Ashlish 21 - Yn Conaant Noa 1810

CAB. XXI

¹ As honnick mee niau noa as seihll noa: son va’n chied niau as y chied seihll er n’gholl shaghey; as cha row faarkey ayn arragh.

² As honnick mish Ean yn ard‐valley casherick, yn Jerusalem noa, cheet neose veih Jee ass niau, soit magh myr ben‐phoosee coamrit son e sheshey.

³ As cheayll mee coraa mooar veih niau, gra, Cur‐my‐ner, ta cabbane‐agglish Yee marish deiney, as nee eh cummal mâroo, as bee ad e phobble, as bee Jee eh hene mâroo, as bee eh yn Jee oc.

⁴ As glennee Jee ersooyl dy chooilley yeïr veih ny sooillyn oc, as cha bee baase ayn maghey shen, chamoo trimshey, ny dobberan, chamoo vees veg y phian arragh: son ta ny reddyn va roïe er n’gholl shaghey.

⁵ As dooyrt eshyn va ny hoie er y stoyl‐reeoil, Cur‐my‐ner, ta mee jannoo dy chooilley nhee noa. As dooyrt eh rhym, Scrieu: son ta ny goan shoh firrinagh as shickyr.

⁶ As dooyrt eh rhym, Te cooilleenit. Mish Alpha as Omega, yn toshiaght as y jerrey: ver‐yms dasyn ta paagh farrane ushtey’n vea nastee.

⁷ Yiow eshyn ta geddyn y varriaght, eiraght ayns dy chooilley nhee, as beem’s y Jee echeysyn, as bee eshyn yn mac aym’s.

⁸ Agh adsyn ta faitagh, as mee‐chredjuagh, as adsyn ta cur rish obbraghyn dwoaiagh, as dunveryn, as maarderee, as fir‐obbee, as jallooderyn, as dy chooilley vreagerey, yiow nyn gronney ’sy logh ta lossey lesh aile as brimstone: shen y nah vaase.

⁹ As haink fer jeh ny shiaght ainleyn hym, echey va ny shiaght siyn lane jeh ny shiaght briwnyssyn, as ren eh taggloo rhym, gra, Tar ayns shoh, as jeeagh‐ym dhyt ben y phoosee, ben yn Eayn.

¹⁰ As hug eh lesh mee ersooyl ayns y spyrryd gys slieau mooar ard, as yeeagh eh dou yn ard‐valley, yn Jerusalem casherick, cheet neose ass niau veih Jee,

¹¹ Lesh gloyr Yee aynjee: as va’n soilshey eck myr sollyssid yn jewel smoo costal, eer myr clagh jasper, sollys myr crystal;

¹² As va voalley eck mooar as ard, er va daa ghiat jeig, as ec ny giattyn daa ainle jeig, as enmyn scruit orroo, ta enmyn daa heeloghe jeig chloan Israel.

¹³ Er y niar, three giattyn; er y twoaie, three giattyn; er y jiass, three giattyn; as er y neear, three giattyn.

¹⁴ As va ec voalley yn ard‐valley daa undin yeig, as ayndoosyn enmyn daa ostyl yeig yn Eayn.

¹⁵ As va echeysyn va taggloo rhym lorg‐towshan airhey, dy howse yn ard‐valley, as ny giattyn eck, as y voalley eck.

¹⁶ As ta’n ard‐valley troggit kiare‐chorneilagh, as t’ee co‐chorrym ayns lheead as lhiurid: as howse eh yn ard‐valley lesh y lorg, meeiley dy lieh: t’ee co‐liauyr, co‐lhean, as co‐ard.

¹⁷ As howse eh yn voalley eck shiaght‐feed craue‐roih as kiare, cordail rish towse dooinney, ta shen, yn ainle.

¹⁸ As va stoo yn voalley eck jeh jasper; as va’n ard‐valley jeh airh ghlen, goll‐rish gless sollys.

¹⁹ As va undinyn voalley’n ard‐valley soit magh dy stooamey lesh dy chooilley horch dy chlaghyn costal. Va’n chied undin dy Yasper; va’n nah undin, dy Sapphire; va’n trass dy Chalcedony; as va’n chiarroo, dy Emerald;

²⁰ Yn wheiggoo, Sardonyx; yn cheyoo Sardius, yn chiaghtoo Chrysolite, yn hoghtoo, Beryl; yn nuyoo, Topaz; yn jeihoo, Chrysoprasus; yn un undin jeig, Jacinth; yn ghaa yeig, Amethyst.

²¹ As va’n daa ghiat yeig daa phearl jeig: va dagh giat eh hene jeh un phearl: as va straïd yn ard‐valley airh ghlen, myr dy beagh eh gless sollys.

²² As cha vaik mee chiamble edyr ayn: son ta’n Chiarn Jee ooilley‐niartal, as yn Eayn, yn chiamble eck.

²³ As cha row yn ard‐valley shoh feme yn ghrian, chamoo yn eayst dy cheau soilshey urree: son hug gloyr Yee soilshey jee, as ta’n Eayn yn soilshey eck.

²⁴ As nee ny ashoonyn jeusyn t’er nyn sauail, gimmeeaght ’sy toilshey eck: as aynjee ta reeaghyn y theihll soiaghey nyn ghloyr as nyn ooashley.

²⁵ As cha bee ny giattyn eck edyr jeight ’sy laa: son cha bee oie edyr ayns shen.

²⁶ As ver ad lhieu stiagh ayn‐jee, gloyr as ooashley ny Hashoonyn,

²⁷ As cha jed stiagh ayn er aght erbee red erbee neu‐ghlen, chamoo nhee erbee ta gobbraghey eajeeys, ny jannoo foalsaght: agh adsyn ta scruit ayns lioar vea yn Eayn.