1 Timothy 6 - Yn Conaant Noa 1810

CAB. VI

¹ Lhig da whilleen shaarvaant as ta fo’n whing, nyn mainshteryn hene y choontey feeu jeh dy chooilley onnor: nagh bee scammylt er ny choyrt da ennym Yee, as e ynsagh.

² As adsyn ta mainshteryn creestee oc, ny lhig daue soiaghey beg jeu, er‐yn‐oyr dy nee braaraghyn ad: agh lhig daue shirveish ad ny s’arryltee, son dy vel ad jeh’n [un] chredjue, as ayns graih [Yee], goaill ayrn cooidjagh jeh’n bannaght. Ny reddyn shoh ynsee as coyrlee.

³ My ta dooinney erbee gynsaghey er aght elley, as nagh vel eh geiyrt da goan slayntoil, dy jarroo goan nyn Jiarn Yeesey Creest, as da’n ynsagh ta cordail rish craueeaght;

⁴ T’eh moyrnagh, er beggan tushtey, agh branladee mysh questionyn as arganeyn streeuagh, voue ta cheet troo, anvea, oltooan, drogh‐ouryssyn,

⁵ Pleadeilyn camlâgagh deiney dy aignaghyn neu‐ghlen, as follym jeh’n irriney, jeeaghyn er cosney dy ve craueeaght: veih nyn lheid jean oo hene y scarrey.

⁶ Agh ta craueeaght lesh aigney booiagh cosney mooar.

⁷ Son cha dug shin lhien nhee erbee stiagh ’sy theihll shoh, as te shickyr nagh vod mayd nhee erbee y choyrt lhien magh ass.

⁸ As my ta beaghey as coamrey ain, lhig dooin ve booiagh lhieu.

⁹ Agh t’adsyn ta soit er ve berchagh tuittym ayns miolagh, as ribbey, as ayns ymmodee sayntyn olk as ommijah, ta baih deiney ayns toyrt‐mow as coayl‐anmey.

¹⁰ Son saynt argid fraue dy chooilley olk: da’n chooid cheddin choud as va paart miandagh er, t’ad er n’gholl er‐shaghryn veih’n chredjue, as er vroddey ad hene trooid lesh mooarane torchaghyn.

¹¹ Agh uss, O ghooinney dy Yee, chea veih ny reddyn shoh: as eiyr da ynrickys, craueeaght, credjue, graih, surranse, meenid.

¹² Bee dty hidoor dunnal son y chredjue, gow greme er y vea veayn, gys shen t’ou myrgeddin er dty eam, as er n’ghoaill rish credjue mie kiongoyrt rish ymmodee feanishyn.

¹³ Ta mee cur currym ort fenish Yee, ta bioghey dy chooilley nhee, as kiongoyrt rish Creest Yeesey, ren tra v’eh roish Pontius Pilate gymmyrkey feanish mie;

¹⁴ Dy vreill oo yn sarey shoh slane, gyn‐foill, derrey cheet nyn Jiarn Yeesey Creest:

¹⁵ Shen nee eshyn ayns traa cooie y hoilshaghey, ta’n ynrycan Ard‐reilltagh bannit, yn Ree dy reeghyn, as Chiarn dy hiarnyn;

¹⁶ Echeysyn ny lomarcan ta’n vea dy bragh farraghtyn, beaghey ’sy toilshey nagh vod dooinney erbee roshtyn huggey, eh nagh vel dooinney erbee er vakin, ny cha vod fakin; huggeysyn dy row ooashley as pooar dy bragh farraghtyn. Amen.

¹⁷ Cur currym orroosyn ta berchagh ’sy theihll shoh, nagh bee ad ard‐aignagh, ny treishteil ayns berchys neu‐hickyr, agh ayns y Jee bio, ta cur dooin dy palchey dy chooilley nhee dy ghoaill soylley jeu:

¹⁸ Dy jean ad mie, dy bee ad berchagh ayns obbraghyn mie, aignagh dy rheynn, arryltagh dy choyrt da ny boghtyn;

¹⁹ Coyrt seose ayns stoyr nyn gour oc hene undin mie ry‐hoï yn traa ta ry heet, dy vod ad greme y ghoaill er y vea veayn.

²⁰ O Timothy, freill shen ny ta er ny choyrt gys dty churrym, shaghney glare mee‐chrauee as fardalagh, as streeu mychione yn ynsagh shen ta far‐enmyssit creenaght:

²¹ Liorish geiyrt da shoh, ta paart er n’gholl er‐shaghryn veih’n chredjue. Grayse dy row mayrt. Amen.