1 Thessalonianee 5 - Yn Conaant Noa 1810

CAB. V

¹ Agh mychione ny traaghyn as ny imbaghyn, vraaraghyn, cha vel feme scrieu hiu.

² Son ta fys dy mie eu hene, dy vel laa yn Chiarn cheet myr maarliagh ’syn oie.

³ Son tra jir ad, Shee as sauchys; eisht hig toyrt‐mow orroo doaltattym, myr ta pian cheet er ben tra t’ee er‐troailt; as cha jean ad scapail.

⁴ Agh cha vel shiuish, vraaraghyn, ayns dorraghys, dy jinnagh y laa shen berraghtyn erriu myr maarliagh.

⁵ Ta shiuish ooilley cloan y toilshey, as cloan y laa: cha vel shinyn jeh’n oie, ny jeh’n dorraghys.

⁶ Ny lhig dooin er‐y‐fa shen cadley myr ta feallagh elley; agh lhig dooin ve er nyn arrey as sheelt.

⁷ Son t’adsyn ta cadley, cadley ’syn oie; as t’adsyn t’er meshtey, er‐meshtey ’syn oie.

⁸ Agh lhig dooinyn ta jeh’n laa, ve sheelt, coyrt orrin yn breast‐plate dy chredjue as graih, as son bayrn‐caggee, yn treishteil dy haultys.

⁹ Son cha vel Jee er phointeil shin gys corree; agh dy chosney saultys liorish nyn Jiarn Yeesey Creest,

¹⁰ Hur baase er nyn son, edyr shin ve dooisht ny nyn gadley, dy vod shin ve bio cooidjagh mârishyn.

¹¹ Shen‐y‐fa jean‐jee gerjaghey shiu hene, as niartaghey yn derrey yeh yn jeh elley, dy jarroo myr ta shiu dy yannoo.

¹² As ta shin guee erriu, vraaraghyn, dy choyrt geill dauesyn ta laboragh nyn mast’ eu, as ta harrystiu ayns y Chiarn, as coyrlaghey shiu;

¹³ As dy yannoo ard‐soiagh jeu ayns graih er coontey nyn obbyr: as bee‐jee ec shee nyn mast’ eu hene.

¹⁴ Nish ta shin guee erriu, vraaraghyn, cur‐jee raaue dauesyn ta mee‐reiltagh, jean‐jee gerjaghey adsyn ta lhag‐chreeagh, ymmyrk‐jee lesh ny annooinee, bee‐jee surransagh rish dy chooilley ghooinney.

¹⁵ Jeeagh nagh jean veg j’iu cooilleeney olk son olk da dooinney erbee: agh dy bragh eiyr‐jee er shen ta mie, chammah nyn mast’ eu hene, as rish dy chooilley ghooinney.

¹⁶ Gow‐jee dy bragh boggey.

¹⁷ Gow‐jee padjer dy kinjagh.

¹⁸ Ayns dagh stayd cur‐jee booise: son shoh aigney Yee ayns Creest Yeesey mychione eu.

¹⁹ Ny jean‐jee mooghey yn Spyrryd.

²⁰ Ny jean‐jee beg y hoiaghey jeh phadeyrys.

²¹ Prow‐jee dy chooilley nhee: cum‐jee shickyr shen ta mie.

²² Freill‐jee shiu hene veih dy chooilley chaslys dy olkys.

²³ As dy jean y Jee hene dy hee shiu dy slane y chasherickey: as ta mee guee gys Jee dy bee’n slane spyrryd, as annym, as callin eu er ny reayll gyn loght, gys cheet nyn Jiarn Yeesey Creest.

²⁴ Firrinagh t’eshyn ta geamagh errriu, nee myrgeddin shen y chooilleeney.

²⁵ Vraaraghyn, gow‐jee padjer er nyn son.

²⁶ Jean‐jee ooilley ny braaraghyn y vannaghey lesh y phaag dy hee.

²⁷ Ta mee cur currym erriu liorish y Chiarn, dy bee’n screeuyn shoh er ny lhaih da ooilley ny braaraghyn casherick.

²⁸ Grayse nyn Jiarn Yeesey Creest dy row mêriu. Amen.