2 Corinthianee 8 - Yn Conaant Noa 1810

CAB. VIII

¹ Ta shin myrgeddin, vraaraghyn, soilshaghey diu grayse Yee v’er ny hirveish ayns kialteenyn Macedonia:

² Kys fo prowal gyere dy heaghyn, ren yrjid y voggey oc, as nyn moghtynid hrome, bishaghey gys berchys nyn ghiastyllys.

³ Son gys rere nyn booar (ta mee gymmyrkey feanish) dy jarroo, as erskyn ny va fort oc, v’ad arryltagh jeu hene:

⁴ Guee orrin dy jeean, dy jinnagh shin soiaghey jeh’n gioot, as goaill orrin yn currym dy rheynn eh er ny nooghyn.

⁵ As shoh ren ad, cha nee myr va shin jerkal rish, agh hoshiaght heb ad ad‐hene gys y Chiarn, as hooinyn liorish aigney Yee.

⁶ Ayns wheesh as dy ren shin geearree er Titus, myr v’eh er n’yannoo toshiaght, dy jinnagh eh neesht goll trooid lesh y ghiastyllys cheddin ny vud eu.

⁷ Shen‐y‐fa myr ta shiu jeant magh ayns dy chooilley nhee, ayns credjue, ayns goan, as tushtey, as ayns dy chooilley chiarail, as ayns nyn ghraih er nyn son; jeeagh‐jee dy jean shiu bishaghey ayns y grayse shoh myrgeddin.

⁸ Cha vel mee loayrt liorish sarey, agh er coontey arryltys feallagh elley, as dy phrowal firrinys yn ghraih euish.

⁹ Son shione diu grayse nyn Jiarn Yeesey Chreest, ga dy row eh berchagh, ny‐yeih er y ghraih euish ghow eh er dy ve boght, trooid y voghtynid echeysyn dy voddagh shiuish ve jeant berchagh.

¹⁰ As ayns shoh ta mee coyrt my choyrle: son ta shoh son y goo mie euish, t’er n’yannoo toshiaght ro‐laue, cha nee ny lomarcan dy yannoo, agh myrgeddin dy ve arryltagh blein er‐dy‐henney.

¹¹ Nish er‐y‐fa shen cur‐jee mullagh er yn obbyr; myr va aigney arryltagh eu, dy vod shen myrgeddin ve jeant mie ass shen ny ta fo nyn rere.

¹² Son my ta’n aigney hoshiaght arryltagh, ta soiagh jeant jeh cordail rish fort y dooinney, as cha nee cordail rish shen nagh vel echey.

¹³ Son cha vel mee cheet er liorish shoh dy lhiggey lesh feallagh elley, as shiuish ve laadit:

¹⁴ Agh liorish corrymid, ec y traa t’ayn nish dy vod yn phalchey euish jannoo feaysley er y feme ocsyn, as dy vod yn phalchey ocsyn myrgeddin jannoo feaysley er y feme euish, dy vod yn errey ve co‐trome,

¹⁵ Myr te scruit, Eshyn ren chaglym mooarane, cha row veg smoo echey; as eshyn ren chaglym kuse fardalagh, cha row laccal er.

¹⁶ Agh booise dy row gys Jee, hug yn chiarail jeean cheddin ayns cree Titus er nyn son.

¹⁷ Son dy jarroo ghow eh yn choyrle, agh myr v’eh hene ny s’arryltee, hie eh hiu jeh ’aigney hene.

¹⁸ As ta shin er choyrt mârish yn braar, ta’n moylley echey ayns y sushtal, mastey ooilley ny kialteenyn:

¹⁹ (As cha nee ynrycan shen, agh v’eh myrgeddin er ny reih liorish ny kialteenyn, dy hroailt mârin lesh y ghiastyllys shoh, t’er ny hirveish liorinyn gys gloyr y Chiarn cheddin, as gys prowal jeh’n aigney arryltagh euish)

²⁰ Shaghney shoh, nagh der dooinney erbee cômys hooin ayns y phalchey shoh t’er ny hirveish liorin:

²¹ Kiarail ro‐laue reddyn onneragh, cha nee ny lomarcan ayns shilley’n Chiarn, agh myrgeddin ayns shilley gheiney.

²² As ta shin er choyrt mâroosyn nyn mraar, eh ta shin dy mennick er gheddyn kiaralagh ayns ymmodee reddyn, agh nish foddey s’kiaralee, liorish yn treishteil shickyr t’aym’s ayndiuish.

²³ My ta veg eu briaght lurg Titus, t’eh my heshey, as my cho‐obbree er y lieh euish: ny my ta briaght jeant lurg nyn mraaraghyn, t’adsyn chaghteryn ny kialteenyn, as gloyr Chreest.

²⁴ Shen‐y‐fa jeeagh‐jee dauesyn, as fenish ny kialteenyn, prowal jeh’n ghraih eu, as jeh’n voggyssagh ain er y lieh euish.