Galatianee 3 - Yn Conaant Noa 1810

CAB. III

¹ O Ghalatianee vee‐hushtagh, quoi ta er chleaynaghey shiu, nagh vel shiu biallagh gys yn irriney, kiongoyrt rish nyn sooillyn hene ta Yeesey Creest dy baghtal er ny ve soit magh, er ny chrossey nyn mast’ eu.

² Shoh ny lomarcan baillym gynsaghey veue, Ren shiu yn Spyrryd y gheddyn liorish obbraghyn y leigh, ny liorish y clashtyn dy chredjue?

³ Vel shiu nish jeh cha beg dy hushtey? lurg diu goaill toshiaght ’sy Spyrryd, vel shiu nish jannoo jerrey ’syn eill?

⁴ Vel shiu er hurranse wheesh ayns fardail? my te foast ayns fardail.

⁵ Eshyn er‐y‐fa shen ta shirveish yn Spyrryd erriuish, as ta gobbraghey mirrillyn nyn mast’ eu, vel eh dy yannoo eh liorish obbraghyn y leigh, ny liorish y clashtyn dy chredjue?

⁶ Dy feer myr ren Abraham credjal Jee, as va shen er ny choyrt gys e lieh son cairys.

⁷ Lhig da fys ve eu er‐y‐fa shen, adsyn ta jeh credjue, t’ad shen myrgeddin cloan Abraham.

⁸ As y scriptyr fakin ro‐laue dy jinnagh Jee seyrey ny Ashoonee trooid credjue, ren preacheil roish nish yn sushtal gys Abraham, gra, Aynyd’s vees dy chooilley ashoon er ny vannaghey.

⁹ Myr shen eisht adsyn ta jeh credjue, t’ad bannit marish Abraham firrinagh.

¹⁰ Son whilleen as ta jeh obbraghyn y leigh, t’ad fo’n mollaght: son te scruit, Cursit ta dagh unnane nagh vel tannaghtyn ayns dy chooilley nhee ta scruit ayns lioar y leigh dy yannoo ad.

¹¹ Agh nagh vel dooinney erbee er ny heyrey ayns shilley Yee liorish y leigh, te plain: son, Liorish credjue bee’n dooinney cairal bio.

¹² As cha vel y leigh jeh credjue: agh, Yn dooinney ta dy chooilleeney ad bee eh bio lioroo.

¹³ Ta Creest er livrey shin veih mollaght y leigh, eh hene jeant ny vollaght er nyn son: son te scruit Cursit ta dagh unnane ta croghey er billey:

¹⁴ Dy voddagh bannaght Abraham cheet er ny Ashoonee trooid Yeesey Creest: dy voddagh shin gialdyn yn Spyrryd y chosney trooid credjue.

¹⁵ My vraaraghyn, ta mee loayrt lurg cliaghtey deiney; My te agh conaant eddyr deiney, ny‐yeih, my te confirmit, cha vel dooinney erbee dy vrishey, ny dy choyrt huggey.

¹⁶ Nish da Abraham as da e luight va ny gialdynyn jeant. Cha vel eh gra, As da sluightyn, myr jeh ymmodee; agh myr jeh unnane, As da dty luight’s, ta shen Creest.

¹⁷ As shoh ta mee gra, yn conaant v’er‐ny hickyraghey rolaue liorish Jee ayns Creest, cha voddagh y leigh, va kiare cheead as jeih bleeaney as feed ny lurg shen, y vrishey eh dy yannoo yn gialdyn dyn bree,

¹⁸ Son my ta’n eiraght liorish y leigh, cha veh eh ny sodjey liorish gialdyn; agh hug Jee eh da Abraham er gialdyn.

¹⁹ Cre’n ymmyd eisht t’ayns y leigh! Ve er ny choyrt er coontey peccah, derrey harragh y sluight shen, da va’n gialdyn er ny yannoo; as ve er ny oardaghey liorish ainleyn ayns laue fer va eddyr ad.

²⁰ Nish cha vel fer ta loayrt eddyr jees loayrt son unnane ny lomarcan, agh ta Jee unnane.

²¹ Vel y leigh eisht noi gialdynyn Yee? Ny lhig eh Jee: son dy beagh leig er ve er ny livrey, oddagh bea y choyrt, lhisagh cairys dy firrinagh er ny ve liorish y leigh.

²² Agh ta’n scriptyr er ghoaill stiagh ooilley fo peccah, dy voddagh y gialdyn liorish credjue ayns Yeesey Creest ve er ny choyrt dauesyn ta credjal.

²³ Agh roish my daink credjue, va shin freilt fo’n leigh, jeight seose gys y chredjue, va ny lurg shen dy v’er ny hoilshaghey.

²⁴ Shen‐y‐fa va’n leigh nyn ver‐ynsee dy choyrt lesh shin gys Creest, dy voddagh shin v’er nyn seyrey liorish credjue.

²⁵ Agh erreish da credjue v’er jeet, cha vel shin ny sodjey fo fer‐ynsee.

²⁶ Son ta shiu ooilley cloan Yee liorish credjue ayns Yeesey Creest.

²⁷ Son whilleen jiuish as t’er ny ve bashtit gys Creest, ta shiu coamrit lesh Creest.

²⁸ Cha vel ny sodjey Hew ny Greek, cha vel sharvaant ny seyr, cha vel fyrrynagh ny bwoirrynagh: son ta shiu ooilley unnane ayns Creest Yeesey.

²⁹ As my she lesh Creest shiu, eisht ta shiu sluight Abraham, as eiraghyn cordail rish y ghialdyn.