1 Timothy 5 - Yn Conaant Noa 1810

CAB. V

¹ Ny cur oghsan da shanstyr agh coyrlee eh myr ayr, as ny deiney saa myr braaraghyn;

² Ny mraane shinney myr moiraghyn, ny [mraane] saa myr shayraghyn, lesh dy chooilley ghlennid.

³ Jean soiaghey jeh mraane‐treoghe ta mraane‐treoghe dy jarroo.

⁴ Agh my ta ec ben‐treoghe erbee cloan ny ogheyn, lhig daue hoshiaght gynsaghey dy hoilshaghey kenjallys dooie ec y thie, as dy yannoo lhiasagh da nyn ayraghyn as moiraghyn: son ta shen mie, as soiagh er ny yannoo jeh fenish Yee.

⁵ Nish t’ee shen ta dy jarroo ny ben‐treoghe, as treigit, treishteil ayns Jee, as tannaghtyn ayns aghinyn as padjeryn oie as laa.

⁶ Agh ish ta beaghey ayns reamys neu‐lowal, t’ee marroo ga dy vel ee bio.

⁷ As ny reddyn shoh cur [daue] ayns currym, dy vod ad ve dyn foill.

⁸ Agh mannagh vel fer erbee kiarail cour e vooinjer hene, as erskyn ooilley ny chour ocsyn ta jeh’n lught‐thie echey hene, t’eh er n’obbal y credjue, as t’eh ny smessey na an‐chreestee.

⁹ Ny lhig da ben‐treoghe ve goit stiagh ’sy choontey fo three‐feed blein, as nagh vel er ve agh un cheayrt poost,

¹⁰ Ayns goo mie son obbraghyn mie; my t’ee er hroggal cloan, my t’ee er chur aaght da joarreeyn, my t’ee er niee cassyn ny nooghyn, my t’ee er chooney lhieusyn va seaghnit, my t’ee er eiyrt dy imneagh da dy chooilley obbyr vie.

¹¹ Agh ny mraane‐treoghe saa ny gow stiagh: son tra t’ad er n’ghoaill toshiaght dy aase ronanagh noi Creest, bee ad son poosey;

¹² Tayrn kerraghey orroo hene, er‐yn‐oyr dy vel ad er hilgey jeh nyn chied chredjue.

¹³ As marish shoh t’ad gynsaghey dy ve litcheragh, rouail veih thie gy thie; as cha nee ynrycan litcheragh, agh tutleryn neesht, as peeikeyryn ayns cooishyn sleih elley, loayrt reddyn nagh lhisagh ad.

¹⁴ Saillym er‐y‐fa shen dy jean ny mraane saa poosey, cloan y ymmyrkey, yn thie y reill, gyn veg yn oyr y choyrt da’n noid dy loayrt dy scammyltagh.

¹⁵ Son ta paart ta hannah er jyndaa dy lhiattee geiyrt er noid ny hanmey.

¹⁶ My ta mraane‐treoghe mooinjerey ec dooinney ny ben erbee ta jeh’n chredjue, lhig daue kiarail y ghoaill jeu, as nagh bee’n currym oc er yn agglish; dy vod ee cooney lhieusyn ta mraane‐treoghe dy jarroo.

¹⁷ Lhig da ny shanstyryn ta reill dy mie, ve coontit feeu jeh ooashley dooble, erskyn ooilley adsyn ta laboragh ’sy ghoo as ynsagh.

¹⁸ Son ta’n scriptyr gra, Cha jean oo beeal y dow y chiangley seose ta stampey magh yn arroo: as, Ta’n labree feeu e aill.

¹⁹ Noi shanstyr ny jean plaiynt y ghoaill, agh kiongoyrt rish ghaa ny three dy eanishyn.

²⁰ Cur oghsan dauesyn ta cur rish peccah kiongoyrt rish ooilley, dy vod feallagh elley myrgeddin aggle y ghoaill.

²¹ Ta mee cur currym ort fenish Yee, as y Chiarn Yeesey Creest, as ny ainleyn reiht, dy der oo tastey da ny reddyn shoh fegooish soiaghey jeh persoon erskyn persoon elley, jannoo dy chooilley nhee lesh kiartys.

²² Ny cur laueyn dy siyragh er dooinney erbee, chamoo gow ayrn jeh peccaghyn deiney elley: freill oo hene glen.

²³ Ny iu ushtey ny sodjey, agh gow red beg dy feeyn dy niartaghey dty stamack, as son dy vel oo cha mennick aslayntagh.

²⁴ Ta peccaghyn paart dy gheiney er ny hoilshaghey ro‐laue, goll rhymboo gys briwnys; as paart dy gheiney t’ad cheet nyn yeï.

²⁵ Myr shen myrgeddin ta obbraghyn mie paart soilshit ro‐laue; as adsyn ta er aght elley, cha vod ad ve keillit.