Ephesianee 4 - Yn Conaant Noa 1810

CAB. IV

¹ Ta mish er‐y‐fa shen pryssoonagh ayns cooish y Chiarn, coyrlaghey shiu dy jean shiu gymmyrkey shiu hene ayns aght cooie gys y stayd huggey ta shiu er nyn eam,

² Ayns dy chooilley injillid as meenid, lesh surranse‐foddey, gymmyrkey yn derrey yeh lesh y jeh elley ayns graih;

³ Imneagh dy reayll unnaneys y Spyrryd ayns y kiangley dy hee.

⁴ Ta ayn un chorp, as un Spyrryd, dy jarroo myr ta shiu er nyn eam gys un hreishteil jeh nyn stayd [Creestee]:

⁵ Un Chiarn, un chredjue, un vashtey.

⁶ Un Jee as Ayr jeh ooilley, ta erskyn ooilley, as trooid ooilley, as ayndiu ooilley.

⁷ Agh da dagh unnane ain ta grayse er ny‐choyrt, cordail rish towse gioot Chreest.

⁸ Shen‐y‐fa t’eh gra, Tra hie eh seose er yn yrjey, ren eh cappeeys y leeideil ayns barriaght, as hug eh giootyn da deiney.

⁹ (Nish, dy jagh eh seose, cre te agh dy jagh eh myrgeddin sheese hoshiaght gys ayrnyn s’injilley ny hooirey?

¹⁰ Eshyn hie sheese, eh yn fer cheddin hie seose foddey erskyn ny niaughyn, dy voddagh eh lhieeney dy chooilley nhee)

¹¹ As hug eh da paart, dy ve nyn ostyllyn; as da paart, dy ve phadeyryn; as da paart, dy ve sushtallee; as da paart, dy ve bochillyn as fir‐ynsee.

¹² Son niartaghey ny nooghyn, son oik y chirveish, son coamrey corp Chreest;

¹³ Derrey hig mayd ooilley dy cheilley gys unnaneys y chredjue, as jeh tushtey dy Vac Yee, gys slane dooinney gys towse yn aase dy laanid Chreest:

¹⁴ Nagh bee mayd maghey shoh nyn gloan lheaystey noon as noal, as eiyrit mygeayrt lesh dy chooilley gheay dy ynsagh, liorish kialgyn deiney, as ny croutyn cliucagh, lhieu t’ad lhie cooyl‐chlea er‐chee dy volley:

¹⁵ Agh geiyrt da’n irriney ayns graih, dy vod mayd ayns dy chooilley nhee bishaghey aynsyn, ta’n kione, dy jarroo Creest;

¹⁶ Veihsyn ta’n slane corp dy kiart er ny choyrt cooidjagh, as sniemmit dy cheilley liorish shen ta dagh junt dy hirveish, cordail rish yn obbragh breeoil ta cormit gys dagh olt, coyrt bishagh da’n chorp, dy niartaghey eh hene ayns graih.

¹⁷ Shoh ta mee gra eisht, as gymmyrkey feanish er lieh yn Chiarn, nagh jean shiu veih shoh magh gimmeeaght myr ta’n chooid elley jeh ny Ashoonyn‐quaagh gimmeeaght ayns fardail nyn aignaghyn;

¹⁸ Yn tushtey oc fo dorraghys, nyn yoarreeyn gys bea Yee, kyndagh rish y vee‐hushtey t’ayndoo, trooid creoghys nyn greeaghyn:

¹⁹ Ta liorish coayl nyn mioyr er livrey ad hene seose gys rouanys, dy chur rish dy chooilley vonney dy neu‐ghlennid lesh yeearree jeean neu‐ghooghyssagh.

²⁰ Agh cha nee myr shen ta shiuish er n’ynsaghey Creest:

²¹ My she shen dy vel shiu er chlashtyn eh, as er ve ynsit liorishyn, myr ta’n irriney ayns Yeesey:

²² Mychione yn ymmyrkey‐bea eu t’er n’gholl shaghey, dy der shiu jeh yn chenn ghooinney, ta neu‐ghlen cordail rish yeearreeyn molteyragh ny foalley.

²³ As bee‐jee er nyn yannoo ass‐y‐noa ayns spyrryd nyn aigney;

²⁴ As cur‐jee erriu yn dooinney noa, ta lurg Jee er ny chroo ayns ynrickys as craueeaght firrinagh.

²⁵ Shen‐y‐fa treigeil breagyn, lhig da dy chooilley ghooinney yn irriney y loayrt rish e naboo: son ta shin oltyn yn derrey yeh jeh’n jeh elley.

²⁶ My hig corree erriu, ny jean‐jee peccah. Ny lhig da’n ghrian lhie er y chorree eu:

²⁷ Chamoo cur‐jee raad da’n drogh‐spyrryd.

²⁸ Lhig dasyn ren geid, gyn geid arragh; agh ny sleaie lhig da laboragh, gobbraghey lesh e laueyn shen ny ta mie, dy vod ve echey dy choyrt da’n ymmyrchagh.

²⁹ Ny lhig da drogh ghlare erbee cheet ass nyn meeal, agh shen ny ta mie son ynsagh vondeishagh, dy vod eh grayse y hirveish orroosyn ta geaishtagh rish.

³⁰ As ny cur‐jee corree er Spyrryd casherick Yee, liorish ta shiu cowrit gys laa yn livrey‐ys eu.

³¹ Lhig da dy chooilley roonid, as jymmoose, as farg, as beealler‐aght, as oltooan ve eebrit veue, marish dy chooilley ghoanlys.

³² As bee‐jee dooie yn derrey yeh da’n jeh elley, meigh‐chreeagh, leih da y cheilley, dy jarroo myr ta Jee son graih Chreest er leih diuish.