2 Corinthianee 9 - Yn Conaant Noa 1810

CAB. IX

¹ Nish mychione shirveish er ny nooghyn, cha lhiass dou scrieu hiu.

² Son ta fys aym er arryltys nyn aigney, jeh shen ta mee boggyssagh roosyn ta jeh Macedonia, dy row Achaia aarloo blein er‐dy‐henney; as ta’n ghraih jeean euish er ghreinnaghey ymmodee.

³ Ny‐yeih hug mee ny braaraghyn hiu, er‐aggle dy beagh yn voggyssagh ain jiuish ayns fardail ayns y chooish shoh; dy voddagh shiu, myr dooyrt mee, ve aarloo:

⁴ Er‐aggle my hig adsyn jeh Macedonia mârym, as shiuish y gheddyn ergooyl dy beagh shinyn (cha nee dy ghra shiuish) naarit son y voggyssagh daaney shoh.

⁵ Er shoh yeeagh mee er dy ve ymmyrchagh dy choyrlaghey ny braaraghyn, dy gholl hiu ro‐laue, as ny toyrtyssyn eu y chur cooidjagh, jeh shoh va raaue eu roïe, dy voddagh yn chooid cheddin ve aarloo, myr toyrtys aggindagh, as cha nee myr êginit.

⁶ As shoh ta mee dy ghra, Eshyn ta cuirr thanney, nee myrgeddin buinn thanney: as eshyn ta cuirr dy palchey, nee myrgeddin buinn dy palchey.

⁷ Lhig da dy chooilley ghooinney coyrt da’u voght, myr ta e chree coyrt roish; cha nee mooaraghey, ny myr dy beagh eh êginit huggey: son shynney lesh Jee eshyn ta coyrt dy aggindagh.

⁸ As ta Jee abyl dy chur er dy chooilley ghrayse bishaghey diu; ayns slane sonnys eu jeh dy chooilley nhee, dy vod shiu bishaghey ayns dy chooilley obbyr vie:

⁹ (Myr te scruit, T’eh er skeayley dy lhean; t’eh er choyrt da ny boghtyn: ta e chairys farraghtyn son dy bragh.

¹⁰ Nish dy jean eshyn ta shirveish rass er y chorreyder, chammah shirveish arran son nyn meaghey, as bishaghey nyn arroo‐correy, as cur er‐ash mess yn feoiltys eu)

¹¹ Dy palchey er nyn yannoo magh ayns dy chooilley nhee gys dy chooilley feoiltys, ta coyrt oyr booise gys Jee er y choontey ainyn.

¹² Son cha vel shirveish y ghiastyllys shoh ny lomarcan jannoo feaysley er ymmyrch ny nooghyn, agh te coyrt er y hoshiaght myrgeddin mooarane booise gys Jee;

¹³ Tra liorish cowrey’n ghiastyllys shoh t’ad gloyraghey Jee son y viallys foshlit euish gys sushtal Chreest, as son y toyrtys feoilt eu daue hene, as da dy chooilley ghooinney)

¹⁴ As liorish ny padjeryn ocsyn er nyn son, myr t’ad goaill foddeeaght ny lurg eu er coontey ard ghrayse Yee ayndiu,

¹⁵ Booise dy row gys Jee son e ghioot erskyn‐insh.