Ashlish 17 - Yn Conaant Noa 1810

CAB. XVII

¹ As haink fer jeh ny shiaght ainleyn va ny shiaght cappanyn oc, as ren eh taggloo rhym, gra, Tar ayns shoh, as jeeagh‐ym dhyt briwnys yn streebagh vooar, ta ny soie er ymmodee ushtaghyn:

² Mâree ta reeaghyn y theihll er n’yannoo maarderys, as ta cummaltee ny hooirey er ve er‐meshtey lesh feeyn e maarderys.

³ Er shen hug eh lesh mee liorish y spyrryd gys yn aasagh: as honnick mee ben ny soie er baagh scarleod, lane dy enmyn mollaghtagh, lesh shiaght king, as jeih eairkyn.

⁴ As va’n ven coamrit lesh purple, as scarleod, as soit magh dy stooamey lesh airh, as jewellyn costal, as pearlyn, lesh cappan airh ayns e laue, lane dy eajeeys, as broïd e maarderys.

⁵ As er glare yn eddin eck va ennym scruit, FOLLIAGHT, YN BABYLON MOOAR, MOIR STREEBEEYN AS REDDYN FEOHDOIL Y THEIHLL.

⁶ As honnick mee yn ven er‐meshtey lesh fuill ny nooghyn, as lesh fuill feanishyn Yeesey: as tra honnick mee ee, ghow mee yindys erskyn towse.

⁷ As dooyrt yn ainle rhym, Cre’n fa ghow oo yindys? Insh‐ym dhyt folliaght y ven as y baagh t’ee markiagh er, echey ta ny shiaght king as ny jeih eairkyn.

⁸ Yn veisht honnick oo, ta, as cha vel eh; as hed eh seose ass y diunid gyn‐grunt, as hed eh gys toyrt mow: as gowee cummaltee’n thallooin yindys (ny enmyn oc nagh row scruit ayns lioar y vea er‐dy hoshiaght y theihll) tra ver ad my‐ner yn veisht va, as nagh vel, as foast ta.

⁹ As ayns shoh ta’n aigney ta creenaght ayn. Ta ny shiaght king shiaght croink, orroo ta’n ven ny soie.

¹⁰ As ta ayn shiaght reeaghyn: ta queig er duittym, as ta fer shassoo, as cha vel y chiaghtoo foast er jeet; as tra hig eh shoh, shegin da tannaghtyn son earish ghiare.

¹¹ As y veisht va, as nagh vel, t’eh shoh dy jarroo yn hoghtoo, as t’eh jeh’n chiaght, as goll dys toyrt‐mow.

¹² As ta ny jeih eairkyn honnick oo, jeih reeaghyn, nagh vel foast er gheddyn reeriaght erbee; agh t’ad er gheddyn pooar myr reeaghyn son un oor marish y veisht.

¹³ T’ad shoh jeh’n un aigney, as livreyee ad nyn booar as nyn niart da’n veisht.

¹⁴ Nee ad shoh caggey noi yn Eayn as yiow’n Eayn barriaght orroo: son t’eshyn Chiarn dy hiarnyn, as Ree dy reeaghyn; as t’adsyn ta leshyn, er nyn eam, er nyn reih, as firrinagh.

¹⁵ As dooyrt eh rhym, Ta ny ushtaghyn honnick oo, raad ta’n streebagh ny soie, pobble, as earrooyn mooarey, as ashoonyn, as glaraghyn.

¹⁶ As ver ny jeih eairkyn honnick oo er y veisht, dwoaie da’n streebagh, as ver ad mow ee, as rooishtee ad ee, as nee ad gee yn eill eck, as loshtee ad ee lesh aile.

¹⁷ Son ta Jee er choyrt eh ayns ny creeaghyn oc dy chooilleeney e aigney, as dy choardail, as dy choyrt nyn reeriaght da’n veisht, derrey vees goan Yee er nyn gooilleeney.

¹⁸ As ta’n ven shen honnick oo, yn ard‐valley mooar shen ta reill harrish reeaghyn ny hooirey.