1 Thessalonianee 3 - Yn Conaant Noa 1810

CAB. III

¹ Shen‐y‐fa, tra nagh voddagh shin lhiggey‐shaghey veg sodjey, ghow shin ayns laue mish dy ve faagit ec Athens my lomarcan:

² As chur shin Timotheus nyn mraar as shirveishagh Yee, as nyn sheshey‐labree ayns sushtal Chreest, dy niartaghey shiu, as dy gherjaghey shiu mychione nyn gredjue:

³ Nagh beagh dooinney erbee er ny ghleayshagh liorish ny seaghynyn shoh: son ta fys eu hene dy nee gys shoh ta shin er ve kiarit.

⁴ Son dy firrinagh, tra va shin mêriu, dinsh shin diu ro‐laue, dy row shin dy hurranse seaghyn, dy jarroo myr haink eh gy‐kione, as ta fys eu hene er.

⁵ Er‐yn‐oyr shoh tra nagh voddin lhiggey shaghey ny sodjey, chur mee chaghter dy gheddyn fys er nyn gredjue, er‐aggle liorish saaseyn erbee dy vel y mioleyder er violaghey shiu, as yn obbyr ain ays fardail.

⁶ Agh nish tra haink Timotheus veueish hooinyn, as er chur lesh mârish coontey mie jeh’n chredjue as y ghraih eu, as dy vel shiu kinjagh gimraa dy dooie orrin, geearree dy jeean dy akin shinyn, myr ta shinyn myrgeddin dy akin shiuish:

⁷ Shen‐y‐fa, vraaraghyn, va shin er nyn gherjaghey my‐nyn‐gione ayns ooilley nyn seaghyn as êgin liorish y chredjue eu:

⁸ Son nish ta shin bio, my ta shiu shassoo shickyr ayns y Chiarn.

⁹ Son cre’n booise oddys mayd reesht y choyrt da Jee er y lieh eu, son ooilley yn boggey ta shin dy ghoaill er y ghraih euish kiongoyrt rish Jee,

¹⁰ Oie as laa goaill padjer erskyn towse jeean dy akin yn eddin eu, as dy yannoo magh shen ny ta dy laccal ayns nyn gredjue?

¹¹ Nish dy jean Jee hene as nyn Ayr, as nyn Jiarn Yeesey Creest, yn raad ain y chiartaghey hiuish.

¹² As dy der y Chiarn erriuish gaase as bishaghey ayns graih yn derrey yeh da’n jeh elley, as da dy chooilley gooinney, dy jarroo myr ta shin diuish:

¹³ Gys y jerrey dy vod eh niartaghey ny creeaghyn eu gyn‐loght ayns casherickys kionfenish Jee, dy jarroo nyn Ayr, ec cheet nyn Jiarn Yeesey Creest, marish ooilley e nooghyn.