te scruit, dy row ec Abraham daa vac, yn derrey yeh rish inney‐veyl, yn jeh elley rish ben‐seyr.

²³ Agh v’eshyn va rish yn inney‐veyl er ny ruggey lurg yn eill, agh eshyn va rish y ven‐seyr v’eh liorish bree gialdynys.

²⁴ Ny reddyn shoh t’ad er nyn loayrt liorish co soylaghey: son t’ad shoh [cowraghey] yn daa chonaant; yn derrey yeh veih cronk Sinai, ta ruggey cloan gys bondiaght, ta shoh Agar.

²⁵ Son ta Agar shoh cronk Sinai ayns Arabia, as ta gansoor gys Jerusalem ta nish ayn, as t’ee ayns bondiaght marish e cloan.

²⁶ Agh Jerusalem ta heose, t’ee seyr; shoh ee ta’n voir ain ooilley.

²⁷ Son te scruit, Gow boggey, uss [ven] ghennish nagh vel gymmyrkey cloan; brish magh as eïe, uss nagh vel er‐troailt: son ta foddey smoo dy chloan ecksh va treigit na t’ecksh ta sheshey eck.

²⁸ Nish ta shinyn, vraaraghyn, myr va Isaac, yn chloan dy ghialdynys.

²⁹ Agh myr ec y traa shen ren eshyn v’er ny ruggey lurg yn eill, tranlaase ersyn v’er ny ruggey lurg y Spyrryd; dy jarroo myr shen te nish.

³⁰ Ny‐yeih, cre ta’n scriptyr dy ghra? Tilg magh yn inneyveyl as y mac eck: son cha bee mac yn inney‐veyl ny eirey marish mac y ven‐seyr.

³¹ Myr shen eisht, vraaraghyn, cha vel shinyn nyn gloan da’n inney‐veyl, agh da’n ven‐seyr.