Ephesianee 5 - Yn Conaant Noa 1810

CAB. V

¹ Bee‐jee shiuish er‐y‐fa shen eiyrtyssee dy Yee, myr cloan ennoil;

² As immee‐jee ayns graih, myr ta Creest myrgeddin er chur graih dooinyn, as er choyrt eh‐hene er nyn son, chebbal as oural son soar millish da Jee.

³ Agh maarderys, as dy chooilley neu‐ghlennid, as saynt, ny lhig daue ve wheesh as enmyssit ny vud eu, myr te cooie da nooghyn:

⁴ Chamoo broïd, ny glare ommijagh, ny craid, nagh vel jesh; agh ayns ynnyd oc shoh coyrt booise.

⁵ Son shoh ta fys eu er, nagh vel ec maarderagh erbee, ny persoon neu‐ghlen, ny ec dooinney sayntoilagh, ta coyrt ammys da jallooyn, eiraght eddyr ayns reeriaght Chreest as Yee.

⁶ Ny lhig da dooinney erbee shiu y volley lesh goan fardalagh: son kyndagh rish ny reddyn shoh ta corree Yee cheet er cloan y vee‐viallys.

⁷ Ny bee‐jee er‐y‐fa shen nyn sheshaghyn mâroo;

⁸ Son va shiu keayrt dy row dorraghys, agh nish ta shiu soilshey ayns y Chiarn: immee‐jee myr cloan y toilshey;

⁹ (Son ta mess y Spyrryd shassoo ayns dy chooilley vieys, as cairys, as firrinys),

¹⁰ Prowal shen ny ta booisal da’n Chiarn.

¹¹ As ny lhig da sheshaght er bee ’ve eu rish obbraghyn neu‐vessoil y dorraghys, agh ny sleaie cur oghsan daue:

¹² Son te nearey wheesh as dy enmys ny reddyn shen ta jeant lioroo dy follit.

¹³ Agh dy chooilley nhee rish ta foill er ny gheddyn, te er ny hoilshaghey liorish y soilshey; son shen ny ta coyrt lesh gys soilshey, she soilshey eh.

¹⁴ Shen‐y‐fa t’eh gra, Dooisht, uss ta dty chadley, as irree veih ny merriu, as ver Creest soilshey diu.

¹⁵ Jeeagh‐jee eisht dy jean shiu gimmeeaght dy tastagh, cha nee myr ommydanyn, agh myr sleih creeney.

¹⁶ Jannoo ymmyd mie jeh’n traa, er‐yn‐oyr dy vel laghyn seaghnagh ayn.

¹⁷ Shen‐y‐fa ny bee‐jee neu‐hastagh, agh toig‐jee cre ta aigney yn Chiarn.

¹⁸ As ny bee‐jee er meshtey lesh feeyn, ayn ta neu‐heeltys; agh bee‐jee er nyn lhieeney lesh y Spyrryd;

¹⁹ Loayrt riu hene ayns psalmyn as arraneyn‐moyllee, as arraneyn spyrrydoil; jannoo bingys as kiaull ayns nyn gree gys y Chiarn;

²⁰ Coyrt booise dy kinjagh son dy chooilley nhee da Jee dy jarroo yn Ayr, ayns ennym nyn Jiarn Yeesey Creest;

²¹ Ginjillaghey shiu hene yn derrey yeh gys y jeh elley ayns aggle Yee.

²² Shiuish vraane‐poost, jean‐jee shiu hene y injallaghey gys ny deiney‐poost eu, myr gys y Chiarn.

²³ Son y dooinney kione y ven, dy jarroo myr ta Creest kione yn agglish; as eshyn fendeilagh y chorp.

²⁴ Shen‐y‐fa myr ta’n agglish er ny hoiaghey fo Creest, myr shen lhig da ny mraane‐poost ve er ny injillaghey gys ny deiney‐poost oc ayns dy chooilley nhee.

²⁵ Gheiney‐poost, cur‐jee graih da ny mraane eu, dy jarroo myr hug Creest myrgeddin graih da’n agglish, as hug eh hene er e son:

²⁶ Dy voddagh eh ee y chasherickey as y ghlenney lesh niee dy ushtey, liorish y goo.

²⁷ Dy voddagh eh ee y hoiaghey magh da hene ny agglish ghloyroil, fegooish spot ny cron, ny veg y lheid; agh dy voddagh ee ’ve casherick, as fegooish lhea mys erbee.

²⁸ Myr shen lhisagh deiney graih y choyrt da ny mraane oc myr da ny kirp oc hene: eshyn shynney lesh e ven, shynney lesh eh hene.

²⁹ Son cha ren rieau dooinney foast dwoaie ’choyrt da’n eill echey hene; agh t’eh dy veaghey as jannoo mooar jeh, dy jarroo myr ta’n Chiarn jeh’n agglish:

³⁰ Son ta shin oltyn jeh e chorp, jeh’n eill, as jeh ny craueyn echey.

³¹ Er yn oyr shoh faagee dooinney e ayr as e voir, as bee eh er ny sniemmey gys e ven, as bee ad ny‐neesht un eill.

³² Ta shoh folliaght mooar: agh ta mish loayrt mychione Creest as yn agglish.

³³ Ny‐yeih, lhig da dagh unnane euish er‐lheh myr shen graih y choyrt da e ven dy jarroo myr da hene; as jeeagh dy der y ven arrym da e sheshey.