1 Corinthianee 4 - Yn Conaant Noa 1810

CAB. IV

¹ Lhig da dooinney myr shen soiaghey j’inyn, myr jeh shirveishee Chreest, as stiurtyn jeh folliaghtyn Yee.

² Ny sodjey, te currym er ny yerkal rish ayns stiurtyn dy bee dooinney er ny gheddyn firrinagh.

³ Agh er my hon hene cha vel mee coontey jeh agh red feer fardalagh, dy beign’s er my vriwnys lieriuish, ny liorish briwnys dooinney erbee; dy jarroo cha vel mee briwnys mee hene.

⁴ Son ga nagh voddym coyrt nhee erbee gys my lieh hene, ny‐yeih cha vel mee liorish shoh er my heyrey; agh eshyn ta dy my vriwnys yn Chiarn eh.

⁵ Shen‐y‐fa ny jean‐jee nhee erbee y vriwnys roish y traa, derrey hig y Chiarn, ver chammah lesh gys soilshey folliaghtyn y dorraghys, as nee soilshaghey magh smooinaghtyn ny creeaghyn; as eisht yiow dy chooilley ghooinney moylley veih Jee.

⁶ As ny reddyn shoh, vraaraghyn, ta mee ayns co‐soylaghey er ghoaill orrym pene, as er Apollos, er y ghraih euish; liorin dy voddagh shiu gynsaghey, gyn dy smooinaghtyn jeh deiney erskyn ny ta scruit, nagh bee veg eu boggyssagh ass lieh fer erskyn fer elley.

⁷ Son quoi eh ta coyrt dhyt’s yn vondeish erskyn fer elley? as cre t’ayd nagh vel oo er gheddyn? nish my hooar oo eh, cre’n‐fa t’ou boggyssagh, myr nagh beagh oo er gheddyn eh?

⁸ Nish ta shiu jeant magh, nish ta shiu berchagh, ta shiu er reill myr reeaghyn nyn vegooish: as dy baillish Jee dy jinnagh shiu reill, dy voddagh shinyn reill myrgeddin mêriu.

⁹ Son ta mee smooinaghtyn dy vel Jee er hoiaghey magh shinyn ny ostyllyn er‐jerrey ooilley, myr deiney faagit mooie son baase. Son ta shinyn shilley yindyssagh da’n seihll, as da ainleyn, as da deiney.

¹⁰ Ta shinyn goit son ommydanyn er coontey Chreest, agh ta shiuish creeney ayns Creest: ta shinyn annoon, agh ta shiuish lajer: ta shiuish ooasle; agh ta beg er ny hoiaghey j’inyn.

¹¹ Gys y traa shoh hene, ta shinyn chammah accryssagh as paagh, as ta shin feme coamrey, as er nyn mwoalley, as cha vel cummal shickyr ain ayns boayl erbee;

¹² As ta shin laboragh, gobbraghey lesh nyn laueyn hene: tra ta shin oltooanit, ta shin bannaghey: tra ta shin tranlaasit, ta shin dy ymmyrkey eh:

¹³ Tra ta scammylt er ny choyrt dooin, ta shin coyrt goan mie: ta shin myr trustyr y theihll, as breinid dy chooilley nhee gys y laa t’ayn jiu.

¹⁴ Cha vel mee scrieu ny reddyn shoh dy naaraghey shiu, agh myr my chloan shynney lhiam ta mee cur coyrle diu.

¹⁵ Son ga dy vel eu jeih thousane fir‐ynsee ayns Creest, foast cha nhimmey ayr t’eu: son ayns Creest Yeesey ta mish er gheddyn shiu trooid y sushtal.

¹⁶ Shen‐y‐fa ta mee guee erriu, eiyr‐jee orrym’s.

¹⁷ Son yn oyr shoh ta mee er chur er chaghteraght hiu Timotheus, ta my vac graihagh, as firrinagh ayns y Chiarn, ver shiu ayns cooinaghtyn jeh ny raaidyn aym’s ta ayns Creest, myr ta mee gynsaghey dy chooilley raad ayns ooilley ny kialteenyn.

¹⁸ Nish ta paart er n’aase mooaralagh, myr nagh darrin hiu.

¹⁹ Agh hig‐ym hiu dy gerrit, lesh kied y Chiarn, as toig‐ym eisht, cha nee yn ghlare ocsyn ta mooaralagh, agh y phooar.

²⁰ Son cha vel reeriaght Yee [shassoo] ayns taggloo, agh ayns pooar.

²¹ Cre sailliu? jig‐ym hiu lesh slatt, ny ayns graih, as ayns y spyrryd dy veenid.