1 Corinthianee 16 - Yn Conaant Noa 1810

CAB. XVI

¹ Nish mychione y chaglym son ny nooghyn, myr ta mee er n’oardaghey da kialteenyn Ghalatia, jean‐jee shiuish myrgeddin.

² Er y chied laa jeh’n chiaghtin, lhig dagh unnane eu coyrt dy lhiattee ayns stoyr, myr ta Jee er vannaghey eh, nagh bee feme chaglym y yannoo tra hig‐ym.

³ As tra hig‐ym, quoi‐erbee nee shiuish y lowal jeh liorish nyn screeuyn, ad shen ver‐yms dy choyrt lhieu yn ghiastyllys eu gys Jerusalem.

⁴ As my vees feme orrym’s dy gholl neesht, hed adsyn mârym.

⁵ Eisht hig‐ym hiuish tra vee’m er n’gholl trooid Macedonia: (son ta mee ry‐hoi goll trooid Macedonia.)

⁶ As foddee dy vuirr‐ym as dy geau‐ym yn geurey mêriu, dy vod shiu mee y choyrt er my yurnah, raad erbee dy jem.

⁷ Son cha jig‐ym dy yeeaghyn shiu nish er my yurnah, agh ta mee treishteil dy vaarail tammylt dy hraa mêriu, lesh kied y Chiarn.

⁸ Agh fuirr‐ym ec Ephesus derrey’n Chingeesh.

⁹ Son ta dorrys mooar as vondeishagh er ny osley roym, as ta ymmodee dy hassoo magh m’oï.

¹⁰ Nish my hig Timothy hiu, jeeagh‐jee dy bee eh sauchey ny mast’ eu: son t’eh jannoo obbyr y Chiarn, myr ta mee hene.

¹¹ Ny lhig da dooinney erbee er‐y‐fa shen beg y hoiaghey jeh, agh cur‐jee eh er e hoshiaght ayns shee, dy vod eh cheet hym’s: son ta mee jeeaghyn er e hon marish ny braaraghyn.

¹² Mychione nyn mraar Apollos, lhie mee er dy chion dy heet hiu marish ny braaraghyn: agh cha row eh aignagh eddyr dy heet hiu ec y traa shoh; agh hig eh tra vees caa jesh echey.

¹³ Bee‐jee er nyn arrey, shass‐jee shickyr ’sy chrodjue, ymmyrk‐jee shiu hene myr deiney, bee‐jee dunnal.

¹⁴ Lhig da oilley ny cooishyn eu ve jeant ayns graih Chreestee.

¹⁵ Ta mee guee erriu, vraaraghyn, (shione diu lught‐thie Stephanas, dy vel eh yn chied‐vess dy Achaia, as dy vel ad dy arryltagh er ghoaill orroo dy hirveish er ny nooghyn.)

¹⁶ Dy der shiu arrym da nyn lheid, as da dagh unnane ta cooney lhieu, as gobbraghey [ayns y sushtal.]

¹⁷ Ta mee goaill boggey dy vel Stephanas, as Fortunatus, as Achaicus er jeet: son shen ny va shiuish er‐gooyl ayn, t’adsyn er n’yannoo magh.

¹⁸ Son t’ad er gherjaghey my chree as y cree euish: shen‐y‐fa jean‐jee soiagh jeh nyn lheid.

¹⁹ Ta kialteenyn Asia dyn mannaghey shiu. Ta Aquila as Priscilla dyn mannaghey shiu dy jeean ayns y Chiarn, marish y cheshaght Chreestee ayns y lught‐thie oc.

²⁰ Ta ooilley ny braaraghyn dyn mannaghey shiu. Oltee‐jee yn derrey yeh yn jeh elley lesh y phaag dy hee.

²¹ Ta mish Paul dy vannaghey shiu fo my laue hene.

²² My ta dooinney erbee nagh vel graih echey er y Chiarn Yeesey Creest, lhig da ve Anathema, Maran‐atha.

²³ Dy row grayse nyn Jiarn Yeesey Creest mêriu.

²⁴ Dy row my ghraih mêriu ooilley ayns Creest Yeesey. Amen.