1 Corinthianee 15 - Yn Conaant Noa 1810

CAB. XV

¹ Ny‐sodjey, vraaraghyn, ta mee soilshaghey diu yn sushtal ren mee y phreacheil diu, eh ta shiu myrgeddin er ghoaill rish, as ayn ta shiu shassoo;

² Liorish ta shiu myrgeddin er nyn sauail, my ta shiu freayll ayns cooinaghtyn shen ny ren mee y phreacheil diu, mannagh vel shiu er chredjal ayns fardail.

³ Son livrey mee diu hoshiaght ooilley, shen ny hooar mee hene myrgeddin, kys dy dooar Creest baase son nyn beccaghyn cordail rish ny scriptyryn:

⁴ As dy row eh oanluckit, as dy dirree eh reesht yn trass laa cordail rish ny scriptyryn:

⁵ As dy row eh er ny akin liorish Cephas, eisht liorish y daa ostyl yeig.

⁶ Ny lurg shen v’eh er ny akin liorish ny smoo na queig cheead braar ec yn un cheayrt: jeu ta’n ayrn smoo er‐mayrn gys y traa t’ayn: agh ta paart er duittym nyn gadley.

⁷ Ny lurg shen v’eh er ny akin liorish Jamys, eisht liorish ooilley ny ostyllyn.

⁸ As er‐jerrey ooilley v’eh er ny akin liorym’s neesht, myr liorish fer ruggyr ass traa cooie.

⁹ Son she mish y fer sloo jeh ny ostyllyn, nagh vel feeu dy ve er my enmys my ostyl, er‐y‐fa dy ren mee tranlaase er agglish Yee.

¹⁰ Agh liorish grayse Yee ta mee ny ta mee: as e ghrayse, va er ny ghiootal orrym, cha row eh ayns fardail; agh ren mee laboragh ny s’doccarree na ad ooilley: ny‐yeih cha nee mish, agh grayse Yee va mârym.

¹¹ Shen‐y‐fa edyr eh ve mish ny adsyn, shoh myr ta shinyn preacheil, as shoh myr ren shiuish credjal.

¹² Nish my ta Creest er ny phreacheil dy dirree eh veih ny merriu, kys ta paart nyn mast’ eu gra nagh vel ayn irree‐seose‐reesht ny merriu?

¹³ Agh mannagh vel ny merriu girree reesht, eisht cha vel Creest er n’irree reesht?

¹⁴ As mannagh vel Creest er n’irree reesht, eisht ta’n phreacheil ain fardail, as ta’n credjue euish myrgeddin fardail.

¹⁵ Dy jarroo, as ta shinyn er nyn gheddyn nyn veanishyn foalsey dy Yee; er‐y‐fa dy vel shin er n’ymmyrky feanish da Jee, by hrog eh seose Creest: eh nagh hrog eh seose, my she shen nagh vel ny merriu girree seose reesht.

¹⁶ Son mannagh vel ny merriu girree reesht, eisht cha vel Creest er n’irree;

¹⁷ As mannagh vel Creest er n’irree, ta’n credjue eu fardail; ta shiu foast ayns nyn beccaghyn.

¹⁸ Eisht t’adsyn myrgeddin ta nyn gadley ayns Creest, er jerraghtyn.

¹⁹ My she ’sy vea shoh ny lomarcan ta nyn dreishteil ayns Creest, shinyn s’treih jeh ooilley sheelnaue.

²⁰ Agh nish ta Creest er n’irree veih ny merriu, as er jeet dy ve yn chied‐vess jeusyn ren cadley.

²¹ Son fakin dy nee liorish dooinney haink baase; liorish dooinney myrgeddin haink yn irree‐seose‐reesht veih ny merriu.

²² Son ’naght myr ayns Adam ta ooilley geddyn baase, dy jarroo myr shen ayns Creest bee ooilley jeant bio.

²³ Agh dy chooilley ghooinney ayns e choorse hene: Creest yn chied‐vess; ny lurg shen adsyn ta lesh Creest, ec y cheet echey.

²⁴ Eisht ta’n jerrey cheet, tra vees eh er livrey seose yn reeriaght gys Jee, dy jarroo yn Ayr; erreish da v’er choyrt sheese dy chooilley reill, as dy chooilley ’torrity as pooar.

²⁵ Son shegin dasyn reill derrey t’eh er choyrt ooilley e noidyn fo chosh.

²⁶ Yn noid s’jerree hed er stroie, yn baase eh.

²⁷ Son t’eh er choyrt dy chooilley nhee fo e chassyn. Agh tra t’eh gra dy vel dy chooilley nhee er ny choyrt fosyn, te shickyr dy vel shoh er‐lhimmey jeh Jee hene ren dy chooilley nhee y choyrt fo.

²⁸ As tra vees dy chooilley nhee er ny choyrt fosyn, eisht bee yn Mac eh hene myrgeddin er ny injillaghey huggeysyn hug dy chooilley nhee fo, dy vod Jee ve ooilley ayns ooilley.

²⁹ Er‐nonney cre nee adsyn y yannoo ta bashtit son ny merriu, mannagh vel ny merriu girree eddyr? cre’n‐fa eisht t’ad bashtit son ny merriu?

³⁰ As cre’n‐fa ta shin shassoo ayns gaue dy chooilley oor?

