3 Ean 1 - Yn Conaant Noa 1810

¹ Yn ostyl shinney gys my charrey graihagh Gaius, shynney lhiam ayns yn irriney.

² Charrey, ta mee guee erskyn dy chooilley nhee dy jean uss bishaghey, as ve ayns slaynt, dy jarroo myr ta dt’annym bishaghey.

³ Son s’mooar va my voggey, tra haink ny braaraghyn as hoilshee ad dou mychione yn ynrickys t’aynyd’s, dy jarroo myr t’ou gimmeeaght ayns yn irriney.

⁴ Cha vel boggey smoo aym na dy chlashtyn dy vel my chloan gimmeeaght ayns yn irriney.

⁵ Charrey, t’ou jannoo dy credjuagh cre‐erbee t’ou jannoo son ny braaraghyn, as son joarreeyn;

⁶ T’er n’ymmyrkey feanish jeh dty ghiastyllys kiongoyrt rish yn agglish: ad my ver oo er nyn doshiaght er nyn yurnah lurg aght creestee, nee oo dy mie:

⁷ Er‐yn‐oyr dy nee er graih yn ennym echeysyn hie ad magh, fegooish goaill veg veih ny Ashoonee.

⁸ Shen‐y‐fa lhisagh shin oltaghey‐bea ’choyrt da nyn lheid, dy vod mayd ve fir‐choonee gys yn irriney.

⁹ Scrieu mee gys yn agglish: agh Diotrophes, va shêgin er yn ard‐reill nyn mast oc, cha ren eh soiagh j’in.

¹⁰ Shen‐y‐fa, my hig‐ym, cooin ym er e obbraghyn t’eh dy yannoo, loayrt nyn ’oï lesh goan oltooanagh: as gyn ve booiagh lesh shoh, chamoo t’eh hene coyrt oltaghey‐bea da ny braaraghyn, agh t’eh dy lhiettal adsyn bailliu ve giastyllagh, as giarey ad magh veih’n agglish.

¹¹ Charrey, ny eiyr er yn olk, agh er shen ta mie. Eshyn ta jannoo mie, t’eh jeh Jee: agh eshyn ta jannoo olk, cha vel eh er vakin Jee.

¹² Ta goo mie ec Demetrius veih dy chooilley ghooinney, as veih’n irriney hene: dy jarroo, as ta shinyn myrgeddin gymmyrkey feanish, as ta fys eu dy vel y feanish ainyn firrinagh.

¹³ Va ymmodee reddyn aym dy scrieu, agh cha jean‐ym lesh ink as pen scrieu hood:

¹⁴ Agh ta mee treishteil dy vaik ym oo dy gerrit, as dy loayr mayd eddin ry eddin. Shee dy row hood. Ta nyn gaarjyn coyrt bea as slaynt hood. Cur my vannaght gys ny caarjyn [creestee] da dagh unnane er‐lheh.