2 Peddyr 3 - Yn Conaant Noa 1810

CAB. III

¹ Yn nah screeuyn shoh, chaarjyn graihagh, ta mee nish scrieu hiuish; ayndoo ny neesht ta mee greinnaghey ny aignaghyn ynrick eu gys cooinaghtyn:

² Dy vod shiu freayll ayns nyn aigney ny goan v’er nyn loayrt roish nish liorish ny phadeyryn casherick, as yn oardagh ainyn ostyllyn y Chiarn as Saultagh:

³ Toiggal shoh hoshiaght, dy jig ayns ny laghyn s’jerree craidoilee, gimmeeaght lurg ny sayntyn oc hene,

⁴ As gra, Cre vel gialdyn y cheet echey? son er‐dyn traa huitt ny ayraghyn nyn gadley, ta dy chooilley nhee tannaghtyn myr v’ad er‐dy hoshiaght y chroo.

⁵ Son shoh t’ad dy aignagh mee‐hushtagh jeh, dy nee liorish goo Yee va ny niaughyn ec y toshiaght, as yn thalloo shassoo erskyn yn ushtey, as fo’n ushtey.

⁶ Liorish va seihll yn traa shen, coodit lesh thooilley dy ushtey, er ny stroie.

⁷ Agh ta ny niaughyn as yn thalloo t’ayn nish, liorish y goo cheddin freilt ayns stoyr, kiarit son yn aile ry‐hoi laa ny briwnys, as toyrt‐mow deiney mee‐chrauee.

⁸ Agh, toig‐jee shoh my chaarjyn, dy vel un laa marish y Chiarn myr thousane bleïn, as thousane bleïn myr un laa.

⁹ Cha vel y Chiarn moal mychione e ghialdynys, (myr ta paart dy gheiney coontey meillid) agh jeh surranse‐foddey dooinyn, neu‐wooaiagh dy jinnagh unnane erbee cherraghtyn, agh dy darragh ooilley gys arrys.

¹⁰ Agh hig laa yn Chiarn myr maarliagh ’syn oie; tra nee ny niaughyn cherraghtyn lesh feiyr atchimagh, as nee stoo yn theihll lheïe lesh chiass loshtee bee’n thalloo shoh hene myrgeddin as ny obbraghyn t’ayn er nyn lostey seose.

¹¹ Fakin eisht dy jean ooilley ny reddyn shoh lheïe ersooyl, cre’n sorch dy phersoonyn lhisagh shiuish y ve ayns dy chooilley ymmyrkey crauee as casherickys!

¹² Farkiagh son, as kiartaghey shiu hene ry‐hoi cheet laa Yee, tra vees yn aer er ny stroie lesh aile, as stoo yn theihll lheïe lesh chiass aileagh.

¹³ Agh ta shinyn, cordail rish e ghialdyn, jeeaghyn son niaughyn noa as seihll noa, ayndoo ta ynrickys cummal.

¹⁴ Shen‐y‐fa, chaarjyn, fakin dy vel shiu jerkal rish lheid ny reddyn, bee‐jee imneagh dy bee shiu er nyn gheddyn liorishyn ayns shee, fegooish foill, as gyn loght.

¹⁵ As smooinee‐jee dy vel surranse‐foddey nyn Jiarn saualtys; dy jarroo myr ta nyn mraar graihagh Paul myrgeddin, cordail rish y chreenaght er ny choyrt da, er scrieu hiu;

¹⁶ Myr t’eh myrgeddin ayns ooilley ny screeunyn echey, loayrt ayndoo jeh ny reddyn shoh: nyn mast’ oc ta paart jeu doillee dy ve er nyn doiggal, t’adsyn ta mee‐hushtagh as lhag‐chredjuagh cassey, myr t’ad myrgeddin ny scriptyryn elley, gys y toyrt‐mow oc hene.

¹⁷ Fakin er‐y‐fa shen, chaarjyn, dy vel fys eu er ny reddyn shoh ro‐laue, cur‐jee twoaie nagh jean shiuish myrgeddin, cleaynit lesh shaghrynys ny mee‐chrauee, tuittym ersooyl veih’n shickyrys eu ’sy chredjue.

¹⁸ Agh aase‐jee ayns grayse, as ayns tushtey nyn Jiarn as Saualtagh Yeesey Creest: Huggeysyn dy row gloyr chammah nish as dy bragh. Amen.