1 Peddyr 1 - Yn Conaant Noa 1810

CAB. I

¹ Peddyr ostyl Yeesey Creest, gys ny joarreeyn er ny skeayley trooid magh Pontus, Galatia, Cappadocia, Asia as Bithynia,

² Reiht cordail rish tushtey ro‐laue Yee yn Ayr, trooid casherickys y Spyrryd gys biallys, as gys spreih fuill Yeesey Creest: Grayse dy row hiu, as shee dy row er ny vishaghey.

³ Bannit dy row Jee as Ayr nyn Jiarn Yeesey Creest, ta cordail rish e vyghin vooar er n’gheddyn shin reesht gys treishteil bioal, liorish irree‐seose‐reesht Yeesey Creest veih ny merriu.

⁴ Gys eiraght shickyr as casherick, as nagh vel lheïe ersooyl, kiarit ayns niau nyn gour euish.

⁵ Ta er nyn vendeil liorish pooar Yee trooid credjue gys saualtys, aarloo dy ve er ny hoilshaghey ec y laa jerrinagh.

⁶ Son shoh ta shiu goaill mooarane boggey, ga nish son tammylt beg (my she aigney Yee eh) ta shiu ayns trimshey trooid ymmodee seaghyn:

⁷ Dy vod prowal nyn gredjue ta foddey s’costal na airh ta ceau ersooyl, ga er ny hrial lesh aile, ve er ny gheddyn gys moylley, as ooashley, as gloyr ec cheet Yeesey Creest:

⁸ Ersyn ta shiu graihagh, ga nagh vel shiu er vakin eh; ayn, ga nagh vel shiu nish fakin eh, ny‐yeih credjal, ta shiu goaill boggey lesh boggey erskyn insh, as lane dy ghloyr:

⁹ Cosney jerrey nyn gredjue, dy feer saualtys nyn anmeenyn.

¹⁰ Mychione y taualtys cheddin ta ny phadeyryn er vriaght, as er ronsaghey dy imneagh, ren phadeyrys jeh’n ghrayse va ry‐hoi cheet hiu.

¹¹ Ronsaghey cre, ny cre’n imbagh dy hraa ren Spyrryd Chreest va ayndoo cowraghey, tra dymmyrk eh feanish ro‐laue jeh surranse Chreest, as yn ghloyr va dy eiyrt er.

¹² Dauesyn ve er ny hoilshaghey, nagh nee daue hene, agh dooinyn, ren ad shirveish ny reddyn ta nish er ny ockley magh lioroosyn ta er phreacheil y sushtal diuish, marish yn Spyrryd Noo er ny choyrt neose veih niau, ny reddyn cheddin ta ny ainleyn geearree baght y gheddyn jeu.

¹³ Shen‐y‐fa kiartee‐jee seose meeghyn nyn aigney, bee‐jee sheelt, as treisht‐jee gys y jerrey, son y ghrayse vees er ny choyrt diu tra vees Yeesey Creest er ny hoilshaghey;

¹⁴ Myr cloan biallagh, cha nee cummey shiu hene cordail rish ny shenn chliaghtaghyn, ayns y vee‐hushtey eu:

¹⁵ Agh myr ta eshyn ta er n’eamagh erriu casherick, myr shen bee‐jee shiuish casherick ayns nyn slane ymmyrkey‐bea.

¹⁶ Son t’eh scruit, Bee‐jee casherick, son ta mish casherick.

¹⁷ As my ta shiu genmys eshyn nyn Ayr, ta fegooish jannoo soiagh jeh persoonyn, briwnys cordail rish obbyr dy chooilley ghooinney, ceau‐jee earish nyn droailtys ayns shoh ayns aggle:

¹⁸ Son wheesh as dy vel fys eu nagh row shiu er nyn gionnaghey lesh reddyn ta goll‐mow, myr argid as airh, veih ny cliaghtaghyn fardalagh v’er nyn livrey diu veih nyn ayraghyn;

¹⁹ Agh lesh fuill deyr Chreest, myr jeh eayn fegooish lheamys, as fegooish cron:

²⁰ Va dy firrinagh er ny oardaghey ro‐laue er‐dy hoshiaght y theihll, agh er ny hoilshaghey ayns ny traaghyn s’jerree shoh er y ghraih euish.

²¹ Ta liorishyn credjal ayns Jee, hrog eh seose veih ny merriu, as hug da gloyr, dy voddagh nyn gredjue as nyn dreishteil ve ayns Jee.

²² Fakin dy vel shiu er chasherickey nyn anmeenyn ayns cur biallys da’n irriney trooid y Spyrryd, gys graih firrinagh jeh ny braaraghyn; jeeagh dy bee‐jee dy jeean graihagh yn derrey yeh er y jeh elley lesh cree glen:

²³ Myr ta shiu ruggit reesht, cha nee jeh rass hed naardey, agh jeh rass nagh jed naardey, liorish goo Yee, ta bio as tannaghtyn son dy bragh.

²⁴ Son ta dy chooilley eill myr faiyr, as ooilley aalid dooinney myr blaa faiyr. Ta’n faiyr fioghey, as ta e vlaa tuittym ersooyl:

²⁵ Agh ta goo Yee tannaghtyn son dy bragh. As shoh’n goo t’er ny phreacheil diu liorish y sushtal.