Ashlish 14 - Yn Conaant Noa 1810

CAB. XIV

¹ As yeeagh mee, as cur‐my‐ner, hass Eayn er cronk Sion, as mârish shiaght feed as kiare thousaneyn, lesh ennym e Ayrey scruit ayns glare nyn eddinyn.

² As cheayll mee coraa veih niau, myr sheean ymmodee ushtaghyn, as myr feiyr taarnagh mooar: as cheayll mee kiaull claaseydeyryn cloie er nyn glaasaghyn:

³ As ghow ad myr dy beagh eh arrane noa kiongoyrt rish y stoyl‐reeoil, as kiongoyrt rish ny kiare cretooryn bio, as y chanstyr: as cha dod dooinney erbee yn arrane shen y ynsaghey, agh y chiaght feed as kiare thousaneyn, v’er nyn veaysley veih broïd y theihll.

⁴ Shoh ad nagh row er n’yannoo peccah rish mraane; son moidynyn ad: shoh ad ta geiyrt da’n Eayn raad erbee dy jed eh: v’ad shoh er nyn gosney veih mastey deiney, myr va’d ny chied messyn da Jee as da’n Eayn.

⁵ As ayns nyn meeal cha row ry‐gheddyn foalsaght erbee: son t’ad gyn‐loght kiongoyrt rish stoyl‐reeoil Yee.

⁶ As honnick mee ainle elley getlagh trooid mean yn aer, as echey yn sushtal dy bragh farraghtyn dy phreacheil dauesyn ta cummal er y thalloo, as da dy chooilley ashoon, as kynney, as glare, as pobble,

⁷ Gra lesh ard‐choraa, Gow‐jee aggle roish Jee, as cur‐jee gloyr da; son ta oor y vriwnys echey er jeet: as cur jee ooashley dasyn chroo niau as thalloo, as yn aarkey, as ny farraneyn ushtey.

⁸ As haink geiyrt er ainle elley, gra, Ta Babylon er duittym, er duittym, yn ard‐valley mooar shen, son dy dug ee er dy chooilley ashoon dy iu jeh feeyn yn vaarderys eck.

⁹ As hie yn trass ainle geiyrt orroosyn, gra lesh ard‐choraa, My ver dooinney erbee ooashley da’n veisht, as da’n jalloo echey, as dy gow eh yn cowrey echey er glare e eddin, ny er e laue,

¹⁰ Nee’n fer cheddin giu jeh feeyn corree Yee, er ny lhieeney da gyn meenaghey dy vyghin, ayns cappan e yymmoose; as bee eh er ny horchaghey lesh aile as brimstone, kionfenish ny ainleyn casherick, as kiongoyrt rish yn Eayn:

¹¹ As ta jaagh yn torchagh oc goll seose son dy bragh as dy bragh: as cha vel fea oc oie ny laa, ta ooashlaghey yn veisht, as e yalloo, ny ocsyn ta goaill orroo cowrey e ennym.

¹² Ayns shoh ta meenid ny nooghyn; shoh’n raad t’adsyn ta cur tastey da annaghyn Yee, as da credjue Yeesey.

¹³ As cheayll mee coraa veih niau, gra rhym, Scrieu, Veih shoh magh, bannit ta ny merriu ta geddyn baase ayns y Chiarn: Dy jarroo myr shen ta’n Spyrryd dy ghra, son t’ad ec fea veih nyn seaghyn; as ta nyn obbraghyn geiyrt daue.

¹⁴ As yeeagh mee, as cur‐my‐nêr, bodjal gial, as er y vodjal hoie fer, goll‐rish y Mac dooinney, lesh attey dy airh er e chione, as corran gyere ayns e laue.

¹⁵ As haink ainle elley ass y chiamble, geamagh lesh ard‐choraa dasyn va ny hoie er y vodjal, Cur fo dty chorran, as buinn: son ta dty hraa beayney er jeet; son ta fouyr y thallooin creen.

¹⁶ As hug eshyn va ny hoie er y vodjal e chorran gys y thalloo; as va’n thalloo er ny vuinn.

¹⁷ As haink ainle elley ass y chiamble t’ayns niau, lesh corran gyere myrgeddin.

¹⁸ As haink ainle elley veih’n altar, va pooar echey harrish aile; as deïe eh lesh ard‐choraa dasyn va’n corran gyere echey, gra, Cur fo dty chorran gyere, as buinn dossyn billey‐feeyney’n thallooin; son ta’n mess eck slane appee.

¹⁹ As hug yn aile e chorran er y thalloo, as hymsee eh billey‐feeyney’n thalloo, as cheau eh eh ayns y phress mooar feeyney dy yymmoose Yee.

²⁰ As va’n press‐feeyney stampit cheu‐mooie jeh’n ard‐valley, as ren fuill ass y phress‐feeyney, roshtyn gys eer streeanyn gabbyl, son daa cheead meeilley.