1 Timothy 4 - Yn Conaant Noa 1810

CAB. IV

¹ Nish ta’n Spyrryd ginsh dy plain, dy jean paart ayns ny laghyn s’jerree tuittym veih’n chredjue, coyrt geill da spyrrydyn molteyragh, as ynsagh drogh‐spyrrydyn;

² Ginsh vreeagyn ayns craueeaght‐foalsey, yn chooinsheanse oc creoghit lesh yiarn jiarg:

³ Lhiettal dy phoosey as sarey dy reayll veih bee, ta Jee er chroo dy ve er ny ghoaill lesh toyrt‐booise lioroosyn ta credjal as toiggal yn irriney.

⁴ Son ta ooilley creetooryn Yee mie, as dyn nhee erbee dy ve mee‐lowit, my te er nyn ghoaill lesh toyrt‐booise:

⁵ Son te er ny chasherickey liorish goo Yee, as padjer.

⁶ My nee oo ny braaraghyn y choyrt ayns cooinaghtyn jeh ny reddyn shoh, bee oo dty hirveishagh vie dy Yeesey Creest, troggit ayns goan y chredjue, as ynsagh mie, huggey t’ou er roshtyn.

⁷ Agh raaghyn mee‐chrauee shenn vraane cur dy lhiattee, as gow myr reih dy gholl er dty hoshiaght ayns craueeaght.

⁸ Er son shirveish y challin cha vooar yn ymmyd t’ayn: agh ta craaueeaght vondeishagh gys dy chooilley nhee, myr ta gialdyn echey jeh’n vea ta nish ayn, as jeh shen ta ry heet.

⁹ Ta shoh raa firrinagh as feeu ard‐soiagh ve jeant jeh.

¹⁰ Son er y choontey shen ta shin chammah laboragh, as surranse scammylt, er‐yn‐oyr dy vel shin treishteil ayns y Jee bio, ta ny Haualtagh da dy chooilley ghooinney, erskyn ooilley dauesyn ta credjal.

¹¹ Ny reddyn shoh jean y harey as cur roue.

¹² Ny lhig da dooinney erbee beg y hoiaghey jeh dty aegid, agh bee dty hampleyr dauesyn ta credjal, ayns goo, ayns ymmykey‐bea, ayns graih, ayns spyrryd, ayns credjue, ayns glennid.

¹³ Derrey hig‐ym, bee kiaralagh dy lhaih, dy choyrlaghey, dy ynsaghey.

¹⁴ Ny bee mee rioosagh jeh’n ghioot t’aynyd, va er ny chur dhyt liorish phadeyrys, tra hie oo fo laueyn ny shirveishee casherick.

¹⁵ Smooinee dy dowin er ny reddyn shoh, jean oo hene dy slane y vaarail orroo; dy vod y bishaghey ayd’s ayndoo ve er ny hoilshaghey da dy chooilley ghooinney.

¹⁶ Cur tastey dhyt hene, as da dty ynsagh; jean tannaghtyn ayndoo: son ayns jannoo shoh, nee oo chammah oo hene y hauail, ad adsyn ta dy dty chlashtyn.