1 Corinthianee 9 - Yn Conaant Noa 1810

CAB. IX

¹ Nagh nee ostyl mee? nagh vel mee ec my reamys hene? nagh vel mee er vakin Yeesey Creest nyn Jiarn? nagh nee shiuish yn obbyr aym’s ayns y Chiarn?

² Mannagh vel mee my ostyl da feallagh elley, foast gyn dooyt ta mee diuish: son shiuish cowrey m’ostyllys ayns y Chiarn.

³ My ansoor dauesyn ta dy my whestional, shoh eh,

⁴ Nagh vel cairys ain dy ee as dy iu ny mast’ eu?

⁵ Nagh vel cairys ain dy chur lhien mârin er nyn yurnah shuyr, ben, chammah’s ostyllyn elley, as braaraghyn y Chiarn, as Cephas?

⁶ Ny nee mish as Barnabas ny lomarcan nagh vel ee nyn reamys dy chur nyn geird dy lhiattee?

⁷ Quoi ta goll dy chaggey traa erbee er e chost hene? quoi ta soiaghey garey‐feeyney, as nagh vel gee jeh’n vess echey? ny quoi ta bochillagh shioltane as nagh vel giu jeh bainney’n chioltane?

⁸ Vel mee loayrt shoh myr dooinney? as nagh vel y leigh hene gra lheid cheddin?

⁹ Son te scruit ayns leigh Voses, Cha giangle oo seose beeal y dow ta stampey magh yn arroo. Vel kiarail Yee roshtyn gys dew?

¹⁰ Ny vel eh loayrt shoh ooilley‐cooidjagh er y ghraih ainyn? er y choontey ainyn, gyn dooyt, ta shoh scruit; dy vod eshyn ta traaue, traaue ayns treishteil; as eshyn ta bwoalley ayns treishteil, dy vow eh soylley jeh shoh e hreishteil.

¹¹ My ta shinyn er guirr diuish reddyn spyrrydoil, nee madyr mooar eh my nee mayd buinn ny nheeghyn seihltagh eu.

¹² Myr ta fir‐ynsee elley er ghoaill y phooar shoh harriu, nagh vel eh ny s’cooie dooinyn? Ny‐yeih, cha vel shin er n’yannoo ymmyd jeh’n phooar shoh; agh ta shin er hurranse dy chooilley chreoghys, er‐aggle dy jinnagh shin sushtal Chreest y lhiettal.

¹³ Nagh vel fys eu dy vel adsyn ta shirveish mysh nheeghyn casherick, beaghey er yn oural? as dy vel adsyn ta tendeil ec yn altar, goaill ayrn jeh ny t’er yn altar?

¹⁴ Dy jarroo myr shen ta’n Chiarn myrgeddin er n’oardaghey, dy lhisagh adsyn ta preacheil y sushtal, beaghey er y sushtal.

¹⁵ Agh cha vel mish er n’yannoo ymmyd erbee jeh’n phooar shoh. Chamoo ta mee er scrieu ny reddyn shoh, dy nee myr shoh veagh eh jeant er my hon: son baare dou baase y gheddyn na dooinney erbee dy yannoo shoh my voggys dyn bree.

¹⁶ Son ga dy vel mee preacheil y sushtal, cha vel veg aym dy voggyssagh ass: son ta’n êgin shoh lhie orrym; dy jarroo, smerg dou mannagh jean‐ym y sushtal y phreacheil.

¹⁷ Son my ta mee jannoo shoh dy arryltagh, ta leagh my chour: agh my she noi m’aigney, ta preacheil y sushtal fo my churrym dy chooilleeney.

¹⁸ Cre ta eisht my leagh? dy feer tra ta mee preacheil y sushtal, dy jinnin’s er sushtal Chreest dy ve fegooish cost, nagh goym yn slane vondeish jeh my phooar ’sy tushtal.

¹⁹ Son ga nagh vel mee fo kiangley gys dooinney erbee, foast ta mee er n’yannoo mee hene my harvaant daue ooilley, dy voddin ny smoo y chosney [gys y chredjue.]

²⁰ As gys ny Hewnyn, ren mee gymmyrkey mee hene myr Ew, dy voddin ny Hewnyn y chosney: dauesyn ta fo’n leigh, myr fo’n leigh, dy voddin adsyn ta fo’n leigh y chosney;

²¹ Dauesyn ta fegooish y leigh, myr fegooish y leigh, (ga nagh row mee fegooish y leigh gys Jee, agh fo’n leigh gys Creest) dy voddin adsyn ta fegooish y leigh y chosney.

²² Dauesyn ta faase‐chredjuagh, haink mee dy ve myr faase‐chredjuagh, dy voddin yn vooinjer faase chredjuagh y chosney: dy chooilley aght ta mee er m’ymmyrkey hene gys dy chooilley ghooinney, dy voddin liorish dy chooilly haase paart y hauail.

²³ As shoh ta mee jannoo er graih yn tushtal, dy voddin mêriu goaill ayrn jeh’n leagh ta ayns shen giallit.

²⁴ Nagh vel fys eu hene, dy vel adsyn ta roie ayns race, ooilley roie, agh dy nee unnane ta geddyn yn leagh? Roie‐jee shiuish er lheid yn aght, dy vod shiu cosney.

²⁵ As dy chooilley ghooiney ta streeu son y varriaght, t’eh sheelt ayns dy chooilley nhee. Nish t’adsyn jannoo shoh dy chosney attey hed naardey, agh shinyn dy chosney attey nagh jed naardey.

²⁶ Ta mish er‐y‐fa shen myr shoh roie, cha nee ayns aght neu‐hickyr; ta mee myr shen gleck, cha nee myr fer ta bwoalley yn gheay:

²⁷ Agh ta mee freayll my chorp fo, as dy smaghtaghey eh; er‐aggle liorish aght erbee, erreish dooys v’er breacheil da feallagh elley, dy beign’s mee hene tilgit jeh.