1 Corinthianee 6 - Yn Conaant Noa 1810

CAB. VI

¹ Lhoys da fer erbee eu, as cooish echey noi fer elley, goll gys y leigh fenish y vooinjer neu‐chairagh, as cha nee fenish ny nooghyn?

² Nagh vel fys eu dy jean ny nooghyn yn seihll y vriwnys? as my vees yn seihll er ny vriwnys lieriuish, vel shiuish neu‐feeu dy vriwnys ny cooishyn s’fardalee?

³ Nagh vel fys eu dy jean shinyn ainleyn y vriwnys? cre‐woad smoo reddyn ta bentyn rish y vea shoh?

⁴ My ta shiu eisht son briwnys cooishyn seihltagh, jean‐jee adsyn y phointeil dy chur briwnys sloo ta soit jeu ayns yn agglish.

⁵ Ta mee loayrt gys y nearey eu. Nee shen myr te, nagh vel dooinney creeney nyn mast’ eu? unnane hene vees abyl cooish y vriwnys eddyr e vraaraghyn?

⁶ Agh ta braar goll gys y leigh rish braar, as shen ny enish ocsyn nagh vel jeh’n chredjue.

⁷ Nish er yn oyr shen ta son shickyrys foill nyn mast’ eu, dy vel shiu gol gys y leigh ry‐cheilley: nagh baare diu goaill aggair? nagh baare diu surranse molteyraght?

⁸ Agh ta shiu jannoo aggair as molteyraght, as shen er nyn mraaraghyn.

⁹ Nagh vel fys eu nagh vow ny mee‐chrauee eiraght ayns reeriaght Yee? Ny bee‐jee mollit: chamoo yiow maarderee, ny adsyn ta cur ooashley da jallooyn, ny adsyn ta brishey‐poosey, ny ny soailtee, ny adsyn ta cur rish peccah noi dooghys,

¹⁰ Ny maarlee, ny ny sayntoilee, ny meshtyllee, ny oltooanee, ny tranlaasee, eiraght ayns reeriaght Yee.

¹¹ As nyn lheid va paart euish: agh va shiu er nyn niee, agh va shiu er nyn gasherickey, agh va shiu er nyn seyrey ayns ennym y Chiarn Yeesey, as liorish Spyrryd yn Jee ain.

¹² Ta dy chooilley nhee lowal dou agh cha vel dy chooilley nhee cooie dy ve jeant; ta dy chooilley nhee lowal er my hon, agh cha bee’m er my choyrt lhiam fo pooar veg jeu.

¹³ Bee son y volg, as y bolg son bee; agh nee Jee ad ny neesht y choyrt naardey. Nish cha vel y corp son maarderys, agh son y Chiarn; as y Chiarn son y chorp:

¹⁴ As ta Jee chammah er hroggal seose y Chiarn, as nee eh myrgeddin shinyn y hroggal seose liorish e phooar hene.

¹⁵ Nagh vel fys eu, dy vel ny kirp eu oltyn Chreest? jeanym eisht oltyn Chreest y ghoaill, as ad y yannoo oltyn streebagh? Ny lhig eh Jee.

¹⁶ Cre, nagh vel fys eu dy vel eshyn ta lhiantyn gys streebagh yn un chorp r’ee? son bee ad ny‐neesht (t’eh gra) un eill.

¹⁷ Agh eshyn ta lhiantyn gys y Chiarn, t’eh un spyrryd.

¹⁸ Chea‐jee veih maarderys. Ta dy chooilley pheccah ta dooinney dy yannoo, cheu‐mooie jeh’n chorp; agh eshyn ta cur rish maarderys, t’eh jannoo peccah noi e chorp hene.

¹⁹ Cre, nagh vel fys eu dy vel y corp eu chiamble y Spyrryd Noo ta ayndiu, ta eu veih Jee, as cha vel shiu lhieu hene?

²⁰ Son ta shiu kionnit lesh price: shen‐y‐fa jean‐jee Jee y ghloyraghey ayns nyn gorp, as ayns nyn spyrryd, ta lesh.