1 Ean 5 - Yn Conaant Noa 1810

CAB. V

¹ Quoi‐erbee ta credjal dy nee Yeesey yn Creest, t’eh ruggit jeh Jee: as dy chooilley unnane ta graihagh ersyn ren geddyn, shynney lesh eshyn myrgeddin ta er ny gheddyn liorish.

² Liorish shoh ta fys ain dy vel shin graihagh er cloan Yee, tra ta shin coyrt graih da Jee, as freayll e annaghyn.

³ Son shoh graih Yee, dy vreill mayd e annaghyn: as cha vel ny annaghyn echey trome.

⁴ Son cre‐erbee t’er ny ruggey jeh Jee, te geddyn barriaght er y theihll: as shoh yn varriaght ta cur y seihll fo chosh, dy jarroo yn credjue ain.

⁵ Quoi eh ta geddyn barriaght er y theihll, agh eshyn ta credjal dy nee Yeesey Mac Yee?

⁶ Shoh eshyn haink liorish ushtey as fuill, dy jarroo Yeesey Creest; cha nee liorish ushtey ny lomarcan, agh liorish ushtey as fuill: as she yn Spyrryd ta gymmyrkey feanish, er‐yn‐oyr dy vel y Spyrryd firrinys.

⁷ Son ta three ayn ta gymmyrkey feanish ayns niau, yn Ayr, yn Goo, as y Spyrryd Noo: as ta’n three shoh unnane.

⁸ As ta three ayn ta gymmyrkey feanish er y thalloo, yn spyrryd, as yn ushtey, as yn uill: as ta’n three shoh coardail ayns yn un red.

⁹ My ta shin goaill feanish gheiney, ta feanish Yee ny s’troshey: son shoh feanish Yee, t’eh er n’ymmyrkey jeh e Vac.

¹⁰ Eshyn ta credjal ayns Mac Yee, ta’n feanish echey ayn hene: eshyn nagh vel credjal Jee, t’eh er n’yannoo eh ny vreagerey; er‐yn‐oyr nagh vel eh credjal yn recortys ta Jee er n’ymmyrkey jeh e Vac.

¹¹ As shoh yn recortys, dy vel Jee er choyrt dooin yn vea dy bragh beayn: as ta’n vea shoh ayns e Vac.

¹² Eshyn ta’n Mac echey, ta’n vea echey; as eshyn nagh vel yn Mac echey, cha vel echey yn vea.

¹³ Ny reddyn shoh ta mee er scrieu hiuish ta credjal ayns ennym Mac Yee; dy vod shiu toiggal dy vel eu yn vea veayn, as dy vod shiu credjal ayns ennym Mac Yee.

¹⁴ As shoh’n treishteil t’ain aynsyn, my hirrys shin nhee erbee cordail rish e aigney, t’eh geaishtagh rooin.

¹⁵ As my ta fys ain dy vel eh geaishtagh rooin, cre‐erbee ta shin shirrey, ta fys ain dy vow mayd ny accanyn ta shin dy yeearree er.

¹⁶ My ta dooinney erbee fakin e vraar cur rish peccah nagh vel gys baase, nee eh guee er e hon, as yiow eh bea er nyn son ocsyn nagh vel jannoo peccah gys baase. Ta peccah ayn gys baase: cha vel mee gra dy lhisagh eh guee er y hon.

¹⁷ Ta dy chooilley neu‐ynrickys peccah: as ta peccah ayn nagh vel gys baase.

¹⁸ Ta fys ain quoi‐erbee ta ruggit jeh Jee, nagh vel eh cur rish peccah; agh eshyn ta er ny ghientyn jeh Jee, t’eh freayll arrey er hene, as cha vel yn drogh‐er bentyn rish.

¹⁹ As ta fys ain dy vel shin veih Jee, as dy vel ooilley yn seihll ny lhie ayns mee‐chraueeaght.

²⁰ As ta fys ain dy vel Mac Yee er jeet, as er choyrt dooin tushtey, dy vod mayd enney y choyrt ersyn ta firrinagh: as ta shin aynsyn ta firrinagh, dy jarroo ayns e Vac Yeesey Creest. Shoh yn Jee firrinagh, as yn vea dy bragh farraghtyn.

²¹ Chloan veggey, freill‐jee shiu hene veih jallooyn. Amen.