Ephesianee 3 - Yn Conaant Noa 1810

CAB. III

¹ Son yn oyr shoh, ta mish Paul, pryssoonagh Yeesey Creest er y choontey euish Ashoonyn‐quaagh;

² My she shen dy vel shiu er chlashtyn jeh’n phooar t’er ny choyrt dooys dy hirveish erriu grayse Yee.

³ Kys liorish ashlish ren eh soilshaghey dooys yn folliaght (myr scrieu mee roïe ayns focklyn giarey.

⁴ Lioroo tra ta shiu lhaih foddee shiu toiggal my hushtey’s ayns folliaght Chreest)

⁵ Nagh row ayns eashyn elley er ny hoilshaghey da cloan gheiney, myr te nish er ny ashlaghey da e ostyllyn casherick as e adeyryn liorish y Spyrryd;

⁶ Dy row ny Ashoonyn‐quaagh dy ve co‐eiraghyn, as jeh’n un chorp, as dy ghoaill ayrn cooidjagh jeh e ghialdyn ayns Creest, liorish y sushtal:

⁷ Jeh va mish jeant my hirveishagh, cordail rish gioot grayse Yee v’er ny choyrt dooys liorish obbragh breeoil e phooar.

⁸ Dooys, ta’n fer sloo jeh ooilley ny nooghyn, ta’n ghrayse shoh er ny choyrt, dy beïgns dy phreacheil mastey ny Ashoonyn‐quaagh berchys Chreest nagh vod ve ronsit magh;

⁹ As dy hoilshaghey dy foshlit da dy chooilley ghooinney, cre ta commeeys y folliaght ta er ve er dy hoshiaght y theihll keillit ayns Jee, ren dy chooilley nhee y chroo liorish Yeesey Creest:

¹⁰ Dy voddagh nish v’er ny hoilshaghey da ny ard‐reillyn as pooaraghyn ayns ynnydyn flaunyssagh liorish yn agglish ymmodee filley creenaght Yee,

¹¹ Cordail rish e phointeil ro‐laue chiare eh er‐dy‐rieau ayns Creest Yeesey nyn Jiarn:

¹² Ny hrooid ta daanys ain as kied dy hayrn er‐gerrey da lesh shickyrys liorish y chredjue t’ain aynsyn.

¹³ Shen‐y‐fa ta mee guee erriu ny lhig shiu nyn gree veue; son ny ta mish dy uilliaghtyn ayns y lieh euish, ta shoh yn ghloyr eu.

¹⁴ Son yn oyr shoh ta mee croymmey my ghlioonyn gys Ayr nyn Jiarn Yeesey Creest.

¹⁵ Jehsyn ta’n slane lught‐thie ayns niau as er y thalloo er ny enmys.

¹⁶ Dy jinnagh eh coyrt diuish, cordail rish berchys e ghloyr, dy ve er nyn niartaghey lesh pooar liorish e Spyrryd ayns y dooinney er cheu‐sthie;

¹⁷ Dy vod Creest baghey ayns ny creeaghyn eu liorish credjue; dy vod shiuish liorish ve fraueit es gruntit ayns graih.

¹⁸ Ve abyl dy hoiggal marish ooilley ny nooghyn, cre ta’n lheead, ay y lhiurid, as y diunid, as yn yrjid;

¹⁹ As dy hoiggal graih Chreest, ta erskyn tushtey, dy vod shiu ve jeant magh lesh ooilley laanid Yee.

²⁰ Nish huggeysyn ta abyl dy yannoo foddey erskyn ooilley ny ta shin geearree ny smooinaghtyn, cordail rish y phooar ta gobbraghey dy niartal aynin,

²¹ Huggey dy row gloyr ayns yn agglish liorish Creest Yeesey, trooid magh dy chooilley eash, seihll gyn jerrey. Amen.