³¹ Ta mee dy hickyraghey liorish y gerjagh t’ainyn ayns Creest Yeesey nyn Jiarn, dy vel mee geddyn vaaish gaghlaa.

³² My ta mee myr yarragh oo er chaggey rish beïyn feïe ec Ephesus, cre’n cosney te dou mannagh vel ny merriu girree reesht? Lhig dooin gee as giu, son mairagh yiow mayd baase.

³³ Ny bee‐jee mollit; ta drogh heshaght cur mow ellyn mie.

³⁴ Dooisht‐jee gys cairys, as ny cur‐jee rish peccah; son ta paart nagh vel tushtey oc dy Yee: ta mee grah shoh gys y nearey eu.

³⁵ Agh jir dooinney ennagh, Kys ta ny merriu troggit seose, as lesh cre’n corp t’ad cheet?

³⁶ Uss ghooinney vee‐hushtagh, shen ny t’ou dy chuirr, cha vel eh bioghey, mannagh vel eh goll eig.

³⁷ As shen t’ou dy chuirr, cha vel oo cuirr yn corp shen vees, agh grine lhome, foddee eh taghyrt dy churnaght, ny dy arroo ennagh elley.

³⁸ Agh ta Jee cur corp da myr saillish hene, as da dy chooilley rass e chorp hene.

³⁹ Cha vel dy chooilley eill jeh’n un cheint; agh ta ayn un cheint dy eill dy gheiney, keint elley dy veiyn, keint elley dy eeastyn, as keint elley dy eeanlee.

⁴⁰ Ta ayn myrgeddin kirp flaunyssagh, as kirp thallooinagh; agh ta gloyr y chorp flaunyssagh un red, as gloyr y chorp thallooinagh red elley.

⁴¹ Ta un ghloyr ayn jeh’n ghrian, as gloyr elley jeh’n eayst, as gloyr elley jeh ny rollageyn: son ta un rollage erskyn rollage elley ayns gloyr.

⁴² Er yn aght shoh myrgeddin ta’n irree‐seose‐reesht veih ny merriu. Te er ny chuirr ayns broïd; te troggit seose ayns glennid:

⁴³ Te er ny chuirr ayns mee‐ooashley; te troggit seose ayns gloyr: Te er ny chuirr ayns annooinid; te troggit seose ayns pooar:

⁴⁴ Te er ny chuirr ny chorp dooghyssagh; te troggit seose ny chorp spyrrydoil. Ta corp dooghyssagh ayn, as ta ayn corp spyrrydoil.

⁴⁵ As myr shen te scruit, Va’n chied dooinney Adam jeant ny annym bio, va’n Adam s’jerree jeant ny Spyrryd ta choyrt bioys.

⁴⁶ Ny‐yeih, cha row shen hoshiaght ta spyrrydoil, agh shen ta dooghyssagh; as ny lurg shen ta spyrrydoil.

⁴⁷ Va’n chied dooinney jeh’n thalloo, thallooinagh: ta’n nah ghooinney yn Chiarn veih niau.

⁴⁸ Myr v’eshyn va thallooinagh; myr shen t’adsyn ta thallooinagh: as myr t’eshyn ta flaunyssagh; myr shen t’adsyn ta flaunyssagh.

⁴⁹ As ’naght myr ta shin er n’ymmyrkey co‐chaslys yn dooinney thallooinagh, nee mayd myrgeddin gymmyrkey co‐chaslys yn dooinney flaunyssagh.

⁵⁰ Nish shoh ta mee dy ghra, vraaraghyn, nagh vod feill as fuill eiraght y gheddyn ayns reeriaght Yee; chammoo nee neu‐ghlennid gheddyn glennid ayns eiraght.

⁵¹ Cur‐jee my‐ner, ta mee soilshaghey diu folliaght; Cha jean mayd ooilley cadley, agh bee mayd ooilley er nyn gaghlaa,

⁵² Ayns tullogh, ayns shallid, ec y chayrn s’jerree: (son bee’n cayrn er ny hellym, as bee ny merriu troggit seose gys y stayd nagh jed mow, as bee mayd er nyn gaghlaa.)

⁵³ Son shegin da’n corp neu‐ghlen shoh ve coamrit lesh glennid, as y chorp marvaanagh shoh lesh y vea dy bragh beayn.

⁵⁴ Tra vees y chorp neu‐ghlen shoh eisht coamrit lesh glennid, as y corp marvaanagh shoh lesh y vea dy bragh beayn, eisht vees cooilleenit yn raa shen ta scruit, Ta baase sluggit seose ayns barriaght.

⁵⁵ O vaase! cre vel dty ghah? O oaie! cre vel dty varriaght?

⁵⁶ Gah yn vaaish she peccah eh; as niart peccah yn leigh eh.

⁵⁷ Agh booise dy row gys Jee ta coyrt dooin yn varriaght, trooid nyn Jiarn Yeesey Creest.

⁵⁸ Shen‐y‐fa, my chaarjyn graihagh, shass‐jee shickyr, gyn scughey, dy kinjagh goll er nyn doshiaght ayns obbyr y Chiarn, son wheesh as dy vel fys eu nagh vel y laboraght eu ayns fardail ayns y Chiarn.