1 Ean 2 - Yn Conaant Noa 1810

CAB. II

¹ My chloan veggey, ta mee scrieu ny reddyn shoh hiuish, nagh jean shiu peccah. As my ta dooinney erbee jannoo peccah, ta fer ain ta loayrt er nyn son rish yn Ayr, Yeesey Creest yn fer‐cairagh:

² As she eshyn yn lhiasaghey son nyn beccaghyn: as cha nee son ny peccaghyn ain ny‐lomarcan, agh myrgeddin son peccaghyn yn seihll ooilley.

³ As liorish shoh ta fys ain, dy vel enney ain er, my ta shin freayll e annaghyn.

⁴ Eshyn ta gra, Ta enney aym er, as nagh vel freayll e annaghyn, t’eh ny vreagerey, as cha vel yn irriney ayn.

⁵ Agh quoi‐erbee ta freayll e ghoo, aynsyn ta graih Yee dy firrinagh jeant mie: liorish shoh ta fys ain dy vel shin aynsyn.

⁶ Eshyn ta gra dy vel eh tannaghtyn aynsyn, lhisagh eh myr shen gimmeeaght, dy jarroo myr ren eshyn gimmeeaght.

⁷ Vraaraghyn, cha vel mee scrieu anney erbee noa hiuish, agh shenn anney va eu er‐dyn toshiaght: yn chenn anney yn goo ta shiu er chlashtyn er‐dyn toshiaght.

⁸ Reesht, anney noa ta mee scrieu hiu, red ta firrinagh aynsyn as ayndiuish: er‐y‐fa dy vel y dorraghys er n’gholl shaghey, as dy vel yn soilshey firrinagh hannah er jeet rish.

⁹ Eshyn ta gra dy vel eh ’sy toilshey, as feoh echey er e vraar, t’eh dy jarroo foast ayns dorraghys.

¹⁰ Eshyn shynney lesh e vraar, t’eh tannaghtyn ’sy toilshey, as cha bee eh ayns dangeyr erbee dy huittym.

¹¹ Agh eshyn ta feoh echey er e vraar, t’eh ayns dorraghys, as shooyl ’sy dorraghys, as cha vel fys echey cre’n raad t’eh goll, son dy vel dorraghys er gholley e hooillyn.

¹² Ta mee scrieu hiu, chloan veggey, er‐yn‐oyr dy vel ny peccaghyn eu er ny leih diu er graih e ennym.

¹³ Ta mee scrieu hiuish, ayraghyn, er‐y‐fa dy vel enney eu ersyn ta er‐dyn toshiaght. Ta mee scrieu hiu, gheiney aegey, er‐yn‐oyr dy dooar shiu yn varriaght er y drogh‐er. Ta mee scrieu hiu, chloan veggey, er‐yn‐oyr dy vel enney er ve eu er yn Ayr.

¹⁴ Ta mee scrieu hiu, ayraghyn, er‐yn‐oyr dy vel enney er ve eu ersyn ta er‐dyn toshiaght. Ta mee er scrieu hiu, gheiney aegey, er‐yn‐oyr dy vel shiu lajer, as dy vel goo Yee tannaghtyn ayndiu, as dy vel shiu er gheddyn barriaght er y drogh‐er.

¹⁵ Ny cur jee graih da’n seihll, ny da nheeghyn y theihll. My ta dooinney erbee cur graih da’n seihll, cha vel graih yn Ayr aynsyn.

¹⁶ Son ooilley ny ta ’sy theihll, saynt ny foalley, as saynt ny sooilley, as moyrn y vea, cha vel ad jeh’n Ayr, agh jeh’n seihll.

¹⁷ As ta’n seihll goll shaghey, as y taynt ain huggey: agh eshyn ta jannoo aigney Yee, vees er‐mayrn son dy bragh.

¹⁸ Chloan veggey, shoh’n traa s’jerree: as myr ta shiu er chlashtyn dy jig yn an‐chreestee, dy jarroo nish ta ymmodee an‐chreesteenyn ayn; liorish shoh ta fys ain dy nee shoh’n traa s’jerree.

¹⁹ Hie ad magh voïn, agh cha row ad j’in: son dy beagh ad j’inyn, v’ad dyn dooyt er hannaghtyn mârin: agh hreig ad shin, dy voddagh enney v’er ny choyrt orroo, nagh row ad ooilley j’inyn.

²⁰ Agh ta shiu er ny ooillaghey liorish y fer casherick, as toiggal eu ayns dy chooilley nhee.

²¹ Cha vel mee er scrieu hiu, er‐yn‐oyr nagh vel fys eu er yn irriney: agh er‐yn‐oyr dy vel fys eu er, as nagh vel breg erbee jeh’n irriney.

²² Quoi yn breagerey, agh eshyn ta gobbal dy nee Yeesey yn Creest? Eshyn ta ny an‐chreestee, ta gobbal yn Ayr as y Mac.

²³ Quoi‐erbee ta gobbal y Mac, ta’n fer cheddin gobbal yn Ayr: [agh] eshyn ta goaill‐rish y Mac, t’eh goaill‐rish yn Ayr myrgeddin.

²⁴ Lhig da shen eisht tannaghtyn ayndiu, ta shiu er chlashtyn er‐dyn toshiaght. My nee shen ta shiu er chlashtyn er‐dyn toshiaght tannaghtyn ayndiu, nee shiuish myrgeddin tannaghtyn ayns y Mac, as ayns yn Ayr.

²⁵ As shoh yn gialdyn t’eh er n’yannoo dooin, dy jarroo yn vea veayn.

²⁶ Ny reddyn shoh ta mee er scrieu hiu, mychione ocsyn ta cleayney shiu.

²⁷ Agh ta’n ooillaghey ta shiu er gheddyn veihsyn, tannaghtyn ayndiu: as cha vel feme eu dooinney erbee dy ynsaghey shiu: Agh myr ta’n ooillaghey cheddin gynsaghey shiu mychione dy chooilley nhee, as dy nee’n irriney eh, as cha nee breg: as dy jarroo myr t’eh er n’ynsaghey shiu, nee shiu tannaghtyn aynsyn.

²⁸ As nish, chloan veggey, tannee‐jee aynsyn: tra hig eh kionfenish, dy vod dunnallys ’ve ain, as nagh bee mayd er nyn goyrt gys nearey ec y cheet echey.

²⁹ My ta fys eu dy vel eshyn cairagh, ta fys eu dy vel dy chooilley unnane ta cur rish cairys, er ny ruggey jehsyn.