2 Ean 1 - Yn Conaant Noa 1810

¹ Yn ostyl shinney gys y lady ooasle, as e cloan, shynney lhiam ayns yn irriney; as cha nee mish my lomarcan, agh myrgeddin adsyn ooilley ta toiggal oc jeh’n irriney;

² Er graih yn irriney ta beaghey aynin, as vees mârin son dy bragh:

³ Grayse dy row mêriu, myghin as shee veih Jee yn Ayr, as veih’n Chiarn Yeesey Creest, Mac yn Ayr, ayns ynrickys as graih.

⁴ S’mooar va my voggey, dy dooar mee [paart] jeh dty chloan, gimmeeaght ’syn irriney, myr ta shin, er gheddyn sarey veih’n Ayr.

⁵ As nish ta mee guee ort, lady, cha nee myr dy beign scrieu hood anney noa, agh shen ny v’ain veih’n toshiaght, dy der mayd graih yn derrey yeh da’n jeh elley.

⁶ As shoh’n ghraih, dy jean mayd gimmeeaght cordail rish e annaghyn. Shoh’n anney, myr ta shiu er chlashtyn veih’n toshiaght, dy lhisagh shiu gimmeeaght ayn.

⁷ Son ta ymmodee molteyryn er n’gholl magh fud y theihll, nagh vel goaill‐rish dy vel Yeesey Creest er jeet ayns yn eill. Shoh eh ta ny volteyr, as yn an‐chreestee.

⁸ Jeeagh‐jee diu hene nagh gaill mayd ny reddyn shen ta shin er chosney, agh dy vow mayd slane leagh.

⁹ Quoi‐erbee ta treigeil, as nagh vel tannaghtyn ayns ynsagh Chreest, cha vel Jee echey: eshyn ta tannaghtyn ayns ynsagh Chreest, t’echey chammah yn Ayr, as y Mac.

¹⁰ My hig fer erbee hiu, as nagh vel cur lesh mârish yn ynsagh shoh, ny cur‐jee room thie da, chamoo bannee‐jee da.

¹¹ Son eshyn ta goltaghey da, t’eh paarteeas mârish ayns e ghrogh‐yannoo.

¹² Myr va ymmodee reddyn aym dy scrieu hiu, cha jinnin ad lesh paper as ink; agh ta mee treishteil dy heet hiu, as dy loayrt riu eddin ry eddin, dy vod y boggey ain ve jeant magh.

¹³ Ta cloan dty huyr reiht cur bea as slaynt hood. Amen.