Colossianee 2 - Yn Conaant Noa 1810

CAB. II

¹ Son baillym shiu dy hoiggal cre ta imnea jeean my chree er non son euish, as er nyn son ocsyn ta ec Laodicea, as er son whilleen as nagh vel er akin m’eddin ’syn eill:

² Dy vod ny creeaghyn oc ve er nyn gherjaghey, sniemmit cooidjagh ayns graih, as gys dy chooilley verchys as slane shickyrys jeh tushtey, dy ghoaill rish folliaght Yee, dy jarroo yn Ayr, as jeh Creest;

³ Ayn ta follit dy chooilley verchys dy chreenaght as tushtey.

⁴ As shoh ta mee dy ghra, er‐aggle dy jinnagh dooinney erbee shiuish y volley lesh goan brynnagh.

⁵ Son ga dy vel mee veue ’syn eill, ny‐yeih ta mee mêriu ayns y spyrryd, goaill boggey as cur‐my‐ner nyn stayd, as shickyrys nyn gredjue ayns Creest.

⁶ Myr ta shiu eisht er ghoaill rish Creest Yeesey nyn Jiarn, myr shen jean‐jee gimmeeaght aynsyn:

⁷ Fraueit as troggit seose aynsyn, as er nyn niartaghey ayns y chredjue, myr ta shiu er ve ynsit, bishaghey ayn lesh toyrt‐booise.

⁸ Bee‐jee er nyn dwoaie nagh gow dooinney erbee vondeish erriu trooid ynsagh foalsey as molteyraght, lurg cliaghtaghyn deiney, lurg ynsagh annoon y theill, as cha nee lurg Creest:

⁹ Son aynsyn ta tannaghtyn bree yn dooghys flaunyssagh ayns slane towse.

¹⁰ As ta shiuish dy fondagh er nyn n’yannoo magh aynsyn, ta kione dy chooilley ard‐reill as pooar.

¹¹ Aynsyn ta shiuish myrgeddin er nyn ghiarey‐chymmylt lesh y ghiarey‐chymmylt jeant fegooish laueyn, ayns coyrt ersooyl corp peccaghyn yn eill, liorish giarey‐chymmylt Chreest:

¹² Oanluckit mârishyn ayns bashtey, ayn myrgeddin ta shiu er n’irree seose mârish trooid credjue obbragh breeoil Yee, t’er hroggal eh reesht veih ny merriu.

¹³ As shiuish va marroo ayns nyn beccaghyn, as ayns yn an‐ghiarey‐chymmylt yn eill eu, t’eshyn er vioghey cooidjagh mârishyn, erreish da v’er leih diu ooilley nyn loghtyn.

¹⁴ Crossey yn laue scrieuee dy oardaghyn, hass ’sy raad roïn as va nyn ’oï, as ghow eh eh ersooyl dy bollagh, treiney eh gys e chrosh:

¹⁵ As spooilley ard‐reillyn as pooaraghyn, ren eh shilley foshlit jeu, geddyn barriaght harrystoo liorish [y chrosh.]

¹⁶ Ny lhig da dooinney erbee er‐y‐fa shen shiuish y vriwnys mychione bee ny jough, ny mychione laa‐feailley, ny mychione eayst‐noa, ny mychione dooneeyn:

¹⁷ Ta scaa jeh reddyn ta ry heet; agh ta’n corp jeh Creest.

¹⁸ Ny lhig da dooinney erbee shiu y volley jeh nyn leagh, lesh injillid‐aigney foalsey, as cur ooashley da ainleyn, goaill er dy choyrt coontey jeh ny reddyn shen nagh vel eh er vakin, dy fardalagh er ny heidey seose liorish aigney ny foalley;

¹⁹ As cha nee cummal gys y chione, voish myr ta’n slane corp liorish juntyn as kianglaghyn er ny hirveish as sniemmit cooidjagh, te cheet er y hoshiaght lesh bishagh Yee.

²⁰ Shen‐y‐fa, my ta shiu marroo marish Creest veih ynsagh annoon y theihll; cre’n‐fa, myr beaghey ’sy theihll, ta shiu fo reill oardaghyn:

²¹ (Ny benn rish, ny blasht jeh, ny loaght eh;

²² T’ad [shoh] ooilley leeideil gys fardalys liorish y drogh ymmyd ta jeant jeu) lurg saraghyn as ynsagh deiney?

²³ Ayns ny reddyn cheddin ta dy jarroo caslys dy chreenaght ayns ooashley fardalagh, as injillid‐aigney foalsey, as ayns goaill kerraghey er y chorp, cha nee gys moylley erbee dy chooilleeney yearreeyn yn eill.