2 Thessalonianee 2 - Yn Conaant Noa 1810

CAB. II

¹ Nish ta shin guee erriu, vraaraghyn, liorish cheet nyn Jiarn Yeesey Creest, as liorish yn chaglym cooidjagh ainyn huggeysyn,

² Nagh bee shiu dy leah er nyn lhaggaghey ayns aigney, ny seaghnit, chamoo liorish spyrryd, ny goo, ny liorish screeuyn, myr voïnyn, myr dy beagh laa Chreest, er‐gerrey.

³ Ny lhig da dooinney erbee liorish saaseyn erbee shiu y volley: son cha jig y laa shen mannagh jig hoshiaght tuittym ersooyl [veih’n chredjue], as dy bee’n dooinney shen dy pheccah er ny hoilshaghey, yn mac dy hoyrt‐mow;

⁴ Quoi ta soiaghey eh hene seose noi, as troggal eh hene erskyn ooilley ny ta enmyssit Jee, ny ta er ny ooashlaghey; myr shen dy vel eshyn myr Jee soie ayns chiamble Yee, goaill er hene dy ve Jee.

⁵ Nagh vel cooinaghtyn en, tra va mee foast mêriu, dy dinsh mee diu ny reddyn shoh?

⁶ As nish ta fys eu cre ta dy lhiettal eh dy ve er ny hoilshaghey ayns y traa echey hene.

⁷ Son ta’n folliaght dy vee‐chraueeaght hannah gobbraghey; agh eshyn ta nish lhiettal, [nee eh lhiettal] derrey vees eh goit ass y raad.

⁸ As eisht vees y fer peccoil shen er ny hoilshaghey, eh nee’n Chiarn y choyrt mow liorish ennal e veeal, as stroie lesh soilshey gloyroil y cheet echey:

⁹ Dy jarroo eshyn ta’n cheet echey cordail rish gobbraghey Satan, lesh dy chooilley phooar, as cowraghyn, as yindyssyn breagagh,

¹⁰ As lesh dy chooilley oalsaght dy neu‐ynrickys, ayndoosyn ta cherraghtyn; er‐yn‐oyr nagh ghow ad rish graih yn ynrickys, dy voddagh ad ve er nyn sauail.

¹¹ As er‐yn‐oyr shoh ver Jee huc cleayn lajer, dy jinnagh ad breg y chredjal:

¹² Dy voddagh adsyn ooilley ve deyrit nagh ren credjal yn irriney, agh va taitnys oc ayns neu‐ynrickys.

¹³ Agh ta shin kianlt dy chur booise kinjagh da Jee er nyn son, vraaraghyn, graihagh ayns y Chiarn son dy vel Jee er‐dyn toshiaght er reih shiu gys saualtys, trooid casherickys y Spyrryd, as credjue jeh’n irriney:

¹⁴ Huggey deïe eh erriu liorish y sushtal ainyn, gys cosney gloyr nyn Jiarn Yeesey Creest.

¹⁵ Shen‐y‐fa, vraaraghyn, shass‐jee shickyr, as cum‐jee gys ny oardaghyn ta shiu er n’ynsaghey, lhig eh ve liorish goan, ny’n screeuyn ain.

¹⁶ Nish dy jean y Chiarn Yeesey Creest hene, as Jee dy jarroo nyn Ayr, t’er ny ve graihagh orrin, as er choyrt dooin gerjagh dy bragh farraghtyn, as treishteil mie, trooid grayse,

¹⁷ Dy gerjee eh [ta mee gra] ny creeaghyn eu, as dy niartee eh shiu ayns dy chooilley ghoo as obbyr vie.