1 Thessalonianee 2 - Yn Conaant Noa 1810

CAB. II

¹ Son ta fys eu hene, chaarjyn, tra haink shin hoshiaght hiu, nagh row eh ayns fardail.

² Agh dy jarroo lurg dooin ve roïe er hurranse, as er gheddyn dellal scammyltagh, myr ta fys eu, ec Philippi, va shin dunnal ayns y Jee ain, dy phreacheil diu sushtal Yee lesh lane streeu.

³ Son cha row yn choyrle ain veih molteyrys, ny veih neu‐ghlennid, ny ayns foalfaght:

⁴ Agh myr va shin lowit liorish Jee currym y tushtal dy ve orrin, dy jarroo myr shoh ta shin loayrt, cha nee shirrey deiney y wooiys, agh Jee, ta trial nyn greeaghyn.

⁵ Son chamoo ren shin ec traa erbee ymmyd jeh goan brynnagh, myr ta fys eu hene er, ny coodagh erbee dy haynt: Jee ta feanish.

⁶ Chamoo veih deiney hirr shin gloyr, chamoo veueish, ny foast veih feallagh elley, ga dy row cairys ain dy choyrt shiu gys cost, myr ostyllyn Chreest.

⁷ Agh va shin aashagh ny vud eu, dy jarroo myr ta bondyr jannoo mooar jeh e cloan hene.

⁸ Myr shen ayns slane aigney‐mie diuish, va shin booiagh dy hirveish erriu, cha nee ynrycan sushtal Yee, agh eer nyn mioys hene, er‐yn‐oyr dy row shiu deyr dooin.

⁹ Son ta cooinaghtyn eu, vraaraghyn, er y tooilleil as y deinys ain: son gobbraghey oie as laa, er‐yn‐oyr nagh jinnagh shin currym er veg eu, ren shin sushtal Yee y phreacheil diu.

¹⁰ Ta shiuish feanishyn, as Jee myrgeddin, cre cha crauee as ynrick, as gyn loght dymmyrk shin shin‐hene nyn mast’ euish ta credjal:

¹¹ Myr ta fys eu, kys ren shin coyrlaghey as gherjaghey, as currymaghey dagh unnane eu (myr ta ayr e chloan)

¹² Dy jinnagh shiu gymmyrkey shiu hene feeu jeh Jee, t’er n’eamagh erriu gys e reeriaght as e ghloyr.

¹³ Er y choontey shoh myrgeddin, ta shin coyrt booise kinjagh gys Jee, er‐yn‐oyr tra ghow shiu rish goo Yee cheayll shiu voïnyn, ghow shiu eh cha nee myr goo deiney, agh (myr te ayns firrinys) goo Yee, ta dy breeoil gobbraghey ayndiuish ta credjal.

¹⁴ Son haink shiuish vraaraghyn, dy ve eiyrtyssee er kialteenyn Yee, ta ayns Judea ayns Creest Yeesey: son ta shiuish neesht er hurranse ny reddyn cheddin liorish ny deiney‐cheerey eu hene, dy jarroo myr t’adsyn liorish ny Hewnyn:

¹⁵ Chur dy baase chammah yn Chiarn Yeesey, as ny phadeyryn oc hene, as er n’yannoo tranlaase orrin; as cha vel ad pleasal Jee, as t’ad noi dy chooilley ghooinney:

¹⁶ Lhiettal shin veih loayrt rish ny Ashoonyn‐quaagh, dy voddagh ad v’er nyn sauail, dy lhieeney seose dy kinjagh towse nyn beccaghyn: son ta corree dy heet orroo gys y chooid sodjey.

¹⁷ Agh myr va shin, vraaraghyn, er nyn scarrey veue son tammylt, ayns persoon, cha nee ayns cree, va shin ny s’aggindee lesh yeearree jeean dy akin yn eddin eu.

¹⁸ Shen‐y‐fa veagh shin er jeet hiu (dy jarroo mish Paul) keayrt as keayrt: agh ren Satan nyn lhiettal.

¹⁹ Son cre ta nyn dreishteil, ny nyn moggey, ny nyn attey dy ghennallys? nagh nee dy jarroo shiuish kionfenish nyn Jiarn Yeesey Creest, ec y cheet echey?

²⁰ Son shiuish nyn ghloyr as nyn moggey.