1 Timothy 3 - Yn Conaant Noa 1810

CAB. III

¹ Ta shoh raa firrinagh, my ta dooinney geearree oik aspick, t’eh geearree obbyr vie.

² Shegin da aspick eisht ve gyn loght, sheshey‐poost un ven, tastagh, sheelt, jeh ymmyrkey‐bea mie, aggindagh dy choyrt oltaghey‐bea, aghtal dy ynsaghey;

³ Cha nee iuder‐feeyney, ny builltagh, ny sondagh er cosney scammyltagh, agh surransagh, cha nee fer streeuagh, ny sayntoilagh;

⁴ Dooinney ta gymmyrkey reill mie ayns e hie hene, as e chloan fo smaght lesh slane sheeltys;

⁵ (Son mannagh vel fys ec dooinney kys dy reill e hie hene, kys nee eh kiarail y ghoaill jeh agglish Yee?

⁶ Cha nee fer gerrit ’sy chredjue, er‐aggle dy bee eh troggit seose lesh moyrn, as dy duitt eh fo briwnys y drogh‐spyrryd.

⁷ Shegin da myrgeddin goo mie ve echey vouesyn ta mooie; er‐aggle dy duitt eh fo scammylt, as ribbey yn drogh‐spyrryd.

⁸ Myrgeddin shegin da ny shirveishee ve soccaragh, cha nee chengey lhiam as lhiat, nagh bee ad neu‐heelt ayns feeyn, gyn ve sondagh er cosney scammyltagh,

⁹ Freayll folliaght y chredjue ayns cooinsheanse ghlen.

¹⁰ As lhig daue shoh myrgeddin ve hoshiaght er nyn browal; eisht lhig daue goaill orroo oik y chirveishagh, my t’ad dyn foill.

¹¹ Shegin da ny mraane oc myrgeddin ve dy ymmyrkey fudagh, cha nee scammyltee, agh sheelt, ynrick ayns dy chooilley nhee.

¹² Lhig da ny shirveishee ve sheshee‐poost un ven, reill nyn gloan, as nyn lught‐thie hene dy mie.

¹³ Son t’adsyn t’er chooilleeney oik y chirveishagh dy firrinagh, er gheddyn daue hene raad mie [gys oik syrjey], as lane dunnallys ayns y chredjue, ta ayns Creest Yeesey.

¹⁴ Ny reddyn shoh ta mee scrieu hood, jerkal dy heet hood dy gerrit:

¹⁵ Agh my uirr‐ym foddey, dy vod fys ve ayd kys lhisagh uss oo hene y ymmyrkey ayns thie Yee, ta agglish yn Jee bio, yn pillar as undin yn irriney.

¹⁶ As son shickyrys, s’mooar ta’n folliaght dy chraueeaght: va Jee er ny hoilshaghey ’syn eill, er ny heyrey liorish y spyrryd, er ny akin liorish ainleyn, er ny phreacheil gys ny Ashoonee, er ny chredjal ayn ’sy theihll, er ny ghoaill seose ayns gloyr.