2 Corinthianee 6 - Yn Conaant Noa 1810

CAB. VI

¹ Ta shinyn eisht, myr firchoo‐nee mârishyn, guee erriuish myrgeddin, nagh jean shiu grayse Yee y ghoaill ayns fardail:

² (Son t’eh gra, Ta mee er dty chlashtya ayns earish ghraysoil, as ayns laa yn taualtys ta mee er choyrt couyr dhyt: cur‐my‐ner, nish ta’n earish ghraysoil ayn; jeeagh, nish ta’n laa dy haualtys.)

³ Ny lhig dooin oyr dy scammylt y choyrt ayns nhee erbee, nagh bee cômys er ny choyrt da’n oik ain:

⁴ Agh ayns dy chooilley nhee soilshaghey shin hene magh myr shirveishee Yee, ayns lane meenid, ayns seaghyn, ayns êgin, ayns chennid,

⁵ Ayns buillaghyn, ayns pryssooney, ayns irree‐magh nyn ’oï, ayns tooilleil, ayns watchal, ayns trostey;

⁶ Liorish glennid‐bea, liorish lushtey, liorish surranse‐foddey, liorish kenjallys, liorish y Spyrryd Noo, liorish graih gyn foalsaght,

⁷ Liorish y goo dy irrinys, liorish pooar Yee, liorish yn eïlley dy chairys er y laue yesh as y laue chiare.

⁸ Liorish ooashley as mee‐ooashley, liorish drogh‐ghoo as goo mie; myr molteyryn, as ny‐yeih firrinagh;

⁹ Myr sleih nagh vel enney er ny choyrt orrin, as foast ta enney vie; myr goll dy baase, as cur‐my‐ner ta shin bio; myr smaghtit, as gyn v’er nyn goyrt dy baase;

¹⁰ Myr lane dy hrimshey, foast dy kinjagh gennal; myr boghtyn, foast jannoo ymmodee berchagh; myr nagh beagh ain nhee erbee, as foast dy chooilley nhee ain.

¹¹ O shiuish Chorinthianee, ta’n beeal ain er ny osley [ayns graih] hiuish, ta’n cree ain er ny heeyney magh erriu.

¹² Cha vel shiuish er nyn jionney ayninyn, agh ta shiuish chionnit ayns ny creeaghyn eu hene.

¹³ Nish son cooilleeney ayns y red cheddin (ta mee loayrt myr rish my chloan) lhig da’n cree euish myrgeddin roshtyn orrym’s.

¹⁴ Ny bee‐jee dy neu‐chorrym sniemmit cooidjagh marish ny mee‐chredjuee: son cre’n sheshaght t’ec cairys rish mee‐chairys? ny cre’n chommeeeys t’ec soilshey rish dorraghys?

¹⁵ As cre’n choardail t’ec Creest rish Belial? ny cre’n ayrn ta echeysyn ta credjal, marish an‐chreestee?

¹⁶ As cre’n chaarjys t’ec chiamble Yee rish jallooyn? son ta shiuish chiamble yn Jee bio; myr ta Jee er ghra, Neem’s beaghey ayndoo, as gimmeeaght mâroo; as beem’s yn Jee ocsyn, as bee adsyn yn pobble aym’s.

¹⁷ Shen‐y‐fa tar‐jee magh veih nyn mast’ oc, as bee‐jee er nyn scarrey voue, ta’n Chiarn dy ghra, as ny benn‐jee rish yn red neu‐ghlen; as neem’s goaill riu,

¹⁸ As beem’s my Ayr diuish, as bee shiuish ny mec as as inneenyn aym’s, ta’n Chiarn Ooilley‐niartal dy ghra.