Ashlish 1 - Yn Conaant Noa 1810

CAB. I

¹ Ashlish Yeesey Creest, hug Jee da, dy hoilshaghey da e harvaantyn reddyn shegin dy gerrit cheet gys kione; as ren eh shoh y choyrt as y chowraghey liorish ainle da e harvaant Ean:

² Ren gymmyrkey feanish gys goo Yee, as recortys Yeesey Creest, as jeh dy chooilley nhee honnick eh.

³ Bannit ta eshyn ta lhaih, as adsyn ta clashtyn goan y phadeyrys shoh, as freayll ny reddyn shen ta scruit ayn: son ta’n traa er‐gerrey.

⁴ Ean gys ny shiaght kialteenyn t’ayns Asia: Grayse dy row hiu, as shee, veihsyn, ta, as va, as ta ry heet: as veih ny shiaght spyrrydyn ta kiongoyrt rish e stoyl‐reeoil.

⁵ As veih Yeesey Creest, yn feanish firrinagh, as y chied‐er‐ny‐ruggey veih ny merriu, as prince reeaghyn y thallooin: Huggeysyn va graihagh orrin, as ren shinyn y niee veih nyn beccaghyn ayns yn uill echey hene.

⁶ As ta er n’yannoo shin reeaghyn as saggyrtyn gys Jee as e Ayr; dasyn dy row gloyr as reill son dy bragh as dy bragh. Amen.

⁷ Cur‐my‐ner, t’eh cheet lesh bodjallyn; as hee dy chooilley hooill eh, as adsyn myrgeddin ren eh y hoylley: as nee ooilley kynneeyn y thallooin dobberan kyndagh rish: myr shen dy row, Amen.

⁸ Mish Alpha as Omega, yn toshiaght as y jerrey, ta’n Chiarn dy ghra, ta, as va, as ta dy heet, yn Ooilley‐niartal.

⁹ Mish Ean, ta myrgeddin nyn mraar, as sheshey ayns seaghyn, as ayns reeriaght as surranse Yeesey Creest, va mee ayns yn ellan, ta enmyssit Patmos, er graih goo Yee, as son recortys Yeesey Creest.

¹⁰ Va mee ayns y Spyrryd er laa yn Chiarn, as cheayll mee my chooyl coraa ard, myr jeh cayrn.

¹¹ Gra, Mish Alpha as Omega, yn chied er as y fer s’jerree: as, Shen t’ou dy akin, scrieu ayns lioar, as cur eh gys ny shiaght kialteenyn ta ayns Asia; gys Ephesus, as gys Smyrna, as gys Pergamos, as gys Thyatira, as gys Sardis, as gys Philadelphia, as gys Laodicea.

¹² As hyndaa mee dy akin cre voish haink y coraa ren loayrt rhym. As tra va mee er jyndaa, honnick mee shiaght cainleyryn dy airh:

¹³ As ayns mean ny shiaght cainleyryn, fer goll‐rish yn Mac dooinney, coamrit lesh garmad sheese gys ny cassyn, as kianlt mysh e chleeau lesh cryss dy airh.

¹⁴ Va e chione as e olt bane myr ollan, cha gial as sniaghtey; as va e hooillyn myr lossey dy aile;

¹⁵ As e chassyn goll‐rish prash sollys, myr dy beagh ad lheie ayns coirrey; as e choraa myr sheean ymmodee ushtaghyn.

¹⁶ As va echey ayns e laue yesh shiaght rollageyn: as magh ass e veeal haink cliwe geyre lesh daa foyr: as va e eddin myr y ghrian tra t’eh soilshean ayns e niart.

¹⁷ As tra honnick mee eh, huitt mee sheese ec e chassyn myr marroo: as hug eh e laue‐yesh orrym, gra rhym, Ny bee aggle ort; Mish y chied er as y fer s’jerree.

¹⁸ Mish eh ta bio, as va marroo; as cur‐my‐ner ta mee bio er son dy bragh, Amen; as ta aym ogheryn niurin as baase.

¹⁹ Scrieu ny reddyn t’ou er vakin, as ny reddyn ta, as ny reddyn vees ny yeï shoh,

²⁰ Folliaght ny shiaght rollageyn honnick oo ayns my laue‐yesh, as ny shiaght cainleyryn dy airh. Ta ny shiaght rollageyn ainleyn ny shiaght kialteenyn: as ny shiaght cainleyryn honnick oo, t’ad ny shiaght kialteenyn.