Ashlish 18 - Yn Conaant Noa 1810

CAB. XVIII

¹ As lurg ny reddyn shoh honnick mee ainle elley cheet neose veih niau, lesh pooar niartal; as va’n seihll er ny hoilshean lesh e ghloyr.

² As deïe eh dy niartal lesh coraa lajer, gra, Ta’n Babylon yn ard‐valley mooar er duittym, er duittym, as er jeet dy ve ynnyd‐vaghee dy youyil, as cummal dy chooilley spyrryd neu‐ghlen, as edd son dy chooilley eean neu‐ghlen as eajee.

³ Son ta dy chooilley ashoon er n’iu jeh feeyn pyshoonagh e maarderys, as ta reeaghyn y theihll er n’yannoo maarderys r’ee, as ta marchanyn y theihll er n’aase berchagh trooid mooadys y rouanys eck.

⁴ As cheayll mee coraa elley veih niau, gra, Tar‐jee magh ass‐jee, my phobble, nagh bee shiu sheshaghyn mâree ayns e peccaghyn, as nagh gow shiu ayrn jeh’n kerraghey dewil eck.

⁵ Son ta e peccaghyn er roshtyn gys niau, as ta Jee er chooinnaghtyn er y vee‐chairys eck.

⁶ Jean‐jee ish y chooilleeney eer myr t’ee ish er chooilleeney shiuish, as cur‐jee dooble jee cordail rish ny obbraghyn eck; ayns y chappan t’ee er lhieeney, lhieen‐jee wheesh elley j’ee.

⁷ Corrym rish y stayd mooaralagh t’ee er ghoaill urree, as er veaghey ayns rouanys, yn corrymid cheddin dy cherraghey as dy heaghyn cur‐jee urree: son t’ee gra ayns e cree, Ta mee my hoie my ven‐reïn, as cha nee ben‐treoghe mee, as cha jig trimshey erbee my raad.

⁸ Shen‐y‐fa tuittee ny kerraghyn eck [urree] ayns un laa, baase, as dobberan, as gortey; as bee ee dy bollagh loght lesh aile: son niartal ta’n Chiarn Jee ta briwnys ee.

⁹ As nee reeaghyn y theihll ta er n’yannoo maarderys, as er veaghey dy rouanagh mâree, keayney, as dobberan er e son, tra hee ad jaagh y lostey eck.

¹⁰ Shassoo foddey jeh son aggle jeh’n torchagh eck, gra, Ah treih, treih, yn ard‐valley mooar shen Babylon, yn ard‐valley mooar lajer shen! son ayns un oor ta dty vriwnys er jeet.

¹¹ As nee marchanyn y theihll keayney as dobberan hrimshagh har’ee, son cha vel dooinney erbee kionnaghey yn varchantys eck arragh:

¹² Yn varchantys dy airh as dy argid, as dy chlaghyn costal, as pearlyn, as aanrit keyl, as purple, as sheeidey, as scarleod, as dy chooilley vonney dy fuygh millish, as dy chooilley horch dy hiyn ivory, as dy chooilley horch dy hiyn fuygh smoo costal, as dy phrash, as yiarn, as marble,

¹³ As cinnamon, as spiceyn millish, as myrrh, as frankincense, as feeyn, as ooil, as flooyr meen, as curnaght, as ollagh, as kirree, as cabbil, as fainee, as slaveyn, as anmeenyn deiney.

¹⁴ As ta ny messyn va yeearree dty chree orroo, er n’immeeaght voïd, as dy chooilley nhee va millish as mie, er n’immeeaght voïd, as t’ou rey roo son dy bragh.

¹⁵ As nee marchanyn ny reddyn shoh, va jeant berchagh lioree, shassoo foddey jeh, son aggle roish y torchagh eck, keayney as dobberan,

¹⁶ As gra, Treih, treih, yn ard‐valley mooar shen, va coamrit ayns aanrit keyl, as purple, as scarleod, as soit magh dy stooamey lesh airh, as claghyn costal, as pearlyn!

¹⁷ Son ayns un oor ta lheid y verchys vooar er lheïe ersooyl. As ren dy chooilley vainshter, as sheshaght lhuingey, as shiolteyryn, as ooilley ny va dellal er yn aarkey, shassoo foddey jeh,

¹⁸ As dyllee ad tra honnick ad jaagh yn lostey eck, gra, Cre’n ard‐valley ta casley rish yn ard‐valley mooar shoh?

¹⁹ As cheau ad joan er nyn ging, as deïe ad, lesh keayney as dobberan, gra, Ah treih, treih, yn ard‐valley mooar shen, ayn‐jee va jeant berchagh dy chooilley unnane va lhongyn oc er yn aarkey, liorish yn aght‐beaghee costyllagh eck! son ayns un oor t’ee er ny yannoo follym‐faase.

²⁰ Bee‐jee boggyssagh er‐e‐skyn, uss niau, as shiuish ostyllyn as phadeyryn casherick, son ta Jee er choyrt cooilleeney diu urree.

²¹ As hrog ainle niartal clagh casley rish clagh vooar wyllin, as cheau eh eh ’sy cheayn, gra, Er yn aght shoh lesh niart breeoil vees, yn ard‐valley mooar shen Babylon er ny hilgey sheese, as cha bee ee arragh ry‐gheddyn.

²² As cha bee kiaull claasey‐deryn, as fir‐chiaullee, as piperyn, as fir‐chayrnee, arragh er ny chlashtyn aynyd’s; as cha bee fir‐cheirdey jeh keird erbee, arragh ry gheddyn aynyd’s; as cha bee feiyr y chlagh‐wyllin ny smoo er ny chlashtyn aynyd’s.

²³ As cha jean soilshey cainleagh arragh soilshean aynyd; as cha bee coraa yn dooinney‐poosee ny yn ven‐phoosee arragh eddyr ry‐chlashtyn aynyd: son va ny marchanyn ayd’s deiney mooarey’n theihll; son liorish dty obbeeys va dy chooilley ashoon er ny volley:

²⁴ As ayn‐jee v’er ny gheddyn fuill phadeyryn, as nooghyn, as [yn uill] ocsyn ooilley v’er nyn ghunverys er y thalloo.