1 Thessalonianee 1 - Yn Conaant Noa 1810

CAB. I

¹ Paul, as Sylvanus, as Timotheus, gys agglish ny Thessalonianee, ta ayns Jee yn Ayr, as ayns y Chiarn Yeesey Creest: Grayse dy row hiu, as shee voish Jee nyn Ayr, as y Chiarn Yeesey Creest.

² Ta shin cur booise kinjagh gys Jee er nyn son eu ooilley, gimraa erriu ayns nyn badjeryn.

³ Cooinaghtyn dy kinjagh er yn obbyr eu dy chredjue, as y tooilleil dy ghraih, as y surranse dy hreishteil ayns nyn Jiarn Yeesey Creest, ayns shilley Yee as nyn Ayr:

⁴ Toiggal, chaarjyn ghraihagh, dy vel shiu reiht liorish Jee.

⁵ Son cha daink y sushtal ainyn hiu ayns goo ny lomarcan, agh myrgeddin ayns pooar, as ayns y Spyrryd Noo, as ayns slane shickyrys, myr ta fys eu kys ren shin gymmyrkey shin hene nyn mast’ eu, er y choontey eu.

⁶ As haink shiu dy ve eiyrtyssee orrin, as er y Chiarn, myr va shiu er ghoaill rish y goo ayns moorane seaghyn, lesh boggey yn Spyrryd Noo:

⁷ Myr shen dy row shiu sampleyryn dauesyn ooilley ta credjal ayns Macedonia as Achaia.

⁸ Son veueish hie feiyr goo yn Chiarn magh, cha nee ny lomarcan ayns Macedonia as Achaia; agh myrgeddin ayns dy chooilley voayl ta’n credjue euish ayns Jee er ny skeayley dy lhean, myr shen nagh lhiass dooin cheet harrish.

⁹ Son t’ad hene soilshaghey mychione ain, kys ghow shiu rooin tra haink shin hoshiaght ny mast’ eu, as kys hyndaa shiu gys Jee veih jallooyn, dy hirveish y Jee bio as firrinagh.

¹⁰ As dy arkiagh son e Vac veih niau, t’eh er hroggal veih ny merriu, dy jarroo Yeesey t’er nyn livrey veih’n chorree ta dy heet.