2 Corinthianee 2 - Yn Conaant Noa 1810

CAB. II

¹ Agh va mee kiarit, nagh darrin hiuish yn nah cheayrt ayns trimshey.

² Son my ta mish jannoo shiuish trimshagh, quoi eh eisht ta boggey dou, agh yn fer cheddin va jeant trimshagh liorym?

³ As shoh scrieu mish hiu, er‐aggle tra harrin, dy beagh trimshey aym vouesyn lhisin boggey ’ghoaill jeu, myr ta my hreishteil mychione eu ooilley, dy vel yn boggey aym’s yn boggey eu ooilley.

⁴ Son lesh mooarane trimshey as angaish cree, scrieu mee hiu lesh ymmodee jeïr; cha nee dy chur trimshey erriu, agh dy voddagh fys ve eu er y ghraih jeean t’aym’s erriu.

⁵ Agh my ta fer erbee er choyrt oyr dy hrimshey, cha vel eh er yannoo mish trimshagh, agh ayns ayrn: nagh darrin ro hrome erriu ooilley.

⁶ S’lioar da’n dooinney shen ta’n kerraghey shoh, hie er coyrt er kiongoyrt rish ymmodee.

⁷ Myr shen dy baare diu er yn aght elley leih da, as gerjaghey eh, er‐aggle dy beagh e lheid sluggit seose lesh rouyr trimshey.

⁸ Shen‐y‐fa ta mee guee erriu, dy jinnagh shiu nyn ghraih y hickyraghey dasyn.

⁹ Son yn oyr shoh neesht scrieu mee hiu, dy voddagh prowal ’ve aym j’iu, dy vel shiu biallagh ayns dy chooilley nhee.

¹⁰ Dasyn ta shiuish leih nhee erbee, ta mish leih myrgeddin: son my leih mee red erbee, dasyn ren mish y leih eh, ve er y ghraih euish ayns lieh Chreest;

¹¹ Er‐aggle dy voghe yn Noid‐anmey vondeish orrin: son cha vel e chialgyn gyn‐yss dooin.

¹² Ny‐sodjey, tra haink mee gys Troas dy phreacheil sushtal Chreest, as dy row dorrys er ny osley dou ayns y Chiarn.

¹³ Cha row fea aym ayns my spyrryd, son nagh dooar mee Titus my vraar: agh faagail bannaght oc, hie mee veih shen gys Macedonia.

¹⁴ Nish booise dy row gys Jee, ta dy kinjagh coyrt dooin oyr yn varriaght ayns Creest, as ta skeayley soar millish yn tushtey jehsyn liorin ayns dy chooilley ynnyd.

¹⁵ Son ta shin gys Jee soar millish trooid Creest, ayndoosyn t’er nyn sauail, as ayndoosyn ta cherraghtyn.

¹⁶ Da’n derrey yeh ta shin blass y vaaish gys baase; as da’n jeh elley ta shin blass y vea gys bea: as quoi ta fondagh son ny reddyn shoh?

¹⁷ Son cha vel shin myr ymmodee, ta soiaghey magh goo Yee dy molteyragh: agh myr jeh’n ynrickys agh myr jeh Jee, ayns shilley Yee ta shin loayrt ayns Creest.