1 Corinthianee 5 - Yn Conaant Noa 1810

CAB. V

¹ Te goo cadjin dy vel maarderys nyn mast’ eu, as lheid y vaarderys as nagh vel wheesh as er ny enmys mastey ny Ashoonyn‐quaagh, dy jinnagh fer goaill da hene ben e ayrey.

² As ta shiu sheidit lesh moyrn, tra by‐yeshey diu dy ghobberan, dy beagh eshyn t’er n’yannoo yn obbyr shoh, scarrit veih nyn mast’ eu.

³ Son ta mish dy firrinagh, ga nagh vel mee kionfenish ayns persoon, agh mêriu ayns spyrryd, er vriwnys hannah, myr dy beign kionfenish, mychione eshyn t’er n’yannoo yn obbyr shoh;

⁴ [Ayns ennym nyn Jiarn Yeesey Creest, tra vees shiuish er nyn jaglym cooidjagh, as y spyrryd aym’s, lesh pooar nyn Jiarn Yeesey Creest,]

⁵ Dy livrey lheid y fer shen da’n drogh‐spyrryd dy stroie yn eill, dy vod yn annym ve er ny hauail ayns laa yn Chiarn Yeesey.

⁶ Cha vel y boggyssagh euish mie: Nagh vel fys eu dy vel red beg dy hoorid sooraghey yn slane theayst?

⁷ Glen‐jee magh er‐y‐fa shen yn chenn soorid, dy vod shiu ve nyn dheayst noa; myr ta shin hene gyn soorid. Son ta Creest yn Eayn‐caisht ain er ny ouralley er nyn son:

⁸ Lhig dooin er‐y‐fa shen freayll yn feailley; cha nee lesh y chenn soorid, chamoo lesh y soorid dy ghoanlys as olkys; agh lesh yn arran millish dy ynrickys as firrinys.

⁹ Hug mee screeuyn hiu, dyn dy reayll sheshaght rish maarderee.

¹⁰ Ny‐yeih cha nee ooilley‐cooidjagh rish maarderee yn theihll shoh, ny rish ny sayntoilee, ny ny tranlaasee, ny roosyn ta cur ooashley da jallooyn; son eisht beign diu dy jarroo goll ass y theihll.

¹¹ Agh nish ta mee er scrieu hiu, gyn sheshaght y reayll, my ta dooinney erbee ta enmyssit braar ny vaarderagh, ny sayntoilagh, ny jallooder, ny fer scammyltagh, ny meshtyllagh ny ny hranlaasagh, marish lhied y fer wheesh as gyn dy ghoaill bee.

¹² Son cre t’aym’s dy yannoo dy vriwnys adsyn neesht ta cheu‐mooie [jeh’n agglish]? nagh vel shiuish dy vriwnys adsyn ta er cheu‐sthie?

¹³ Agh adsyn ta er cheu‐mooie, ta Jee dy vriwnys. Shen‐y‐fa cur‐jee ersooyl veih nyn mast’ eu yn persoon mee‐chrauee shen.