1 Thessalonianee 4 - Yn Conaant Noa 1810

CAB. IV

¹ Ny‐sodjey na shoh, ta shin guee erriu, vraaraghyn, as coyrlaghey shiu liorish yn Chiarn Yeesey, ’naght myr ta shiu er n’ynsaghey voïnyn kys lhisagh shiu nyn mea y ymmyrkey, as Jee y wooiys, myr shen dy jinnagh shiu bishaghey ny smoo as ny smoo.

² Son ta fys eu cre ny saraghyn hug shin diu liorish y Chiarn Yeesey.

³ Son shoh aigney Yee, dy jarroo yn chasherickys eu, dy lhisagh shiu freayll shiu hene veih maarderys;

⁴ Dy lhisagh fys ve ec dagh unnane eu kys dy reayll e chorp ayns glennid as onnor;

⁵ Cha nee ayns mian saynt ny foalley, goll‐rish eer ny Ashoonyn‐quaagh nagh vel tushtey oc dy Yee;

⁶ Nagh lhisagh dooinney erbee vondeish y ghoaill er e vraar as eh y volley ayns cooish erbee: er‐yn‐oyr dy nee yn Chiarn ta goaill cooilleen er ooilley nyn lheid, myr ta shin er n’insh diu ro‐laue, as er hoilshaghey.

⁷ Son cha vel Jee er n’eamagh orrin gys neu‐ghlennid, agh gys casherickys.

⁸ Eshyn er‐y‐fa shen ta soiaghey beg, cha vel eh soiaghey beg jeh dooinney, agh jeh Jee, ta myrgeddin er choyrt dooinyn e Spyrryd casherick.

⁹ Agh mychione graih braaragh, cha lhiass dou scrieu hiu: son ta shin hene ynsit veih Jee dy chur graih yn derrey yeh da’n jeh elley.

¹⁰ As dy jarroo ta shiu dy yannoo eh da ooilley ny braaraghyn dy chooilley raad ayns Macedonia: agh ta shin guee erriu, vraaraghyn, dy jean shiu bishaghey ny smoo as ny smoo;

¹¹ As dy jean shiu kiarail y ghoaill dy ve feagh, as dy yannoo nyn obbyr hene, as dy laboragh lesh ny laueyn hene (myr ta shin er harey shiu)

¹² Dy jean shiu gymmyrkey shiu‐hene dy onneragh hucsyn ta cheu‐mooie, as nagh bee shiu feme nhee erbee.

¹³ Agh cha baillym shiu ve mee‐hushtagh, vraaraghyn, mychione ocsyn ta nyn gadley, nagh bee shiu trimshagh, dy jarroo myr feallagh elley ta fegooish treishteil.

¹⁴ Son my ta shin credjal dy dooar Yeesey baase, as dy dirree eh reesht, dy jarroo myr shen adsyn myrgeddin ta cadley ayns Yeesey, ver Jee lesh mârish.

¹⁵ Son shoh ta shin gra riu liorish goo yn Chiarn, shinyn ta bio, as er‐mayrn gys cheet y Chiarn, nagh gow mayd y raad jeusyn ta nyn gadley.

¹⁶ Son hig y Chiarn neose veih niau lesh eam ard, lesh coraa yn ard‐ainle, as lesh cayrn Yee: as nee ny merriu ayns Creest girree hoshiaght.

¹⁷ Eisht vees shinyn ta bio, as er‐mayrn, goit seose cooidjagh mâroosyn ayns ny bodjallyn, dy gholl quail y Chiarn ayns yn aer: as myr shen bee mayd dy bragh marish y Chiarn.

¹⁸ Shen‐y‐fa, gerjee shiu yn derrey yeh yn jeh elley lesh ny goan shoh.