Galatianee 1 - Yn Conaant Noa 1810

CAB. I

¹ Paul ny ostyl (cha nee veih deiney, chamoo liorish dooinney, agh liorish Yeesey Creest, as Jee yn Ayr, ren eshyn y hroggal veih ny merriu)

² As ooilley ny braaraghyn ta mârym, gys kialteenyn Ghalatia:

³ Grayse dy row hiu, as shee voish Jee yn Ayr, as voish nyn Jiarn Yeesey Creest.

⁴ Ren eh‐hene y choyrt son nyn beccaghyn, dy livrey shin veih’n drogh heihll t’ayn nish, cordail rish aigney Yee as nyn Ayr:

⁵ Huggeysyn dy row gloyr son dy bragh as dy bragh. Amen.

⁶ Ta mee goaill yindys, dy vel shiu cha leah er nyn jyndaa, voishyn ren shiuish y eam trooid grayse Chreest, gys sushtal elley:

⁷ Elley cha vel ayn; agh ta paart ta dy voirey shiu, as shirrey dy yannoo caghlaa ayns sushtal Chreest.

⁸ Agh ga dy jinnagh shinyn, ny ainle veih niau, sushtal erbee elley y phreacheil hiuish, na shen ta shinyn er phreacheil hiuish, lhig da ve giarit magh [veih’n agglish.]

⁹ Myr dooyrt shin roïe, myr shen ta mee nish dy ghra reesht, My nee fer erbee preacheil sushtal erbee elley hiuish, agh shen ta shiu er ghoaill rish, lhig da ve giarit magh.

¹⁰ Son vel mee nish geearree foayr gheiney, ny foayr Yee? ny vel mee shirrey dy wooiys deiney? son dy beign foast shirrey pleasal deiney, cha beign sharvaant Chreest.

¹¹ Agh ta mee dy hickyraghey diu, vraaraghyn, nagh vel y sushtal va er ny phreacheil liorym’s, lurg dooinney.

¹² Son chamoo hooar mee eh voish dooinney, chamoo hie eh er ynsaghey dou, agh liorish ashlish Yeesey Creest.

¹³ Son ta shiu er chlashtyn jeh m’ymmyrkey‐bea t’er n’gholl shaghey, ayns credjue ny Hewnyn, kys dy ren mee tranlaase erskyn towse y yannoo er agglish Yee, dy stroie eh:

¹⁴ As ayns credjue ny Hewnyn va mee ynsit erskyn ymmodee my choasanyn ayns my ashoon hene, shassoo jeean son cliaghtaghyn m’ayraghyn.

¹⁵ Agh tra by‐chooidsave lesh Jee, ren mish y reih veih brein my vayrey, as deïe eh orrym liorish e ghrayse,

¹⁶ Dy hoilshaghey e Vac aynym’s, dy voddin eshyn y phreacheil mastey ny Ashoonyn; chelleeragh cha ghow mee coyrle jeh feill ny fuill:

¹⁷ Chamoo hie mee seose gys Jerusalem, hucsyn va nyn ostyllyn roym; agh hie mee gys Arabia, as haink mee mygeayrt reesht gys Damascus.

¹⁸ Eisht lurg three bleeaney hie mee seose gys Jerusalem, dy akin Peddyr, as duirree mee mârish queig laa yeig.

¹⁹ Agh veg jeh ny ostyllyn elley cha vaik mee, agh Jamys braar y Chiarn.

²⁰ Nish mychione ny reddyn ta mee dy scrieu hiu, cur‐jee my‐ner, fenish Yee, cha vel mee jannoo breg.

²¹ Lurg shen haink mee gys ardjyn Syria as Cilicia.

²² As kialteenyn Yudea va ayns Creest, cha row enney oc er my eddin:

²³ Agh v’ad ny lomarcan er chlashtyn, Dy vel eshyn ren ’sy traa pastit tranlaase orrin, nish preacheil yn credjue v’eh roïe dy stroie.

²⁴ As ren ad Jee y ghloyragh‐ch er my lieh.