2 Timothy 2 - Yn Conaant Noa 1810

CAB. II

¹ Bee uss er‐y‐fa shen, my vac, niartal ayns y ghrayse ta ayns Creest Yeesey.

² As ny reddyn t’ou er chlashtyn voym’s roish ymmodee feanishyn, cur uss ayns treishteil deiney firrinagh, vees fondagh dy ynsaghey feallagh elley myrgeddin.

³ Jean uss er‐y‐fa shen creoghys y hurranse, myr sidoor dunnal dy Yeesey Creest.

⁴ Cha vel dooinney‐caggee erbee dy chiangley eh hene gys cooishyn erbee seihlltagh [elley;] dy vod eh eshyn y wooiys ta er reih eh dy ve ny hidoor.

⁵ As my ta dooinney erbee myrgeddin gleck son y varriaght, cha vel eh ny‐yeih dy gheddyn yn attey, mannagh vel eh gleck dy lowal.

⁶ Shegin da’n eirrinagh laboragh roish my vow eh soylley ny messyn.

⁷ Gow dy dowin gys dty chree ny ta mee gra; as dy der y Chiarn tushtey dhyt ayns dy chooilley nhee.

⁸ Cooinee dy row Yeesey Creest jeh sluight Ghavid, troggit veih ny merriu cordail rish my hushtal:

⁹ Er y hon ta mee gymmyrkey seaghyn myr drogh‐yantagh, dy jarroo gys geulaghyn; agh cha vel goo Yee kianlt.

¹⁰ Shen‐y‐fa ta mee surranse dy chooilley nhee er graih yn chloan reiht, dy vod adsyn neesht yn saualtys t’ayns Creest Yeesey y gheddyn, marish gloyr dy bragh beayn.

¹¹ Te raa firrinagh. Son my ta shin er ve marroo mârish, bee mayd myrgeddin bio mârish:

¹² My ta shin surranse, nee mayd myrgeddin reill mârish: my ta shin dy obbal eh, nee eshyn myrgeddin shinyn y obbal.

¹³ My ta shin neu‐firrinagh [dasyn], ny‐yeih t’eshyn tannaghtyn firrinagh; cha vod eh eh‐hene y obbal.

¹⁴ Jeh ny reddyn shoh cur ad ayns cooinaghtyn, coyrt currym orroo kiongoyrt rish y Chiarn, nagh streeu ad mysh focklyn nagh vel gys veg yn ymmyd, agh dy choyrt sleih fo‐my‐cheilley.

¹⁵ Bee uss imneagh dy phrowal oo hene firrinagh gys Jee, obbree nagh lhiass nearey ’ghoaill, rheynn dy kiart yn goo dy ynrickys.

¹⁶ Agh chea veih glare mee‐chrauee as fardalagh; son hed ad er nyn doshiaght gys mee‐chraueeaght smoo.

¹⁷ As nee’n ghlare oc gee myr cankyr: lheid shoh ta Hymeneus, as Philetus;

¹⁸ Ta er n’gholl er‐shaghryn veih’n irriney, gra, Dy vel yn irree seose‐reesht veih ny merriu hannah harrish; as [liorish shoh] lhaggaghey credjue paart dy leih.

¹⁹ Ny‐yeih, ta undin Yee shassoo shickyr, sealit lesh y cowrey shoh, Shione da’n Chiarn e vooinjer hene. As, Lhig da dy chooilley unnane ta genmys ennym Chreest chea veih mee‐chraueeaght.

²⁰ Agh ayns thie mooar cha vel ny lomarcan siyn airh, as argid, agh myrgeddin siyn fuygh, as cray; as paart son ooashley, as paart son mee‐ooashley.

²¹ My nee dooinney er‐y‐fa shen freayll eh hene seyr voue shoh, bee eh ny haagh son ooashley, casherick, as cooie son ymmyd y vainshter, as aarloo cour dy chooilley obbyr vie.

²² Chea myrgeddin veih yeearreeyn yn aegid: agh eiyr da ynrickys, credjue, graih, [as] shee, mâroosyn ta geamagh er y Chiarn ass cree glen.

²³ Agh questionyn ommijagh, as giare‐cheeayllagh cur voïd, myr ta fys ayd dy vel ad doostey streeu.

²⁴ As cha nhegin da sharvaant y Chiarn ve streeuagh: agh ve meen rish dy chooilley ghooinney, aarloo dy ynsaghey, surransagh.

²⁵ Ayns meenid gynsageey adsyn ta shassoo magh; my saillish Jee arrys y chur daue gys goaill‐rish yn irriney;

²⁶ As dy vod ad feaysley ad hene ass ribbey yn drogh‐spyrryd, ta goit nyn gappee liorishyn ec e aigney.