Ashlish 2 - Yn Conaant Noa 1810

CAB. II

¹ Gys ainle agglish Ephesus, scrieu, Ny reddyn shoh ta eshyn dy ghra ta cummal ny shiaght rollageyn ayns e laue yesh, ta shooyl mastey ny shiaght cainleyryn dy airh;

² Shione dou dty obbraghyn, as dty hooilleil, as dty hurranse, as kys nagh vod oo gymmyrkey lhieusyn ta olk: as t’ou er phrowal adsyn ta gra dy nee ostyllyn ad, agh cha vel ad; as er gheddyn ad magh dy ve nyn mreageryn.

³ As t’ou er n’ymmyrkey yn errey, as ta ayd meenid, as er graih my ennym t’ou er hooilleil, as cha vel oo er choayl dty chree.

⁴ Ny‐yeih ta red ennagh aym dt’oï, er‐yn‐oyr dy vel oo er hreigeil dty chied ghraih.

⁵ Cooinee er‐y‐fa shen cre voish t’ou er duittym, as gow arrys, as jean dty chied obbraghyn; er‐nonney higym hood dy tappee, as scugh‐ym dty chainleyr ass e ynnyd, mannagh gow arrys.

⁶ Agh ta’n goo shoh ayd, dy vel dwoaie ayd er obbraghyn ny Nicolaitanee, orroo ta dwoaie aym’s myrgeddin.

⁷ Eshyn ta cleaysh echey, lhig da clashtyn cre ta’n Spyrryd dy ghra rish ny kialteenyn. Dasyn yiow yn varriaght ver‐ym’s dy ee jeh billey yn vea, ta ayns mean paradise Yee.

⁸ As gys ainle agglish Smyrna, scrieu, Ny reddyn shoh ta’n chied er as y fer s’jerree dy ghra, va marroo, as ta bio;

⁹ Shione dou dty obbraghyn, as dty heaghyn, as dty voghtynid (agh t’ou berchagh), as ta fys aym er yn oltooan ocsyn ta gra dy nee Hewnyn ad, as nagh vel, agh keeill y Drogh spyrryd.

¹⁰ Ny gow aggle roish veg jeh ny reddyn shen nee oo surranse: cur‐my‐ner, nee yn drogh‐spyrryd paart eu y hilgey ayns pryssoon, dy vod shiu v’er nyn browal; as bee shiu fo tranlaase jeih laa: bee uss firrinagh gys y vaase, as ver‐yms dhyt attey dy vea.

¹¹ Eshyn ta cleaysh echey, lhig eh clashtyn cre ta’n Spyrryd dy ghra rish ny kialteenyn, Cha vow eshyn ta geddyn y varriaght, aggair liorish yn nah vaase.

¹² As gys ainle agglish Pergamos, scrieu, Ny reddyn shoh ta eshyn gra, echey ta’n cliwe gyere lesh daa foyr;

¹³ Shione dou dty obbraghyn, as dty chummal, dy jarroo raad ta stoyl‐reill Noid‐ny‐hanmey; as t’ou lhiantyn shickyr gys m’ennym, as cha vel oo er n’obbal my chredjue, eer ayns ny laghyn shen ayndoo va Antipas my eanish firrinagh, v’er ny choyrt dy baase nyn mast’ eu, raad ta’n Drogh‐spyrryd cummal.

¹⁴ Agh ta red ennagh aym dt’oï, er‐yn‐oyr dy vel ayd ayns shen adsyn ta lhiantyn gys coyrle Balaam, dynsee Balak dy hoiaghey ribbey roish cloan Israel, dy ee reddyn v’er ny ouralley gys jallooyn, as dy chur rish maarderys.

¹⁵ Myr shen myrgeddin t’adsyn mayrt ta cummal credjue ny Nicolaitanee, red ta dwoaie aym er.

¹⁶ Gow arrys; er‐nonney hig‐ym hood dy tappee; as nee’m caggey nyn ’oï oc lesh cliwe my veeal.

¹⁷ Eshyn ta cleaysh echey, lhig eh clashtyn cre ta’n Spyrryd dy ghra rish ny kialteenyn. Dasyn ta geddyn yn varriaght ver‐yms dy ee jeh’n manna follit, as ver ym da clagh vane, as er y chlagh ennym noa scruit, nagh nione da dooinney erbee, agh eshyn ta dy gheddyn eh.

¹⁸ As gys ainle agglish Thyatira, scrieu, Ny reddyn shoh ta Mac Yee dy ghra, ny sooillyn echey ta myr lossey dy aile, as e chassyn goll rish prash sollys;

¹⁹ Shione dou dt’obbraghyn, as dty ghiastyllys, as dty hirveish, as dty chredjue, as dty hurranse, as dt’obbraghyn s’jerree dy ve ny share na’n toshiaght.

²⁰ Ny‐yeih, ta reddyn ennagh aym dy choyrt dty lieh, er‐y‐fa dy vel uss lhiggey da’n ven shen Jezebel, ta goaill urree dy ve ny adeyr, dy ynsaghey as dy chleayney my harvaantyn dy chur rish maarderys, as dy ghoaill commee ayns ny reddyn t’er ny ouralley gys jallooyn.

²¹ As hug mee traa jee dy ghoaill arrys jeh’n vaarderys eck, as cha ren ee arrys y ghoaill.

²² Cur‐my‐ner, tilg‐yms ee er lhiabbee, as adsyn ta brishey poosey mâree ayns seaghyn trome, mannagh gow ad arrys jeh nyn obbraghyn.

²³ As stroie‐ym yn chloan eck lesh baase; as bee fys ec ooilley ny kialteenyn dy nee mish eh ta ronsaghey ny meeaghyn as y cree: as ver‐yms da dagh unnane eu cordail rish nyn obbraghyn.

²⁴ Agh riuish ta mee gra, as rish y vooinjer elley ta ayns Thyatira, Whilleen as nagh vel yn ynsagh shoh oc, as nagh vel er doiggal croutyn dowiney yn Drogh spyrryd, myr jir ad, cha der ym erriu errey erbee sodjey.

²⁵ Agh cum‐jee shickyr shen ny t’eu hannah, derrey hig‐ym.

²⁶ As eshyn ta geddyn y varriaght, as freayll my obbraghyn gys y jerrey dasyn ver‐ym pooar harrish ny ashoonyn:

²⁷ (As nee eh reill ad lesh lorg‐reill dy yiarn: as myr siyn‐craie bee ad brisht ayns peeshyn) myr ta mish myrgeddin er gheddyn veih my Ayr.

²⁸ As ver‐ym dasyn rollage y voghrey.

²⁹ Eshyn ta cleaysh echey, lhig da clashtyn ny ta’n Spyrryd dy ghra rish ny kialteenyn.