1 Corinthianee 3 - Yn Conaant Noa 1810

CAB. III

¹ As er my hon’s, vraaraghyn, cha voddym loayrt riuish myr rish sleih spyrrydoil, agh myr roosyn ta fo reill ny foalley, dy jarroo myr rish oikanyn ayns Creest.

² Ta mee er veaghey shiu lesh bainney, as cha nee lesh bee lajer: son eisht cha row shiu er y hon, chamoo ta shiu foast.

³ Son ta shiu foast fo reill ny foalley: son fakin dy vel nyn mast’ eu troo, as streeu, as anvea, nagh vel shiu foalley, as gimmeeaght myr deiney?

⁴ Son choud as ta fer gra, Ta mish son Paul, as fer elley, Ta mish son Apollos, nagh vel shiu fo reill ny foalley?

⁵ Quoi eisht ta Paul, as quoi Apollos, agh shirveishee lioroo ren shiu credjal, dy jarroo myr ta’n Chiarn er choyrt da dagh unnane e ghioot hene?

⁶ Ta mish er hoiaghey, ren Apollos gushtaghey, agh Jee ren bishaghey.

⁷ Myr shen eisht, cha vel eshyn ta dy hoiaghey jeh coontey erbee, chammoo eshyn ta dy ushtaghey: agh Jee, ta dy vishaghey.

⁸ Nish eshyn ta soiaghey, as eshyn ta gushtaghey, cha vel ad agh unnane: as yiow dy chooilley ghooinney e leagh hene, cordail rish e laboraght hene.

⁹ Son ta shinyn co‐obbreeyn fo Jee: ta shiuish farrysthie Yee, shiuish troggal Yee.

¹⁰ Cordail rish grayse Yee t’er ny choyrt dooys, myr ard‐vasoonagh creeney, ta mee er hoiaghey yn undin, as ta fer elley troggal er. Agh lhig da dy chooilley ghooinney kiarail y ghoaill kys t’eh troggal er.

¹¹ Son undin elley cha vod dooinney erbee y hoiaghey, agh shen ny ta er ny hoiaghey, ta shen Creest Yeesey.

¹² Nish my hroggys dooinney erbee er yn undin shoh, airh, argid, claghyn costal, fuygh, traagh, stubbyl:

¹³ Bee obbyr dy chooilley ghooinney er ny hoilshaghey: son ver yn laa lesh eh gys soilshey, er‐yn‐oyr dy bee eh er ny hoilshaghey liorish aile; as nee’n aile obbyr dy chooilley ghooinney y hrial, cre’n sorch te jeh.

¹⁴ My ta obbyr dooinney erbee t’eh er hroggal er, shassoo yn aile, yiow eh leagh.

¹⁵ My vees obbyr dooinney erbee losht, yiow eh coayl: agh nee eh hene scapail, agh myr dy beagh eh trooid yn aile.

¹⁶ Nagh vel fys eu dy nee shiuish chiamble Yee, as dy vel Spyrryd Yee baghey ayndiu?

¹⁷ My nee dooinney erbee stroie chiamble Yee, eshyn nee Jee y stroie: son ta chiamble Yee casherick, yn chiamble shen ta shiuish.

¹⁸ Ny lhig da dooinney erbee eh hene y volley: My ta dooinney erbee ny vud eu goaill er hene dy ve creeney ’sy theihll shoh, lhig da ve ny ommydan, dy voh eh ve creeney.

¹⁹ Son ta creenaght y theihll shoh ommijys marish Jee: son te scruit, T’eh goaill yn vooinjer chreeney ayns y chroutys oc hene.

²⁰ As reesht, Shione da’n Chiarn smooinaghtyn yn vooinjer chreeney, nagh vel ad agh fardail.

²¹ Shen‐y‐fa ny lhig da dooinney erbee boggyssagh ayns deiney: son lhieuish ta dy chooilley nhee:

²² Edyr eh ve Paul, ny Apollos, ny Cephas, ny yn feihll, ny bioys, ny baase, ny reddyn ta nish ayn, ny reddyn ta ry‐heet; lhieuish ad ooilley:

²³ As ta shiuish lesh Creest: as ta Creest lesh Jee.