Ashlish 13 - Yn Conaant Noa 1810

CAB. XIII

¹ As hass mee er genniagh ny marrey, as honnick mee beisht troggal ass yn aarkey, lesh shiaght king, as jeih eairkyn, as er e eairkyn jeih attaghyn, as er ny king echey va enmyn mollaghtagh.

² As va’n veisht honnick mee goll rish leopard, as va ny cassyn echey myr cassyn bear, as e veeal myr beeal lion: as hug y dragon e phooar da as e stoyl, as reill mooar.

³ As honnick mee unnane jeh ny king echey, myr dy beagh eh guint dy baase; as va’n lhot baaish echey er ny lheihys: as hie ooilley’n seihll ayns yindys geiyrt er y vaagh.

⁴ As hug ad ooashley da’n dragon hug pooar da’n veisht: as hug ad ooashley da’n veisht, gra, Quoi ta goll‐rish y veisht? quoi oddys caggey n’oï?

⁵ As va beeal er ny choyrt da, loayrt reddyn mooaralagh as mollaghtagh; as va pooar echey dy hannaghtyn daa vee as da‐eed.

⁶ As doshil eh e veeal ayns goan‐mollaghtagh noi Jee, dy oltooaney e ennym, as e chabbane‐agglish, as noi cummaltee niau.

⁷ As va pooar er ny choyrt da dy chaggey noi ny nooghyn, as dy gheddyn yn varriaght orroo: as va pooar er ny choyrt da harrish dy chooilley chynney, as glare, as ashoon.

⁸ As ver ooilley cummaltee yn theihll ooashley da, nyn enmyn nagh vel scruit ayns lioar bea yn Eayn er ny varroo er‐dy hoshiaght y theihll.

⁹ My ta cleaysh ec dooinney erbee, lhig da clashtyn.

¹⁰ Eshyn ta leeideil gys cappeeys, hed [eh hene] gys cappeeys: Eshyn ta marroo lesh y chliwe, bee eh er ny varroo lesh y chliwe. Ayns shoh ta meenid as credjue ny nooghyn.

¹¹ As hug mee my‐ner beisht elley troggal ass y thalloo, as va daa eairk echey goll‐rish eayn, as loayr eh myr dragon.

¹² As t’eh goaill er ooilley pooar yn chied veisht va roish; as t’eh cur er y theihll, as ny cummaltee echey, dy choyrt ooashley da’n chied veisht, yn lhot baaish echey v’er ny lheihys.

¹³ As t’eh jannoo yindyssyn mooarey, myr shen dy vel eh cur er aile dy heet neose veih’n aer er y thalloo, ayns shilley deiney,

¹⁴ As t’eh molley adsyn ta cummal er y thalloo, liorish ny mirrillyn shen va pooar echey dy yannoo ayns shilley’n veisht, gra rish cummaltee’n thallooin dy yannoo jalloo da’n veisht va lhottit liorish y chliwe, as va bio.

¹⁵ As va pooar echey dy choyrt bioys da jalloo yn veisht, dy jinnagh jalloo yn veish e chammah loayrt, as cur er whilleen as nagh jinnagh ooashley da jalloo yn veisht dy ve er nyn goyrt dy baase.

¹⁶ As t’eh cur er ooilley chammah beg as mooar, berchagh as boght, seyr as ayns bondiaght, dy ve cowrit ayns nyn laue‐yesh, ny ayns glare nyn eddin:

¹⁷ As nagh voddagh dooinney erbee kionnaghey ny creck, agh eshyn va cowrey, ny ennym y veisht er, ny earroo yn ennym echey.

¹⁸ Ayns shoh ta creenaght. Lhig dasyn ta tushtey echey coontey earroo yn veisht; son earroo dooinney eh; as ta’n earroo echey shey cheead three‐feed as shey.