1 Timothy 2 - Yn Conaant Noa 1810

CAB. II

¹ Ta mee coyrlaghey er‐y‐fa shen, hoshiaght ooilley, dy bee aghinyn, padjeryn, yeearreeyn, as toyrt booise er ny yannoo son dy chooilley ghooinney:

² Son reeaghyn, as son ocsyn ooilley ta ayns ard‐reill; dy vod mayd leeideil bea feagh as sheeoil ayns dy chooilley chraueeaght as ynrickys.

³ Son ta shoh mie as booisal ayns shilley Yee nyn saualtagh:

⁴ Eh saillish dy chooilley ghooinney dy ve er nyn sauail, as dy heet gys tushtey jeh’n irriney.

⁵ Son ta un Jee ayn, as un er ta loayrt eddyr Jee as deiney, yn dooinney Creest Yeesey;

⁶ Hug eh hene ny lhiassaghey son ooilley, dy ve er ny hoilshaghey ayns traa cooie.

⁷ Gys shoh va mee er my oardaghey ny phreachoor, as ostyl (ta mee loayrt yn irriney ayns Creest, as cha vel mee ginsh breg) fer‐ynsee ny Ashoonee ayns credjal as firrinys.

⁸ Saillym er‐y‐fa shen dy jean deiney padjer y ghoaill dy chooilley raad, troggal seose laueyn glen, fegooish corree as mee‐hreishteil:

⁹ Myrgeddin neesht dy jean mraane ad hene y hoiaghey magh ayns coamrey fudagh, lesh ymmyrkey arrymagh, as sheeltys: cha nee lesh folt feeit, ny airh, ny pearlyn, ny coamrey costal;

¹⁰ Agh (shen ta cheet jesh da mraane ta goaill‐rish craueeaght) lesh obbraghyn mie.

¹¹ Lhig da’n ven gynsaghey dy feagh lesh slane biallys.

¹² Agh cha surr‐ym ben dy ynsaghey, ny dy ghoaill urree hene pooar harrish y dooinney, agh dy ve ny host.

¹³ Son va Adam hoshiaght er ny chroo, as eisht Aue.

¹⁴ As cha nee Adam [va hoshiaght] mollit, agh y ven myr v’ee miolit va oolee.

¹⁵ Foast, bee ee er ny hauail ayns gymmyrkey‐lhiannoo, my nee ad tannaghtyn ayns credjue as graih, as craueeaght lesh sheeltys.