Ashlish 15 - Yn Conaant Noa 1810

CAB. XV

¹ As honnick mee cowrey elley ayns niau, mooar as mirrillagh, shiaght ainleyn as ny shiaght briwnyssyn s’jerree oc, son ayndoosyn t’er ny lhieeney seose jymmoose Yee.

² As honnick mee myr dy beagh eh faarkey dy ghless, lesh aile ny chione; as adsyn hooar y varriaght er y veisht, as er e yalloo, as er e chowrey, as er earroo yn ennym echey, nyn shassoo er yn aarkey dy ghless, lesh claasaghyn Yee [ayns nyn laue.]

³ As ghow ad arrane Voses sharvaant Yee, as arrane yn Eayn, gra, Mooar as mirrillagh ta dty obbraghyn, Hiarn Yee Ooilley‐niartal; cairagh as firrinagh ta dty raaidyn, uss Ree nooghyn.

⁴ Quoi eh nagh gow aggle royd, O Hiarn, as nagh jean dty ennym y ghloyraghey? son uss dty lomarcan ta casherick: son hig dy chooilley ashoon as ver ad ooashley kiongoyrt rhyt; son ta dty vriwnyssyn er ny hoilshaghey.

⁵ As ny lurg shen yeeagh mee, as cur‐my‐ner, va chiamble cabbane‐agglish y chonaant ayns niau er ny osley:

⁶ As haink ny shiaght ainleyn magh ass y chiamble, as ny shiaght kerraghyn oc, coamrit lesh aanrit glen as gial, as cryssyn airh mysh nyn mean.

⁷ As hug unnane jeh ny kiare creetooryn da ny shiaght ainleyn, shiaght siyn airhey lane jeh jymmoose Yee, ta bio son dy bragh as dy bragh.

⁸ As va’n chiamble er ny lhieeney lesh jaagh veih gloyr Yee, as veih e phooar; as cha row dooinney erbee abyl dy gholl stiagh ayns y chiamble, derrey va ny shiaght kerraghyn jeh ny shiaght ainleyn er nyn gooilleeney.