1 Corinthianee 8 - Yn Conaant Noa 1810

CAB. VIII

¹ Nish mychione reddyn t’er ny ouralley gys jallooyn, ta fys ain dy vel toiggal ain ooilley. Ta tushtey sheidey lesh moyrn, agh ta graih niartaghey ’sy chredjue.

² As my ta dooinney erbee smooinaghtyn dy vel toiggal echey jeh nhee erbee, cha vel foast toiggal echey jeh nhee erbee myr lhisagh eh.

³ Agh my ta dooinney erbee graihagh er Jee, ta’n fer cheddin er ny ghoaill rish liorishyn.

⁴ Mychione gee ny reddyn shen eisht t’er ny hebbal ayns oural gys jallooyn, ta fys ain nagh vel jalloo monney ’sy theihll, as nagh vel Jee erbee elley ayn agh unnane.

⁵ Son ga dy vel ayn adsyn ta enmyssit jee’ghyn, edyr eh ve ayns niau ny er y thalloo, (myr ta jeeghyn ymmodee, as chiarnyn ymmodee)

⁶ Agh dooinyn cha vel ayn agh un Jee, yn Ayr, jehsyn ta dy chooilley nhee, as shinyn aynsyn; as un Chiarn Yeesey Creest, liorishyn ta dy chooilley nhee, as shinyn liorishyn.

⁷ Ny‐yeih cha vel ec dy chooilley ghooinney yn tushtey shen: son ta paart liorish y toiggal t’oc jeh’n jalloo gys y traa t’ayn, gee jeh myr red t’er ny ouralley gys jalloo; as ta’n chooin‐sheanse annoon oc seaghnit.

⁸ Agh cha vel bee dy voylley shin gys Jee: son edyr shin dy ee, cha vel shin ny share; ny edyr shin gyn gee, cha vel shin veg smessey.

⁹ Agh cur‐jee twoaie er‐aggle liorish aght erbee dy bee shoh nyn reayms oyr dauesyn ta annoon dy huittym ayns peccah.

¹⁰ Son my hee dooinney erbee uss, ta tushtey ayd, dty hoie ec bee ayns chiamble y jalloo, nagh bee yn chooinsheanse echeysyn ta annoon, miolit dy ee ny reddyn shen ta er ny hebbal da jallooyn:

¹¹ As kyndagh rish yn tushtey ayd’s nee dty vraar annoon cherraghtyn, er e hon hur Creest baase?

¹² Agh tra ta shiu myr shoh cur oyr peccah raad ny braaraghyn, as gortaghey yn chooinsheanse annoon oc, ta shiu jannoo peccah noi Creest.

¹³ Er‐y‐fa shen my ver ny ta mee gee oyr da my vraar dy huittym ayns peccah, cha n’ee‐ym feill choud as s’bio mee, er‐aggle dy dayrn‐ym my vraar gys peccah.