1 Ean 3 - Yn Conaant Noa 1810

CAB. III

¹ Cur‐my‐ner, cre’n sorch dy ghraih ta’n Ayr er stowal orrin, dy beagh shin enmyssit nyn gloan dy Yee: shen‐y‐fa cha vel enney ec y theihll orrin, er‐y‐fa nagh row enney echey ersyn.

² My chaarjyn, nish ta shin nyn gloan dy Yee, as cha lheear dooin foast cre vees mayd: agh ta fys ain, tra vees eshyn er ny hoilshaghey, dy bee mayd goll rishyn; son nee mayd fakin eh myr t’eh.

³ As ta dy chooilley ghooinney ta’n treishteil shoh echey ayn hene, glenney eh hene, dy jarroo myr t’eshyn glen.

⁴ Quoi‐erbee ta jannoo peccah, t’eh myrgeddin brishey yn leigh; son she peccah ta brishey yn leigh.

⁵ As ta fys eu dy row eshyn er ny hoilshaghey dy ghoaill ersooyl nyn beccaghyn; as aynsyn cha vel veg y pheccah.

⁶ Quoi‐erbee ta tannaghtyn aynsyn, cha vel eh jannoo peccah: quoi‐erbee ta jannoo peccah, cha vel eh er vakin eh, chamoo ta enney er ve echey er.

⁷ Chloan veggey, ny lhig da dooinney erbee shin y volley: eshyn ta jannoo cairys, t’eh cairagh, dy jarroo myr t’eshyn cairagh.

⁸ Eshyn ta jannoo peccah, t’eh jeh’n drogh‐spyrryd; son ta’n drogh‐spyrryd kyndagh jeh peccah er‐dyn toshiaght. Son yn oyr shoh va Mac Yee er ny hoilshaghey, dy voddagh eh cur mow obbraghyn y drogh‐spyrryd.

⁹ Quoi‐erbee t’er ny ruggey jeh Jee, cha vel eh cur rish peccah; son ta’n rass echey tannaghtyn ayn: as cha vod eh ve fo reill peccah, er‐y‐fa dy vel eh er ny ruggey jeh Jee.

¹⁰ Liorish shoh ta cloan Yee er nyn gronnaghey voish cloan y drogh‐spyrryd: Quoi‐erbee nagh vel jannoo cairys, cha vel eh jeh Jee, ny foast eshyn nagh nhynney lesh e vraar.

¹¹ Son shoh’n chaghteraght ta shiu er chlashtyn er‐dyn toshiaght, dy lhisagh shin ve graihagh yn derrey yeh er y jeh elley.

¹² Cha nee myr va Cain, va jeh’n drogh‐er shen, as varr e vraar: As cre’n‐fa varr eh eh? Er‐yn‐oyr dy row ny obbraghyn echey hene olk, as obbraghyn e vraarey cairagh.

¹³ Ny gow‐jee yindys, my vraaraghyn, ga ta’n seihll coyrt dwoaie diu.

¹⁴ Ta fys ain dy vel shin caghlaait veih baase gys bea, er‐yn‐oyr dy nhynney lhien ny braaraghyn: eshyn nagh nhynney lesh e vraar, t’eh tannaghtyn ayns baase.

¹⁵ Quoi‐erbee ta dwoaie echey er e vraar, t’eh ny ghunver: as ta fys eu nagh vel ec dunver erbee yn vea dy bragh farraghtyn tannaghtyn ayn.

¹⁶ Liorish shoh ta shin toiggal graih Yee, ayns dy dug eh sheese e vioys er nyn son: as lhisagh shinyn nyn mioys y chur sheese son ny braaraghyn.

¹⁷ Agh quoi‐erbee ta cooid y theihll shoh echey, as fakin e vraar ayns feme, as ta dooney seose e veeghyn dy hymmey voish; kys ta graih Yee tannaghtyn ayn?

¹⁸ My chloan veggey, ny lhig dooin graih y choyrt ayns raa, ny ayns glare; agh ayns jannoo as ayns firrinys.

¹⁹ As liorish shoh ta fys ain er dy vel shin jeh’n irriney, as bee shickyrys ec nyn greeaghyn kiongoyrt rish,

²⁰ Son my ta ny creeaghyn ain dy gheyrey shin, ta Jee erskyn ny creeaghyn ain, as ta fys echey er dy chooilley nhee.

²¹ My chaarjyn, mannagh vel nyn gree dy nyn gheyrey, eisht ta dunnallys ain dy hayrn er‐gerrey gys Jee.

²² As cre‐erbee ta shin geearree, shen ta shin geddyn veihsyn, er‐y‐fa dy vel shin freayll ny annaghyn echey, as jannoo ny reddyn shen ta booisal ayns e hilley.

²³ As shoh yn sarey echey, Dy jean mayd credjal ayns ennym e Vac Yeesey Creest, as graih y choyrt yn derrey yeh da’n jeh elley, myr t’eh er choyrt sarey dooin.

²⁴ As eshyn ta freayll ny annaghyn echey, t’eh tannaghtyn ayns Jee, as Jee aynsyn: as liorish shoh ta fys ain dy vel eh tannaghtyn aynin, liorish y Spyrryd t’eh er choyrt dooin.